រាជធានីភ្នំពេញ ៖ គណបក្សសង្គ្រោះជាតិចង់ជួបជាមួយគណបក្សប្រជាជនកម្ពុជា ដើម្បីពិភាក្សាកុំមានការលាបពណ៌ឬសាចទឹកដាក់គ្នា ចំពោះករណីបា.ញ់សម្លា.ប់លោកបណ្ឌិត កែម ឡី កាលពីពេលថ្មីៗនេះ
រាជធានីភ្នំពេញ ៖ គណបក្សសង្គ្រោះជាតិចង់ជួបជាមួយគណបក្សប្រជាជនកម្ពុជា ដើម្បីពិភាក្សាកុំមានការលាបពណ៌ឬសាចទឹកដាក់គ្នា ចំពោះករណីបាញ់សម្លាប់លោកបណ្ឌិត កែម ឡី កាលពីពេលថ្មីៗនេះ ។
លោក អេង ឆៃអ៊ាង តំណាងលោក សម រង្ស៊ី ប្រធានគណបក្សសង្គ្រោះជាតិនិងលោក កឹម សុខា អនុប្រធានបានឲ្យដឹង នាព្រឹកថ្ងៃទី១៣ កក្កដា នៅស្នាក់ការកណ្តាលគណបក្សសង្គ្រោះជាតិ បានបញ្ជាក់ពីជំហរគណបក្សចង់មានការស៊ើបអង្កេតឯករាជ្យ ក៏ដូចជាមានការចូលរួម ពីអន្តរជាតិ ក្នុងករណីបាញ់សម្លាប់លោកបណ្ឌិត កែម ឡី ។
លោកបញ្ជាក់ថា «ដើម្បីចៀសវាងកុំឲ្យមានភាពស្រពេចស្រពិល ហើយកុំឲ្យមានការលាបពណ៌គ្នាទៅវិញទៅមក នោះក្រុមតំណាងរាស្ត្រគណបក្សសង្គ្រោះជាតិ ស្នើសុំឲ្យអ្នកឯករាជ្យមានវិជ្ជាជីវធ្វើការស៊ើបអង្កេតលើកករណីឃាតកម្មចំពោះលោកបណ្ឌិត កែម ឡី ។ ព្រោះថាកន្លងមានឃាតកម្មដែលមានចរិតនយោបាយដូចជាលោក ជា វិជ្ជា មេសហជីព លោក ឈុត វុទ្ធី និងករណីមួយចំនួនទៀតអាជ្ញាធរខ្មែរ មិនដែលបានវែងមុខឃាតករពិតប្រាកដ និងតម្លាភាពផងដែរ» ។
លោក អេង ឆៃអ៊ាង លើកឡើងទៀតថា ជាការកត់សម្គាល់ករណីបាញ់សម្លាប់ ឃើញតែមានការចាប់មនុស្សស្លូតត្រង់សុច្ចរិត មកដើរតួរជាឃាតករ ។ សម្រាប់ករណីលោកបណ្ឌិត កែម ឡី គណបក្សសង្គ្រោះជាតិសុំស្នើឲ្យមានការស៊ើបអង្កេតពីអន្តរជាតិ ដូចជាអង្គការសហ ប្រជាជាតិ ដើម្បីបញ្ចប់អំពើមនុស្សឃាតដែលសាហាវយង់ខ្នងនៅកម្ពុជា និងបញ្ចប់រឿងពាក់ព័ន្ធនឹងរឿងនយោបាយ ។
ទាក់ទិននិងសន្តិសុខវិញលោក អេង ឆៃអ៊ាង បានអំពាវនាវដល់សមាជិកសភា សកម្មជនគណបក្សសង្គ្រោះជាតិធ្វើការប្រុងប្រយ័ត្នផ្នែកសន្តិសុខក្នុងការធ្វើដំណើរទៅណាមកណា ព្រោះករណីឃាតកម្មមានភាពសាហាវណាស់ ។
