អង្គការប្រយុទ្ធប្រឆាំងការប្រើសារធាតុហាមឃាត់ (WADA) បានអំពាវនាវឱ្យដាក់បម្រាមលើអត្តពលិករុស្ស៊ីមិនឱ្យចូលប្រកួតក្នុងអូឡាំពិក២០១៦ នៅប្រទេសប្រេស៊ីល និងកម្មវិធីប្រកួតផ្សេងទៀតបន្តពីអូឡាំពិក ក្រោយពីរកឃើញថា មានអត្តពលិករុស្ស៊ីជាច្រើនរូប បានប្រើសារធាតុប៉ូវកម្លាំងក្នុងពេលប្រកួតជាញឹកញាប់ រួមទាំងបានទទួលការគាំទ្រពីសមាគមកីឡានៅក្នុងប្រទេសរុស្ស៊ីទៀតផង ។
លោក Richard Mclaren មេធាវីជនជាតិកាណាដា ដែលបម្រើការឱ្យអង្គការ WADA បង្ហើបឱ្យដឹងពីទិន្នន័យគួរឱ្យតក់ស្លុតថា ក្នុងរយៈពេលកន្លងមកមានការទ្រទ្រង់ឱ្យកីឡាកររុស្ស៊ីប្រើសារធាតុហាមឃាត់ដើម្បីយកឈ្នះក្នុងពេលប្រកួតលើកដំបូងតាំងពីអូឡាំពិក២០១០នៅក្រុងវ៉េនគូវើ ព្រោះពេលត្រួតពិនិត្យគេរកឃើញកីឡាកររុស្ស៊ីជាច្រើនរូបប្រើសារធាតុប៉ូវកម្លាំង។ លើសពីនេះ កាលអូឡាំពិក២០១៤នៅរុស្ស៊ីក៏មានលួចប្រើសារធាតុប៉ូវខុសច្បាប់ និងអាក្រក់ជាងនេះក្រសួងកីឡារបស់រុស្ស៊ីគឺជាអ្នកនៅពីក្រោយ និងផ្តល់ការគាំទ្រពីទង្វើដ៏អាក្រក់នេះ ។
របាយការណ៍បានបញ្ជាក់ថា កន្លងមកអត្តពលិករុស្ស៊ី មានលទ្ធផលគំរូពីការត្រួតពិនិត្យសារធាតុប៉ូវក្នុងលក្ខណៈក្លែងបន្លំចំនួន៣១២រូប ប៉ុន្តែមិនបង្ហើបឱ្យដឹងឈ្មោះនោះទេ ធ្វើឱ្យលោក Mclaren អំពាវនាវឱ្យមានការដាក់បម្រាមលើអត្តពលិករុស្ស៊ីដូចរៀបរាប់ខាងលើ ៕
ចែករំលែកព័តមាននេះ