លោកវេជ្ជបណ្ឌិត អ៊ឹម បុត្រ ប្រធានការិយាល័យចត្តាឡីស័កប្រចាំច្រកទ្វារព្រំដែនអន្តរជាតិបាវិត បានផ្តល់របាយការណ៍ពីជនបរទេសដែលចូលមករកស៊ីនិងរកការងារធ្វើឆ្លងកាត់តាមច្រកទ្វារព្រំដែន
ខេត្តស្វាយរៀង ៖ លោកវេជ្ជបណ្ឌិត អ៊ឹម បុត្រ ប្រធានការិយាល័យចត្តាឡីស័កប្រចាំច្រកទ្វារព្រំដែនអន្តរជាតិបាវិត បានផ្តល់របាយការណ៍ពីជនបរទេសដែលចូលមករកស៊ីនិងរកការងារធ្វើឆ្លងកាត់តាមច្រកទ្វារព្រំដែនអន្តរជាតិ និងច្រកទ្វេភាគីក្នុងខេត្តស្វាយរៀងសរុបមានចំនួន១២.៩៦៧នាក់(ស្រី្ត១.៨២៧នាក់) ក្នុងខែមករា ២០២២កន្លងទៅនេះ គិតចាប់ពីថ្ងៃ១ ដល់ថ្ងៃ៣១ ខែមករា ។ ចំណែកនៅដើមខែកុម្ភៈ ចាប់ពីថ្ងៃទី១ ដល់ថ្ងៃទី៨ ខែកុម្ភៈ ឆ្នាំ២០២២ មានជនបរទេសចូលមកតាមច្រកទ្វារព្រំដែនអន្តរជាតិបាវិតប្រមាណ៣០០នាក់ ដោយសារជារដូវចូលឆ្នាំថ្មីប្រពៃណីចិន-វៀតណាម មិនមានអ្នកឆ្លងដែនចូលពីប្រទេសវៀតណាមនោះទេ ។
លោក អ៊ឹម បុត្រ មានប្រសាសន៍ថា ទោះបីជាបែបណា នៅដើមខែកុម្ភៈនេះ ជនជាតិវៀតណាមទើបតែចាប់ផ្តើមចូលមកកម្ពុជាច្រើនតាមច្រកទ្វារអន្តរជាតិបាវិត ដែលនៅថ្ងៃទី៧ ខែកុម្ភៈ ឆ្នាំ២០២២ មានចំនួន១៤៦នាក់ និងនៅថ្ងៃទី៨ ខែកុម្ភៈ គិតត្រឹមម៉ោង១១និង៥នាទីព្រឹកមានជនជាតិវៀតណាមចូលមក៥៦នាក់ ។
ចំពោះរថយន្តដឹកទំនិញគ្រប់ប្រភេទ មានចំនួន៧.២៨៥គ្រឿង អ្នកបើកបររថយន្តជាជនបរទេសចំនួន៨.៤០៣នាក់(ស្ត្រី៣៧នាក់) ក្នុងនោះរថយន្តឆ្លងដែនចូលតាមច្រកទ្វារព្រំដែនអន្តរជាតិបាវិតមានចំនួន៥.២៣១គ្រឿង អ្នកបើកបរ៥.២៣១នាក់ ច្រកទ្វារព្រំដែនអន្តរជាតិព្រៃវល្លិចំនួន៨២៧គ្រឿង អ្នកបើកបរ៨២៧នាក់ ។ រថយន្តដឹកទំនិញឆ្លងដែនចូលមកតាមច្រកទ្វារព្រំដែនទ្វេភាគីបុសមន ស្រុករំដួលចំនួន១.២២៧គ្រឿង អ្នកបើកបររថយន្តចំនួន២.៣៤៥នាក់(ស្រី្ត៣៧នាក់) ។
លោក អ៊ឹម បុត្រ បញ្ជាក់ថា ដើម្បីសុវត្ថិភាព មន្ត្រីចត្តាឡីស័កនៅគ្រប់គោលដៅ បានអនុវត្តតាមវិធានរបស់ក្រសួងសុខាភិបាល និងប្រសាសន៍របស់សម្តេចតេជោ ហ៊ុន សែន អនុវត្តលើបណ្ណចាក់វ៉ាក់សាំងកូវីដ-១៩ ពេញលេញ និងលិខិតបញ្ជាក់ពិនិត្យធ្វើតេស្តតាមម៉ាស៊ីន PCR ចេញដោយក្រសួងសុខាភិបាលវៀតណាម ។ ចំពោះរថយន្តដឹកទំនិញ ត្រូវបាញ់ថ្នាំសម្លាប់មេរោគរួចទើបឲ្យបើកចូលទៅតាមគោលដៅ និងសាងទំនិញ ៕
ចែករំលែកព័តមាននេះ