ថ្នាក់ដឹកនាំសហព័ន្ធ ក្រើនរំលឹកដល់កីឡាវាយសី ត្រូវពង្រឹងសមត្ថភាពបន្ថែម
- ភ្នំពេញ
រាជធានីភ្នំពេញ ៖ ក្រោយបញ្ចប់ការប្រកួតដណ្ដើមមេដាយធំមួយនៅលើទឹកដីខេត្តសៀមរាប លោកឧត្តមសេនីយ៍ លី
រាជធានីភ្នំពេញ ៖ ក្រោយបញ្ចប់ការប្រកួតដណ្ដើមមេដាយធំមួយនៅលើទឹកដីខេត្តសៀមរាប លោកឧត្តមសេនីយ៍ លី កុសល ប្រធានសហព័ន្ធកីឡាវាយសីកម្ពុជា បានកោតសរសើរពីការឈានឡើងនៃកីឡាវាយសីកម្ពុជា។
យ៉ាងណាមិញ លោកនៅតែមើលឃើញថា ការរីកចំរើនដែលបានបង្ហាញនេះ គឺនៅមានកម្រិតនៅឡើយ ដោយលោកសំណូមពរ និងក្រើនរំឭកដល់បណ្តាក្លិប សម្ព័ន្ធកីឡាវាយសីទាំងអស់ សូមបង្កើនការហ្វឹកហាត់ និងរៀនសូត្រពង្រឹងជំនាញបន្តទៀត ដើម្បីជំរុញឲ្យប្រភេទកីឡាវាយសីកាន់តែមានសក្តានុពល និងបទពិសោធន៍ល្អៗអោយកាន់តែខ្លាំង។
លោកនៅតែបន្តលើកឡើងថា សមត្ថភាពដែលកំពុងតែមាននេះ នៅមិនទាន់អាចដណ្ដើមមេដាយលើឆាកអន្តរជាតិប្រកបដោយទំនុកចិត្តនៅឡើយទេ ក្នុងពេលកម្ពុជាធ្វើជាម្ចាស់ផ្ទះស៊ីហ្គេម ដែលមានសុទ្ធតែក្រុមកីឡាករខ្លាំងៗ មកប្រជែងយកមេដាយនៅលើទឹកដីរបស់កម្ពុជានោះ។
លោកបានបន្តថា ការប្រឹងប្រែងអោយកាន់តែខ្លាំងនេះ គឺមិនមែនសម្រាប់តែកីឡាករម្នាក់ប៉ុណ្ណោះទេ ពោលគឺគ្រប់គ្នា ពោលគឺទាំងក្រុម និង រួមទាំងគ្រូបង្វឹកផង ដែលប្រាកដថា កម្ពុជាអាចមានសមត្ថភាពពេញលេញ និង អាចចូលរួមនូវគ្រប់ការប្រកួតទាំងថ្នាក់ជាតិ និងអន្តរជាតិ ជាពិសេសគឺត្រៀមលក្ខណៈ ដើម្បីដណ្តើមមេដាយមាស ក្នុងពេលកម្ពុជាធ្វើម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣ នោះតែម្ដង ដែលសហព័ន្ធនេះ មិនអាចគ្មានមេដាយក្នុងនាមជាម្ចាស់ផ្ទះ។
នេះជាការលើកឡើងរបស់ប្រធានសហព័ន្ធកីឡាវាយសីកម្ពុជា នៅក្នុងឱកាសបិទការប្រកួតកីឡាវាយសី ពានរង្វាន់៧មករា លើកទី២១ កាលពីថ្ងៃទី២៩ ខែមករា ឆ្នាំ២០២២ នៅខេត្តសៀមរាប។
លោក លី កុសល មានប្រសាសន៍ទៀតថា សហព័ន្ធតែងតែរៀបចំការប្រកួត តាមកាលវិភាគប្រចាំឆ្នាំ ទាំងក្នុង និងក្រៅប្រទេស ក្នុងគោលបំណងបង្កើនគុណភាព សមត្ថភាពកីឡាករ កីឡាការិនី និងជំរុញការហ្វឹកហាត់ឲ្យបានច្រើនជាងមុន ខណៈអាជ្ញាកណ្តាល-ចៅក្រមក៏ត្រូវបានឯកឧត្តមជំរុញឲ្យប្រកាន់ខ្ជាប់នូវការគោរពក្រមសីលធម៌ វិជ្ជាជីវៈរបស់ខ្លួនដូចគ្នាផងដែរ។
លោកប្រធានសហព័ន្ធវាយសីក៏បានលើកឡើងពីសន្ទសន៍មេដាយដាក់ជូនដល់ប្រភេទកីឡាវាយសីកម្ពុជាធ្វើយ៉ាងណាត្រូវរកមេដាយមាសឲ្យបានមួយគ្រឿងយ៉ាងតិច។ ដូច្នេះសូមទាំងអស់គ្នាប្រឹងប្រែងឡើងក្ដាប់ឱកាសនេះឲ្យជាប់ដណ្ដើមយកជ័យជម្នះឲ្យបាន ដើម្បីពីភាពខ្លាំង និងមោទនភាពជូនជាតិមាតុភូមិ សម្រាប់ជំនាញកីឡាវាយសីរបស់សហព័ន្ធយើង។
ឯកឧត្តម ទៀ សីហា អភិបាលខេត្តសៀមរាបមានប្រសាសន៍ថា នៅក្នុងរយៈពេលចុងក្រោយនេះ វិស័យកីឡានៅកម្ពុជា ក៏ដូចជាខេត្តសៀមរាបមានការរីកចម្រើនគួរឱ្យកត់សម្គាល់។ ជាមួយគ្នានេះ កីឡាវាយសីនៅខេត្តសៀមរាប ក៏ចាប់ផ្តើមមានការរីកចំម្រើនគួឱ្យកត់សម្គាល់ ស្របពេលដែលខេត្តសៀមរាប បានទទួលសមិទ្ធផលថ្មី គឺក្លឹបកីឡាវាយសី ដែលមានលក្ខណៈស្តង់ដាអន្តរជាតិ។ ឯកឧត្តមបន្តថា កីឡាបានក្លាយជាយុទ្ធសាស្ត្រថ្មីមួយនៅក្នុងតំបន់អាស៊ាន ដែលត្រូវជំរុញឱ្យមានយកចិត្តទុកដាក់ ពីព្រោះទេសចរណ៍កីឡា គឺជាទីផ្សារថ្មីមួយ សម្រាប់ទាក់ទាញភ្ញៀវទេសចរបរទេសឱ្យចូលមកទស្សនាកម្ពុជា ក៏ដូចជាខេត្តសៀមរាប កាន់តែច្រើនឡើងថែមទៀត។
លោកឧត្តមសេនីយ៍ទោ ជាម សុភា អគ្គលេខាធិការ សហព័ន្ធកីឡាវាយសីគូសបញ្ជាក់ថា ព្រឹត្តិការណ៍វាយសីពានរង្វាន់៧មករា ឆ្នាំ២០២២នេះមានការចូលរួមពីសម្ព័ន្វកីឡាវាយសីចំនួន១៨ និងកីឡាករ កីឡាការីជិត២០០នាក់មកពីបណ្តារាជធានី-ខេត្ត ដោយប្រកួតលើ៧វិញ្ញាសា។ ជាលទ្ធផល គឺម្ចាស់ផ្ទះ ក្លិបកីឡាវាយសី SBC ខេត្តសៀមរាបដណ្តើមបានមេដាយមាសច្រើនជាងគេ៕
ចែករំលែកព័តមាននេះ