រាជធានីភ្នំពេញ ៖ ព្រះភិក្ខុសង្ឃ១អង្គមានជំងឺឆ្គួតជ្រូកប្រចាំព្រះកាយ ហើយដោយសារតែនៅក្នុងវត្តដាច់ទឹក ព្រះអង្គក៏ចុះស្រង់ទឹក(ងូតទឹក)ស្រះក្នុងវត្ត ។ ខណៈនោះ សង្ស័យពេលកំពុងស្រង់ទឹក ជំងឺបានរើឡើងក៏ប្រកាច់ធ្លាក់ចូលក្នុងស្រះក៏លង់លិចបាត់ទៅក្នុងទឹក បណ្ដាលឲ្យសុគត…
រាជធានីភ្នំពេញ ៖ ព្រះភិក្ខុសង្ឃ១អង្គមានជំងឺឆ្គួតជ្រូកប្រចាំព្រះកាយ ហើយដោយសារតែនៅក្នុងវត្តដាច់ទឹក ព្រះអង្គក៏ចុះស្រង់ទឹក(ងូតទឹក)ស្រះក្នុងវត្ត ។ ខណៈនោះ សង្ស័យពេលកំពុងស្រង់ទឹក ជំងឺបានរើឡើងក៏ប្រកាច់ធ្លាក់ចូលក្នុងស្រះក៏លង់លិចបាត់ទៅក្នុងទឹក បណ្ដាលឲ្យសុគត ។ ក្រោយមក ព្រះសង្ឃដទៃទៀត រួមនិងអ្នកភូមិនៅជិតនោះបាននាំគ្នារាវរកពេញ១យប់ ប៉ុន្តែអត់ឃើញសោះ លុះព្រឹកឡើងទើបប្រទះឃើញស.ព.អណ្ដែតទឹកបង្កឲ្យមានការភ្ញាក់ផ្អើល ។ ហេតុការណ៍នេះ បានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង៧យប់ថ្ងៃទី៣ កុម្ភៈ ឆ្នាំ២០២២ នៅក្នុងស្រះទឹកវត្តតាំងកសាងខាងជើង ស្ថិតនៅក្នុងភូមិចំការឪឡឹក សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
បើតាមព្រះសង្ឃគង់នៅវត្តតាំងកសាងខាងជើងនេះបានមានសង្ឃដីកាថា ព្រះភិក្ខុសង្ឃដែលសុគតអណ្ដែតក្នុងទឹកស្រះអង្គនេះ មាននាមច័ន្ទ មានរិទ្ធ ហៅណព្វ ព្រះជន្ម២៨ព្រះវស្សា មានស្រុកកំណើតនៅខេត្តកំពង់ឆ្នាំង ។ ព្រះអង្គមានជំងឺប្រចាំកាយម្យ៉ាង គឺជំងឺឆ្គួតជ្រូកដែលតែងតែប្រកាច់ជាញឹកញាប់ ហើយព្រះអង្គទើបតែមកគង់នៅក្នុងវត្តតាំងកសាងខាងជើងនេះ បានរយៈពេលប្រមាណ៣ខែតែប៉ុណ្ណោះ ក៏ជួបរឿងអកុសលបែបនេះតែម្ដង ។
ព្រះសង្ឃខាងលើបានមានសង្ឃដីកាបន្តទៀតថា កាលពីថ្ងៃកើតហេតុនៅក្នុងវត្តខាងលើដាច់ទឹក ខណៈនោះព្រះភិក្ខុសង្ឃច័ន្ទ មានរិទ្ធ ហៅណព្វ បានទៅស្រង់ទឹក(ងូតទឹក)នៅស្រះទឹកខាងលើតែ១អង្គឯងប៉ុណ្ណោះ ពុំមានព្រះសង្ឃដទៃទៀតទៅជាមួយឡើយ។ខណៈនោះ ពុំមាននរណាបានដឹងថា ព្រះអង្គមានរឿងអ្វីទេ ស្រាប់តែបាត់មិនឃើញត្រឡប់ទៅមហាកុដិវិញសោះ ប៉ុន្តែក៏ពុំមានអ្នកចាប់អារម្មណ៍ថា ព្រះអង្គលង់ទឹកនោះដែរ ។
ប្រភពដដែលបានបន្តទៀតថា គាប់ជួនពេលនោះ មានអ្នកដុតសំរាមនៅក្នុងវត្តបង្កឲ្យមានការឆេះសន្ធោសន្ធៅ ហើយដោយសារតែខ្លាចមានការឆេះរាលដល់កន្លែងផ្សេងទៀតនោះ ព្រះសង្ឃនៅក្នុងវត្តបាននាំគ្នាទៅពន្លត់ភ្លើង។ខណៈនោះក៏បានប្រទះឃើស្បង់ចីវរ រួមជាមួយកន្ត្រកដាក់សាប៊ូនិងស្បែកជើងរបស់ព្រះអង្គនៅមាត់ស្រះទឹក។ប៉ុន្តែបាត់ពុំឃើញភិក្ខុសង្ឃច័ន្ទ មានរិទ្ធ ហៅណព្វនេះឡើយ ពេលនោះដោយសារតែដឹងថាព្រះអង្គមានជំងឺឆ្កួតជ្រូក ក៏ចាប់អារម្មណ៍និងសន្និដ្ឋានថា ព្រះអង្គអាចនិងប្រកាច់ធ្លាក់ទឹកបាត់ទៅហើយ។
ប្រភពខាងលើបានបន្តថា ពេលនោះ មានការភ្ញាក់ផ្អើលខ្លាំងហើយព្រះសង្ឃនិងអ្នកភូមិនៅជាប់វត្តនាំគ្នារាវរកទាំងយប់ប៉ុន្តែពុំឃើញសោះ។លុះដល់វេលាម៉ោងប្រមាណ៧ព្រឹកថ្ងៃទី៤ ខែកុម្ភៈ ទើបប្រទះឃើញសាកសពព្រះអង្គសុគតអណ្ដែតទឹកបែបនេះបាត់ទៅហើយ បន្ទាប់មកព្រះគ្រូចៅអធិការវត្តបានរាយការណ៍ជូនអាជ្ញាធរនិងនគរបាលបានជ្រាបព្រមទាំងពិនិត្យជាក់ស្ដែង។
ដោយឡែក នគរបានប៉ុស្ដិ៍កាកាបទី២រួមជាមួយនគរបាលផ្នែកព្រហ្មទណ្ឌ ផ្នែកបច្ចេកទេសនៃអធិការដ្ឋានខណ្ឌពោធិ៍សែនជ័យក៏បានចុះទៅភ្លាមៗដែរ។ក្រោយមកបានរាយការណ៍បន្តទៅកាន់នគរបាលការិយាល័យបច្ចេកទេសវិទ្យាសាស្រ្ត នៃស្នងការដ្ឋាននគរបាលរាជធានីភ្នំពេញចុះទៅពិនិត្យកោសល្យវិច័យ។ចំណែកលទ្ធផលនៃការធ្វើកោសល្យវិច័យបញ្ជាក់ថាព្រះភិក្ខុសង្ឃអង្គនេះសុគតដោយសារតែលង់ទឹកពុំមានជាប់ព័ន្ធទៅនិងអំពើឃាតកម្មឡើយ ។
ចែករំលែកព័តមាននេះ