មន្ត្រីជាន់ខ្ពស់គណបក្សសង្គ្រោះជាតិរូបនេះក៏បានគូសបញ្ជាក់ថា «គណបក្សសង្គ្រោះជាតិទទូចទៅគណបក្សកាន់អំណាច ដើម្បីជួបពិភាក្សាព្រោះថា ឃាតកម្មចំពោះលោកបណ្ឌិត កែម ឡី ជាឃាតកម្មធ្ងន់ធ្ងរ ។ ដូច្នេះយើងមិនចង់ឲ្យមានការបាចទឹកដាក់គ្នា មិនចង់ឲ្យមានការ ចោទប្រកាន់គ្នា យើងចង់ឲ្យមានស៊ើបអង្កេតដោយឯករាជ្យមួយ យើងចង់ឲ្យមានការជជែក គ្នារវាងគណបក្សធំទាំងពីរ ។ ព្រោះថាពេលនេះយើងកត់សម្គាល់ឃើញមានប្រឌិតច្រើនជុំវិញឃាតកម្មករសម្លាប់លោកបណ្ឌិត កែម ឡី ហើយករណីខ្លះ មនុស្សនៅរស់បែរជាប្រឌិតថាជនដៃដល់ទៅវិញ» ។
ក្រុមសមាជិកសភាគណបក្សសង្គ្រោះជាតិ បានចេញសេចក្តីថ្លែងការណ៍ស្នើឲ្យមានការស៊ើបអង្កេតឯករាជ្យ លើកករណីឃាតកម្មបាញ់សម្លាប់លោកបណ្ឌិត កែម ឡី កាលពីថ្ងៃទី១០ កក្កដា កន្លងមក ពីអ្នកឯកទេសដែលមានជំនាញត្រឹមត្រូវ និងឯករាជ្យ ។
សេចក្តីថ្លែងការណ៍បានបញ្ជាក់ថា «ក្រុមសមាជិកសភាគណបក្សសង្គ្រោះជាតិកត់សម្គាល់ឃើញថា កន្លងទៅមានអំពើឃាតកម្មមានលក្ខណៈនយោបាយមួយចំនួនដូចជាករណីលោក ជា វិជ្ជា និងលោក ឈុត វុទ្ធី ជាដើមដែលអាជ្ញាធររបស់រាជរដ្ឋាភិបាលបច្ចុប្បន្នពុំដែលបានរកឃើញឃាតករពិតប្រាកដ ឬអ្នកនៅពីក្រោយខ្នងឃាតកម្ម ទាំងនោះឡើយ។ ជាពិសេសសូម្បីតែរបាយការណ៍ស្តីពីការស៊ើបអង្កេត និងការសួរចម្លើយជនជាប់ចោទទៀតសោត គឺធ្វើឡើងដោយគ្មានតម្លាភាព ។ ក្នុងករណីនេះដែរ យើងសង្កេតឃើញថា ជនគ្មាន ទោស ត្រូវបានគេចាប់យកមកបង្ខំឲ្យឆ្លើយដាក់គេឯង ឬទទួលកំហុសដោយគ្មានមូលដ្ឋាន និងភស្តុតាងច្បាស់លាស់ផង ។ មូលហេតុទាំងនេះហើយដែលធ្វើឲ្យសាធារណមតិជាតិ និងអន្តរជាតិ ពុំមានជំនឿទាល់តែសោះថា អាជ្ញាធរមានសមត្ថកិច្ចទាំងនេះ មានភាពឯករាជ្យ និងមានជំនាញពិតប្រាកដ ដើម្បីអាចស្វែងរកការពិត ក្នុងការផ្តល់យុត្តិធម៌របស់ជនរងគ្រោះ បាននេះទេ» ។
ក្នុងសមាជិកសភាបក្សប្រឆាំងដដែលក៏បានអំពាវនាវដល់សហគមន៍អន្តរជាតិ យកចិត្តទុកដាក់ពីស្ថានការណ៍នយោបាយនៅព្រះរាជាណាចក្រកម្ពុជាបច្ចុប្បន្ន ដែលកំពុងមានភាពកាន់តែធ្ងន់ធ្ងរខ្លាំងទៅៗ ហើយឲ្យអង្គការអន្តរជាតិ មានជាអាទិ៍ អង្គការសហប្រជាជាតិ ចូលរួមធ្វើការស៊ើបអង្កេតរកការពិតនូវអំពើឃាតកម្មលើរូបលោកបណ្ឌិត កែម ឡី នេះ ក្នុងការធានាកុំឲ្យមានលក្ខណៈនយោបាយបានរួចខ្លួន ដើម្បីបញ្ចប់នូវអំពីដ៏សែនព្រៃផ្សៃ និងថោកទាបកុំឲ្យមានបន្តទៅទៀត ។
