ប្រទេសកូរ៉េខាងត្បូង ៖ តាមទីភ្នាក់ងារព័ត៌មានកូរ៉េខាងត្បូង YONHAP បានថា ករណីអ្នកឆ្លងវីរុសកូវីដ-១៩ថ្មី ប្រចាំថ្ងៃនៅកូរ៉េខាងត្បូង កំពុងមានការកើនយ៉ាងខ្ពស់បំផុត ដោយនាថ្ងៃទី១០ ខែកុម្ភៈ ចំនួនអ្នកឆ្លងថ្មីមានដល់លើសពី៥០.០០០នាក់ មកពីការឆ្លងវីរុសប្រភេទអូមីក្រុង ដែលកំពុងឆ្លងលឿនបំផុតនៅក្នុងប្រទេសទាំងមូល។
ទីភ្នាក់ងារត្រួតពិនិត្យនិងបង្ការជំងឺកូរ៉េខាងត្បូងនិយាយថា ប្រទេសយើងមានអ្នកឆ្លងកូវីដថ្មីដល់៥៤.១២២នាក់ ក្នុងនោះ៥៤.០៣៤នាក់ជាអ្នកឆ្លងក្នុងស្រុក។ បែបនេះនាំឲ្យចំនួនអ្នកឆ្លងសរុបនៅក្នុងប្រទេស ឡើងដល់១.១៨៥.៣៦១នាក់។ តួលេខនៃអ្នកឆ្លងប្រចាំថ្ងៃ ឈានដល់លើសពី៥ម៉ឺននាក់ជាលើកដំបូង ដោយតួលេខអ្នកឆ្លងថ្មី នាថ្ងៃមុននេះមាន៤៩.៥៦៧នាក់។
ចំនួនអ្នកឆ្លងថ្មីប្រចាំថ្ងៃបានឡើងជាលើកដំបូងដល់លើសពី៣០.០០០នាក់ កាលពីថ្ងៃទី៥ ខែកុម្ភៈកន្លងទៅ ក្រោយ៣ថ្ងៃដែលចំនួនអ្នកឆ្លងមានលើសពី២០.០០០នាក់ ហើយស្ថិតនៅរវាងពី៣០.០០០ទៅ៤០.០០០នាក់៤ថៃ្ងជាប់គ្នា។
ការឆ្លងថ្មីមានការកើនឡើងគុណជិត៤ដង រយៈពេលត្រឹមតែ២សប្ដាហ៍ ខណៈអូមីក្រុងតំណាងឲ្យជាង៩២% នៃចំនួនអ្នកឆ្លងថ្មី រាយការណ៍កាលពីសប្ដាហ៍មុន។
អាជ្ញាធរសុខាភិបាលកូរ៉េខាងត្បូងបានព្រមានថា តួលេខអ្នកឆ្លងនឹងអាចកើនដល់ជាង១៧០.០០០នាក់ក្នុង១ថ្ងៃ នាចុងខែកុម្ភៈនេះ ក៏ទោះវាជាការប្រញាប់ប្រញាល់ពេក ក្នុងការវាយតម្លៃលើកម្រិតកំពូលនៃការឆ្លងអូមីក្រុងក៏ដោយ។
កូរ៉េខាងត្បូងក៏រាយការណ៍ដែរពីអ្នកស្លា.ប់ថ្មី២០នាក់ដោយសារកូវីដ ដែលនាំឲ្យចំនួនអ្នកស្លា.ប់ឡើងដល់៦.៩៦៣នាក់។ កូរ៉េខាងត្បូងមុននេះមានអ្នកឆ្លងកូវីដប្រចាំថ្ងៃ រវាងពីជាង៤.០០០ទៅជាង៥.០០០នាក់ប៉ុណ្ណោះ។ ចំពោះបញ្ហាកូវីដនាយករដ្ឋមន្ត្រីអង់គ្លេសលោកបូរីសចនសុនអះអាង កាលពីថ្ងៃទី៩ ខែកុម្ភៈថា លោកសង្ឃឹមអាចលុបចោលកាតព្វកិច្ចត្រូវធ្វើចត្តាឡីស័ក បណ្ដាមនុស្សដែលធ្វើតេស្តឃើញផលវិជ្ជមាននៃការឆ្លងកូវីដ ចាប់ពីដំណាច់ខែកុម្ភៈទៅ ដើម្បីបង្ហាញពីយុទ្ធសាស្ត្ររបស់យើងរៀនរស់ជាមួយកូវីដ។
អង់គ្លេសជួបប្រទះនឹងការឆ្លងអូមីក្រុងក្នុងកម្រិតកំពូលប្រចាំថ្ងៃ ជាមួយអ្នកឆ្លងដល់ជាង២០០.០០០នាក់ តែពេលនេះប្រកាសពីការចុះថយខ្លាំងបំផុត ហើយចំនួនអ្នកឈឺធ្ងន់ចូលមន្ទីរពេទ្យក៏មានការចុះថយខ្លាំងដែរ៕ ដកស្រង់ចេញពីវេបសាយ ៖ yna
ចែករំលែកព័តមាននេះ