ញាន សុស៊ីដាន លាតត្រដាងពីក្ដីស្រមៃ ក្រោយដើរចូលទីលានហ្វឹកហាត់ត្រៀមប្រកួតអន្តរជាតិ
- ភ្នំពេញ
រាជធានីភ្នំពេញ ៖ ថ្មីៗនេះ ក្រុមយុវជនអាយុក្រោម២៣ឆ្នាំកម្ពុជា ដែលមានសមាសភាពកីឡាករចំនួន៣៦នាក់ បាន
រាជធានីភ្នំពេញ ៖ ថ្មីៗនេះ ក្រុមយុវជនអាយុក្រោម២៣ឆ្នាំកម្ពុជា ដែលមានសមាសភាពកីឡាករចំនួន៣៦នាក់ បាននិងកំពុងបន្ដធ្វើតេស្ដដំណាក់កាលទី២នៅវិមានកីឡដ្ឋាន នៃពហុកីឡដ្ឋានជាតិមរតកតេជោ ដែលជាការបើកឱ្យប្រភេទកីឡាបាល់ទាត់ ហ្វឹកហាត់លើកដំបូងចាប់តាំងពីដាក់សម្ពោធឲ្យប្រើប្រាស់វិមានកីឡដ្ឋានជាផ្លូវការ ដើម្បីត្រៀមការប្រកួតពានរង្វាន់បាល់ទាត់ ជើងឯកអាស៊ីអាគ្នេយ៍ អាយុក្រោម២៣ឆ្នាំ (AFF U23 Championship 2022) នៅកម្ពុជា នាពេលឆាប់ៗខាងមុខ។
វិមានកីឡដ្ឋាន នៃពហុកីឡដ្ឋានជាតិមរតកតេជោ បានបញ្ចប់ការសាងសង់ជាស្ថាពរកាលពីចុងឆ្នាំ២០២១ ដែលទីនេះហើយ គឺជាកន្លែងប្រារព្ធពិធីបើក និងបិទព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣ នៅកម្ពុជា និងក្រៅពីនេះ កីឡាដែលមានប្រជាប្រិយភាព (បាល់ទាត់) ក៏នឹងត្រូវធ្វើការប្រកួតនៅទីនេះផងដែរ នាំឲ្យយុវជនដ៏មានសក្ដានុពល១រូប ញាន សុស៊ីដាន បង្ហាញពីអារម្មណ៍របស់ខ្លួន ពេលបានដើរចូល និងហ្វឹកហាត់នៅកីឡដ្ឋានថ្មីជាលើកដំបូង។
ញាន សុស៊ីដាន ដែលជាយុវជនទើបតែវិវឌ្ឍខ្លួនយ៉ាងឆាប់រហ័ស ហើយអាចជាផ្នែកមួយនៃក្រុម U-23 កម្ពុជា បានបង្ហាញអារម្មណ៍របស់ខ្លួន ពេលបានឈានជើងចូលពហុកីឡដ្ឋានជាតិមរតកតេជោ ថា «សម្រាប់ខ្ញុំ ខ្ញុំគ្រាន់តែដើរចូលទីលានមរតកតេជោ ដែលជាទីលានថ្មីរបស់យើងភ្លាម គឺមានអារម្មណ៍ថាសប្បាយចិត្ត ឃើញទីលានពិតជាស្រស់ស្អាត ធំ ខ្ញុំក៏បានស្រមៃថា ប្រសិនបើការប្រកួតមានអ្នកគាំទ្រចូលទស្សនាច្រើន មិនដឹងជាអស្ចារ្យយ៉ាងណា ហើយខ្ញុំកាន់តែបន្ថែមការតាំងចិត្តខំប្រឹងហ្វឹកហាត់បន្ថែមទៀត ធ្វើយ៉ាងម៉េចមានឈ្មោះលេងស៊ីហ្គេម ២០២៣»។
កីឡាករបាល់ទាត់របស់សមាគមកីឡាកងយោធពលខេមរភូមិន្ទ (Tiffy Army) រូបនេះ បានលើកឡើងពីការធ្វើតេស្តដំណាក់កាលទី២ផងដែរថា «ការហ្វឹកហាត់គឺកីឡាករម្នាក់ៗ មានវិន័យល្អ ស្ដាប់គ្រូ និងមិនលេងសើច ហើយប្រឹងប្រែងហ្វឹកហាត់ ដើម្បីប្រជែងកន្លែងលេង ។ សម្រាប់ខ្ញុំ ខ្ញុំតាំងចិត្តមិនឲ្យមានសម្ពាធ ទោះយើងឃើញគេប្រកួតប្រជែងខ្លាំង អ៊ីចឹង ខ្ញុំក៏ត្រូវប្រកួតប្រជែងខ្លាំងដែរ ធ្វើម៉េចមានឈ្មោះនៅដំណាក់កាលចុងក្រោយអោយបាន»។
គួររំឭកដែរថា ញាន សុស៊ីដាន ត្រូវបានអ្នកស្នេហាវិស័យកីឡាបាល់ទាត់ មើលឃើញពីការវិវឌ្ឍខ្លួនរបស់គេយ៉ាងឆាប់រហ័ស ត្បិតយុវជនដែលមកពីខេត្តស្វាយរៀង និងធ្លាប់តែលេងពានប្រចាំស្រុក និងប្រចាំខេត្ត វ័យ១៩ឆ្នាំរូបនេះ ទើបតែប្រឡូកក្នុងបាល់ទាត់អាជីពនៅចុងឆ្នាំ២០២០ កន្លងទៅថ្មីៗ ជាមួយ U-21 Tiffy Army ក្រោយធ្វើតេស្តជាប់ដើម្បីចូលរួមលេងលីគទី២ និងបន្ទាប់មកទៀត គេត្រូវបានដំឡើងមកកាន់ក្រុមធំ នៃសមាគមកីឡាកងយោធពលខេមរភូមិន្ទ (Tiffy Army) លេងនៅលីគកំពូលកម្ពុជា រហូតទទួលបានឱកាសជាប់ជម្រើសជាតិកម្ពុជា អាយុក្រោម២៣ឆ្នាំ និងជម្រើសជាតិកម្ពុជា ឈុតធំ ក្នុងឆ្នាំតែមួយ។
អំពីពានរង្វាន់ AFF U23 Championship 2022 ដែលកម្ពុជាទទួលបានសិទ្ធិធ្វើម្ចាស់ផ្ទះនេះ នឹងត្រូវប្រកួតលើទីលានចំនួន២ រួមមាន វិមានកីឡដ្ឋាន នៃពហុកីឡដ្ឋានជាតិមរតកតេជោ និងកីឡដ្ឋានព្រីនស៍របស់ក្លិបបាល់ទាត់វិសាខា ។ ព្រឹត្តិការណ៍នេះដែរ ក្នុងនាមម្ចាស់ផ្ទះ កម្ពុជា ស្ថិតក្នុងពូល A ជាមួយទីម័រខាងកើត ហ្វីលីពីន និងព្រុយណេ ខណៈពូល B មានឥណ្ឌូណេស៊ី ម៉ាឡេស៊ី មីយ៉ាន់ម៉ា និងឡាវ និងពូល C មានថៃ វៀតណាម និងសិង្ហបុរី ៕
ចែករំលែកព័តមាននេះ