ទាក់ទិនឹងការលើកឡើងរបស់គណបក្សបក្សប្រឆាំងនោះ អ្នកនាំពាក្យគណបក្សប្រជា ជនកម្ពុជាលោក សុខ ឥសាន បានលើកឡើងថា គណបក្សប្រជាជនកម្ពុជាមិនបានលាបពណ៌ អ្នកណានោះទេ ពិសេសនោះក្នុងករណីសម្លាប់លោកបណ្ឌិត កែម ឡី ។
លោកបញ្ជាក់ថា «ចំពោះឃាតកម្មលើលោកបណ្ឌិត កែម ឡី គ្មានអ្នកណាលាបពណ៌អ្នកណាទេ គណបក្សប្រជាជនអត់មានលាបពណ៌អ្នកណាទេ ។ តែផ្ទុយទៅវិញមានតែមេបក្សប្រឆាំងលាបពណ៌គណបក្សប្រជាជន និងរាជរដ្ឋាភិបាល ។ អញ្ចឹងទេបើមេបក្សប្រឆាំង និងសមាជិកឈប់លាបពណ៌ទៅនោះនឹងឈប់មានការលាបពណ៌ហើយ» ។
លោកបានលើកឡើងទៀតថា ចំពោះករណីឃាតកម្មលោកបណ្ឌិត កែម ឡី កំពុងតែស្ថិតនក្នុងដៃសមត្ថកិច្ច និងតុលាការ ដើម្បីធ្វើការស៊ើបអង្កេត ស្វែងរកការពិតដល់ទីបញ្ចប់ ។ យើងគួរតែទុកពេលវេលាឲ្យគេធ្វើការរនឹងចុះ។ សម្រាប់ការជួបគ្នារវាងគណបក្សនយោបាយ គណបក្សប្រជាជន និងគណបក្សសង្គ្រោះជាតិនោះយើងយល់ថា គណបក្សមិនមែនជំនាញក្នុងស៊ើបអង្កេតនោះទេ ព្រោះថាអាចប៉ះពាល់ដល់ដំណើរការនីតិវិធីរបស់តុលាការ និងសមត្ថកិច្ច ដូច្នេះការជួបគ្នានោះមិនចាំបាច់ទេ ។
ចំពោះការស្នើសុំឲ្យអន្តរជាតិក្នុងការស៊ើបអង្កេតនោះលោក សុខ ឥសាន ថាមិនចាំបាច់នោះទេ ព្រោះថាសមត្ថកិច្ចរបស់ក្រសួងមហាផ្ទៃមានហើយ ។
ទោះបីជាមានព័ត៌មានក្រៅផ្លូវពីគណបក្សសង្គ្រោះជាតិថា នឹងមានជំនួបរវាងគណបក្សប្រជាជនកម្ពុជា និងគណបក្សសង្គ្រោះជាតិនៅពាក់កណ្តាលខែក្រោយយ៉ាងណាក្តី អ្នកនាំពាក្យគណបក្សកាន់អំណាចបានអះអាងគ្មានជំនួបនោះទេ ។
លោក សុខ ឥសាន អ្នកនាំពាក្យគណបក្សកាន់អំណាចបានឲ្យដឹងនៅថ្ងៃដដែលថា គ្មានជំនួបចរចារវាងគណបក្សប្រឆាំងនោះទេ ទោះបីជាគណបក្សប្រឆាំងតែងតែលើកឡើងថា នឹងជំនួបគ្នានៅពេលខាងមុខក៏ដោយ ។ លោកថាការដែលបក្សប្រឆាំងចេះតែថា មានការជំនួបនោះ មកពីគណបក្សនេះចង់បានប្រជាប្រិយភាពពីប្រជាជនថា ខ្លួនមានបំណងដោះស្រាយបញ្ហា ផ្ទុយទៅវិញទេគណបក្សប្រឆាំង កំពុងប្រើប្រាស់នយោបាយថា ខ្លួនចង់បានសន្តិភាព ស្ថេរភាពណាស់ ។ ប៉ុន្តែខ្ញុំយល់គ្មានគណបក្សណាចង់បានសន្តិភាព ស្ថេរភាពសង្គមជាងគណបក្សប្រជាជនកម្ពុជានោះទេ ព្រោះថាគណបក្សកាន់អំណាចមិនចង់ឲ្យមានកើតឃាតកម្ម អស្ថេរភាពក្នុងសង្គមនោះទេ ។
