ប្រទេសកាណាដា ៖ នាយករដ្ឋមន្ត្រីកាណាដា លោក JUSTIN TRUDEAU អះអាងកាលពីថ្ងៃទី៩ ខែកុម្ភៈ ឆ្នាំ២០២២ថា ការធ្វើបាតុកម្មដោយរាំងខ្ទប់បិទផ្លូវ មិនអាចទទួលយកបានឡើយ និងនាំឲ្យមានផលប៉ះពាល់ជាអវិជ្ជមានដល់សេដ្ឋកិច្ចកាណាដា។ លោកលើកឡើងបែបនេះក្នុងថ្ងៃទី១៣ នៃចលនាតវ៉ាប្រឆាំងបណ្ដាវិធានការសុខាភិបាលក្នុងប្រទេស។
នៅមុខសភាប្រមុខរដ្ឋាភិបាលកាណាដាថ្លែងថា ការបិទរាំងខ្ទប់ផ្លូវ និងបណ្ដាបាតុកម្មខុសច្បាប់មិនអាចទទួលយកបាន ហើយនាំឲ្យប៉ះពាល់ដល់ពាណិជ្ជកម្មរបស់យើង។ លោកថ្លែងបែបនោះ ខណៈរដ្ឋធានីក្រុងអុតតាវ៉ា និងផ្លូវថ្នល់សំខាន់ៗ ត្រូវពួកបាតុកររាំងបិទខ្ទប់ ចាប់តាំងពីច្រើនថ្ងៃមកហើយ។
លោកថា យើងត្រូវធ្វើអ្វីគ្រប់យ៉ាងដើម្បីបញ្ចប់។ ពីដំបូងឡើយបាតុកម្មនោះដែលមានឈ្មោះថា ក្បួននៃសេរីភាព ជាចលនាតវ៉ាសំដៅប្រឆាំងការសម្រេចតម្រូវឲ្យបណ្ដាអ្នកបើករថយន្តកាំមីញ៉ុង ចាំបាច់ត្រូវចាក់វ៉ាក់សាំងប្រឆាំងកូវីដ ដើម្បីអាចបើករថយន្តពួកគេចេញចូលឆ្លងកាត់ព្រំដែនកាណាដា-អាមេរិក។ បន្ទាប់មកបាតុកម្មបានប្រែក្លាយទៅជាការតវ៉ាទូទៅ ប្រឆាំងបណ្ដាវិធានការសុខាភិបាលទប់ស្កាត់ការឆ្លងរាលដាលនៃកូវីដ-១៩និងប្រឆាំងរដ្ឋាភិបាល។
ម្យ៉ាងទៀត កាលពីថ្ងៃទី៩ ខែកុម្ភៈ ប៉ូលិសក្រុងអុតតាវ៉ា បានគំរា.មចាប់ខ្លួន បាតុករទាំងអស់ដែលយករថយន្តកាំមីញ៉ុង និងរថយន្តដទៃៗទៀតមករាំងបិទខ្ទប់ផ្លូវថ្នល់ ដែលនោះជាការគំរា.មលើកដំបូង ក្រោយការតវ៉ាអស់ពេល១៣ថ្ងៃមកហើយ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