ខេត្តត្បូងឃ្មុំ ៖ បុរសម្នាក់ត្រូវបានប្រជាពលរដ្ឋនាំគ្នាដេញចាប់និងវាយឡើងស្ទើរស្លាប់ស្ទើររស់កាលពីវេលាម៉ោង៤ និង៤០នាទីព្រលឹម ថ្ងៃទី២១ ខែកក្កដា ឆ្នាំ២០១៦ បន្ទាប់ពីបានធ្វើសកម្មភាពកាច់សោ.កម៉ូតូ១គ្រឿងមិនបានសម្រេចនៅចំណុចផ្សារមេមត់ ស្ថិតក្នុងភូមិមេមត់ផ្សារ ឃុំមេមត់ ស្រុកមេមត់ ខេត្តត្បូងឃ្មុំ ។
សមត្ថកិច្ចនគរបាលមួយរូបបានឲ្យដឹងថា ជនសង្ស័យដែលត្រូវចាប់ខ្លួនឈ្មោះ វុធ អ៊ិត ភេទប្រុស អាយុ៣១ឆ្នាំ មានទីលំនៅភូមិកំពៃ ឃុំរំចេក ស្រុកមេមត់ បានប៉ុនប៉ងលួចម៉ូតូ១គ្រឿង ម៉ាកវ៉េវ ពណ៌ខ្មៅ ស៊េរីឆ្នាំ២០០៨ របស់អាជីវករលក់បន្លែឈ្មោះ ញឿន ណាក់ អាយុ៣០ឆ្នាំ និងប្រពន្ធឈ្មោះ ចាន់ធឿន រស់នៅភូមិជាច ឃុំមេមត់ ស្រុកមេមត់ ។
សមត្ថកិច្ចនគរបាលរូបនោះបានឲ្យដឹងទៀតថា មុនពេលកើតហេតុជនរងគ្រោះបានជិះម៉ូតូមកផ្សារដើម្បីលក់បន្លែដូចសព្វមួយដង ដោយបានទុកម៉ូតូចម្ងាយពីខ្លួនប្រហែលជា៥ម៉ែត្រ ។ ខណៈពេលដែលកំពុងតែលក់ដូរស្រាប់តែមានជនសង្ស័យបានមកធ្វើសកម្មភាពកាច់សោ.កម៉ូតូតែត្រូវម្ចាស់ឃើញទាន់ក៏ស្រែកឆោឡោឡើងបង្កឲ្យមានការភ្ញាក់ផ្អើលនាំគ្នាដេញចាប់ជនសង្ស័យបានហើយនាំគ្នាប្រដៅយ៉ាងចាស់ដៃទើបប្រគល់ឲ្យសមត្ថកិច្ចដើម្បីចាត់ការតាមនិតិវិធីច្បាប់ ៕
ចែករំលែកព័តមាននេះ