លោកបន្តថា គណបក្សកាន់អំណាចមិនចង់ឲ្យកើតមានឃាតកម្ម បាតុភាពអសន្តិសុខ ក្នុងសង្គមនោះទេ ។ ព្រោះថា នៅពេលកើតមាននោះវាបានប៉ះពាក់ដល់ការទទួលខុសត្រូវក៏ដូច ជាកិត្តិយសរបស់គណបក្ស និងថ្នាក់ដឹកនាំ។ អញ្ចឹងទេការប្រលយពាក្យបក្សប្រឆាំងនោះគ្រាន់តែជាការចង់ឲ្យមានការជឿងទុកចិត្តពីប្រជាពលរដ្ឋថា ខ្លួនចង់ដោះស្រាយបញ្ហា ។
លោកសង្កត់ធ្ងន់ថា កក្តាគន្លឹះសំខាន់បំផុតសម្រាប់ស្ថេរភាពនយោបាយ សន្តិសុខក្នុងប្រទេសជាតិនោះមានតែកុំធ្វើអ្វីខុសពីច្បាប់ ។ ដូចជាកុំចោទគេក្បត់ជាតិ លក់ទឹកដី អាយង់យួន ប្រើប្រាស់ផែនទីក្លែងក្លាយនោះមិនអាចរួចខ្លួនបានទេ ។
គួរបញ្ជាក់ថា នៅថ្ងៃនេះដែលលោក កឹម សុខា ប្រធានស្តីទីគណបក្សសង្គ្រោះជាតិ បានជួបប្រជុំជាមួយសមាជិកសភារបស់ខ្លួន ដើម្បីពិភាក្សាពីស្ថានការណ៍នយោបាយ និងករណីសម្លាប់លោកបណ្ឌិត កែម ឡី នៅស្នាក់ការគណបក្សសង្គ្រោះជាតិផងដែរ ។ ក្នុងកិច្ចប្រជុំក្រុមសមាជិកសភាគណបក្សសង្គ្រោះជាតិ បានសម្រេចចេញ សេចក្ដីថ្លែងការណ៍មួយ អំពីគោលជំហរគណបក្សសង្គ្រោះជាតិ ចំពោះការស៊ើបអង្កេតករណីឃាតកម្មលោកបណ្ឌិត កែម ឡី ។
ជាការកត់សម្គាល់ក្រោយពីការបាញ់ស្លាប់លោកបណ្ឌិត កែម ឡី មកនៅលើបណ្តាញសង្គមហ្វេសប៊ុក បានធ្វើការវាយប្រហារ និងចោទដាក់គា្នរវាងអ្នកគាំទ្រគណបក្សកាន់អំណាច និងគណបក្សប្រឆាំង ។ អ្នកខ្លះបានលើកឡើងថាការស្លាប់នោះមានការរៀបចំពីគណបក្សកាន់អំណាចក្នុងខណៈលោក សម រស្ស៊ី ក៏បានចោទប្រកាន់រដ្ឋអំណាចផង ហើយអ្នកខ្លះបានចោទទៅលើគណបក្សប្រឆាំង ។
លោក ផៃ ស៊ីផាន អ្នកនាំពាក្យទីស្តីការ គណៈរដ្ឋមន្ត្រី បានលើកឡើងថាការសុំជួបចរចារបស់គណបក្សប្រឆាំង CNRP ជាមួយនឹង CPP ក្នុងគោលបំណងជជែក កុំឱ្យមានការលាបពណ៌ទៅវិញទៅមក ជុំវិញឃាតកម្មសម្លាប់លោកបណ្ឌិត កែម ឡី គឺជាបំណងចង់ការពារ នៃការចោទប្រកាន់ជាសាធារណៈតាមរយៈ Facebook របស់លោក សម រង្ស៊ី ដែលបានផ្សព្វផ្សាយកាលពីថ្ងៃទី១០ ខែកក្កដា ឆ្នាំ២០១៦កន្លងមក ។
