បាក់ពិដានធ្លាក់លើកម្មការនី រងរបួសធ្ងន់៣នាក់
ខេត្តកំពង់ឆ្នាំង ៖ ពិដានធ្វើពីម្នាងសិលា នៅក្នុងអាគារA របស់រោងចក្រកាត់ដេរ MV បានបាក់ធ្លាក់ត្រូវក្បាលកម្មការនីចំនួន៣នាក់បានរងរបួស ហើយត្រូវបានដឹកយកមក
ខេត្តកំពង់ឆ្នាំង ៖ ពិដានធ្វើពីម្នាងសិលា នៅក្នុងអាគារA របស់រោងចក្រកាត់ដេរ MV បានបាក់ធ្លាក់ត្រូវក្បាលកម្មការនីចំនួន៣នាក់បានរងរបួស ហើយត្រូវបានដឹកយកមកសង្គ្រោះនៅមន្ទីរពេទ្យខេត្តជាបន្ទាន់។ ហេតុការណ៍នេះបានកើតឡើងនៅក្នុងរោងចក្រកាត់ដេរ MV វេលាម៉ោង៧និង៣៥នាទីព្រឹក ថ្ងៃទី១២ ខែកក្កដា ឆ្នាំ២០១៦ ស្ថិតក្នុងភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង។
ក្រុមគ្រួសារនារីរងគ្រោះបានអោយដឹងថា ជនរងគ្រោះទាំងបីនាក់មាន១.ឈ្មោះ វ៉ាន់ ស្រីតូច អាយុ២៥ឆ្នាំ រស់នៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង បានរងរបួសចំក្បាលសន្លប់ជាង៣ម៉ោង ទើបដឹងខ្លួននៅក្នុងមន្ទីរពេទ្យ ២.ឈ្មោះ ស៊ឹម ស្រីស្រស់ អាយុ២៧ឆ្នាំ មានផ្ទៃពោះ៦ខែ រស់នៅក្នុង ភូមិ ត្រពាំងចឹក្សា សង្កាត់កំពង់ឆ្នាំង បានរងរបួសធ្ងន់ត្រង់ស្មាក្បែរកញ្ចឹងករផ្នែកខាងក្រោយ និងទី៣.ឈ្មោះ រ៉ែន ភិរម្យ អាយុ២១ឆ្នាំ រស់នៅភូមិសាលាឃុំ ឃុំពពេល ស្រុកបរិបូណ៌ រងរបួសក្បាលធ្ងន់ ។
ប្រភពពីកម្មការនីដែលធ្វើការជាមួយគ្នាបានឲ្យដឹងថា មុនពេលកើតហេតុពួកនាងកំពុងធ្វើការ នៅក្នុងអាគារA ជាអាគារត្រួតពិនិត្យសំលៀកបំពាក់ក្រោយនៃការកាត់ដេរ ខណៈនោះស្រាប់តែពិដានម្នាងសិលា៤ទៅ៥ផ្ទាំង មានទំហំប្រមាណកន្លះម៉ែត្រ៤ជ្រុងបានធ្លាក់មកចំក្បាលពួកនាង បណ្តាលឲ្យពួកនាងទាំង៣នាក់រងរបួសធ្ងន់ ក្នុងនោះមានម្នាក់បានសន្លប់ជាច្រើនម៉ោង។ ក្រោយពេលកើតហេតុ ត្រូវបានក្រុមហ៊ុនដឹកបញ្ជូនពួកនាងមកសង្គ្រោះព្យាបាលនៅមន្ទីរពេទ្យខេត្តកំពង់ឆ្នាំង។
ក្រុមគ្រួសារអាណាព្យាបាល សំណូមពរដល់ប្រធានក្រុមហ៊ុនរោងចក្រ MV ជួយព្យាបាលរបួសពួកនាងឲ្យជាសះស្បើយឡើងវិញ និងសំណូមពរកុំឲ្យកាត់ប្រាក់ខែពួកនាងក្នុងរយៈពេលដែល កំពុងសម្រាកព្យាបាលនៅមន្ទីរពេទ្យខេត្ត។ នៅវេលាម៉ោង១០និង៣០នាទីព្រឹកថ្ងៃទី១២ ខែកក្កដានេះ គេឃើញតំណាងក្រុមហ៊ុនជនជាតិចិនបានចុះទៅសួរសុខទុក្ខជនរងគ្រោះទាំង៣នាក់ផងដែរនៅក្នុងមន្ទីរពេទ្យខេត្ត។
ដោយឡែកជនជាតិខ្មែរម្នាក់ជាប្រធានធនធានមនុស្សក្នុងរោងចក្របានអោយដឹងថា ករណីគ្រោះថ្នាក់នេះ បណ្តាលមកពីដាច់ខ្សែលួស ទើបពិដាន៤ទៅ៥ផ្ទាំងនេះ ធ្លាក់ចំបងប្អូនកម្មករទាំង៣នាក់។ ក្នុងករណីនេះ ខាងក្រុមហ៊ុននឹងជួយដោះស្រាយថ្លៃព្យាបាលរហូតដល់ជាសះស្បើយ និងមិនកាត់ប្រាក់ខែពួកគាត់ដែរ ព្រោះនេះជាគ្រោះថ្នាក់ក្នុងពេលធ្វើការងារ។ រីឯពិដាននៅក្នុងអាគារនេះ និងអាគារដទៃទៀតក្រុមហ៊ុននឹងពិនិត្យមើល ព្រមទាំងដោះដូរឡើងវិញ ដើម្បីកុំឲ្យមានគ្រោះថ្នាក់បែបនេះកើតឡើងទៀត៕
ចែករំលែកព័តមាននេះ