លោក ផៃ ស៊ីផាន បានសរសេរលើបណ្តាញសង្គមហ្វេសប៊ុកនាថ្ងៃទី១៣ កក្តដាថា ការប្រឌិតបរិហារកេរ្តិ៍ ដែលលោក សម រង្ស៊ី ធ្វើឡើងមិនត្រឹមតែបំភ័ន្តមតិជាតិ និងអន្តរជាតិប៉ុណ្ណោះទេ ប៉ុន្តែគឺជាទទ្ប្ហីករសម្រាប់សម្ព័ន្ធផ្សព្វផ្សាយរបស់ពួកគេ ក្នុងការដាក់ចូលក្នុងរបាយការណ៍ ក្នុងកិច្ចចោទប្រកាន់មកលើរាជរដ្ឋាភិបាល ជាពិសេសសម្តេចតេជោ ដើម្បីផ្លូវច្បាប់តែប៉ុណ្ណោះ ។
លោកបានហៅលោក សម រង្ស៊ី ថា ជាអ្នកនយោបាយមាត់ដាច ភូតភរ ដើម្បីស្វែងរកអំណាចផ្ទាល់ខ្លួន មិនរន្ធត់ក្នុងការយកឈាមខ្មែរ ដើម្បីអំណាចផ្ទាល់ខ្លួននោះឡើយ ដែលលោកបានសរសេរថា «ការបាញ់សម្លាប់លោក កែម ឡី ថ្ងៃនេះជាអំពើភេវរកម្មមួយទៀត រៀបចំដោយរដ្ឋអំណាច» នេះជាការចោទប្រកាន់យ៉ាងធ្ងន់ធ្ងរដែលគ្មានមូលដ្ឋាន ។
លោក សម រង្ស៊ី ប្រធានគណបក្សសង្គ្រោះជាតិដែលកំពុងនិរទេសខ្លួននៅក្រៅប្រទេសបានសរសេរលើសង្គមហ្វេសប៊ុកលោកថាលោកបណ្ឌិត កែម ឡី ជាកូនខ្មែរដ៏ឆ្នើមមួយរូប ដែលបានចូលរួមយ៉ាងសកម្ម ក្នុងការទាមទារលទ្ធិប្រជាធិបតេយ្យ និងយុត្តិធម៌ ជូនប្រជារាស្ត្រខ្មែរ។ លោកមានចំណេះវិជ្ជាខ្ពង់ខ្ពស់ ហើយមានទេពកោសល្យ និងសក្តានុពលនយោបាយ គួរឲ្យកត់សម្គាល់ ។
លោកបញ្ជាក់ថា «ដោយសារតែលោក ជាគ្រោះថ្នាក់នយោបាយសម្រាប់ពួកគេម្ខាងទៀត បានជាពួកគេម្ខាងទៀតនោះ បានជួលឃាតករ ឲ្យសម្លាប់លោក កែម ឡី ដូចគេបានជួលឃាតករ កាលពីអតីតកាលថ្មីៗនេះ ឲ្យសម្លាប់លោក ជា វិជ្ជា និងលោក ឈុត វុទ្ធី ដែលជាកូនខ្មែរដ៏ឆ្នើមពីររូបទៀត ដែលបានចេញមុខការពារផលប្រយោជន៍ប្រជារាស្ត្រខ្មែរ ដូចលោកបណ្ឌិត កែម ឡី អញ្ចឹងដែរ» ។
មេបក្សប្រឆាំងបានលើកឡើងទៀតថាករណីស្លាប់លោក កែម ឡី ដូចជាការវាយប្រហារដោយគ្រាប់បែក កាលពីថ្ងៃ៣០ ខែមីនា ឆ្នាំ១៩៩៧ នៅទីក្រុងភ្នំពេញ ហើយដូចចំពោះការបាញ់សម្លាប់កណ្តាលថ្ងៃ ក្រោយមកជាបន្តបន្ទាប់ នូវអ្នកប្រឆាំងដទៃទៀត ដែលហ៊ានទិតៀនរដ្ឋាភិបាល ។ លោកបានហៅ ការបាញ់សម្លាប់លោក កែម ឡី ជាអំពើភេរវកម្មមួយទៀតរៀបចំដោយរដ្ឋអំណាច ៕
ចែករំលែកព័តមាននេះ