ឯកឧត្តម ខៀវ កាញារីទ្ធ ស្វាគមន៍ឱ្យមានការសហការគ្នារវាងសារព័ត៌មានកោះសន្តិភាព ទូរទស្សន៍ជាតិកម្ពុជា និងទីភ្នាក់ងារព័ត៌មាន AKP
- ភ្នំពេញ
រាជធានីភ្នំពេញ ៖ នៅទីស្តីការក្រសួងនាព្រឹកថ្ងៃទី ២៨ ខែមករា ឆ្នាំ ២០២២ នេះ ឯកឧត្តម ខៀវ…
រាជធានីភ្នំពេញ ៖ នៅទីស្តីការក្រសួងនាព្រឹកថ្ងៃទី ២៨ ខែមករា ឆ្នាំ ២០២២ នេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអនុញ្ញាតឱ្យលោកស្រី ថុង សុវណ្ណរង្សី ប្រធានក្រុមហ៊ុនសារព័ត៌មាន «កោះសន្តិភាព» ចូលជួបសម្តែងការគួរសម និងពិភាក្សាស្តីពីកិច្ចសហប្រតិបត្តិការផ្លាស់ប្តូរព័ត៌មានរវាងសារព័ត៌មាន កោះសន្តិភាព ជាមួយទូរទស្សន៍ជាតិកម្ពុជា និងទីភ្នាក់ងារព័ត៌មាន AKP ។
នៅក្នុងឱកាសនៃការសម្តែងការគួរសមនេះលោកស្រី ថុង សុវណ្ណរង្សី បានជម្រាបជូនឯកឧត្តមរដ្ឋមន្ត្រីថា ខណៈពេលដែលកម្ពុជាធ្វើជាប្រធានអាស៊ាននៅឆ្នាំ ២០២២ នេះ សារព័ត៌មាន កោះសន្តិភាព មានគោលបំណងធ្វើការផ្សព្វផ្សាយព័ត៌មានអំពីអាស៊ាន និងតួនាទីរបស់កម្ពុជា ជាប្រធាន ដើម្បីជាការយល់ដឹងដល់សធារណជន ។ ដូច្នេះសារព័ត៌មាន កោះសន្តិភាព យល់ឃើញថា វាពិតជាមានសារសំខាន់ណាស់ ដែលសារព័ត៌មាន កោះសន្តិភាព ត្រូវមានកិច្ចសហប្រតិបត្តិការជាមួយ ទូរទស្សន៍ជាតិកម្ពុជា និងទីភ្នាក់ងារព័ត៌មាន AKP ដើម្បីធ្វើការផ្សព្វផ្សាយឱ្យបានទូលំទូលាយអំពីអាស៊ាន និងសកម្មភាពនានារបស់រាជរដ្ឋាភិបាលកម្ពុជា ក្នុងនាមជាប្រធានអាស៊ាន ឆ្នាំ ២០២២ នេះ ។
ឯកឧត្តម ខៀវ កាញារីទ្ធ បានកោតសរសើរចំពោះសារព័ត៌មាន «កោះសន្តិភាព» ដែលវិវត្តន៍ខ្លួនបានលឿនតាមបែបឌីជីថល និងរក្សាខ្លួនលើវិស័យសារព័ត៌មានយ៉ាងរឹងមាំល្អរហូតមកដល់សព្វថ្ងៃនេះ ។ ជាការឆ្លើយតបឯកឧត្តមក៏បានស្វាគមន៍ និងបើកទូលាយឱ្យមានការសហការគ្នារវាងសារព័ត៌មាន កោះសន្តិភាព ទូរទស្សន៍ជាតិកម្ពុជា និងទីភ្នាក់ងារព័ត៌មាន AKP នេះផងដែរ ៕
ចែករំលែកព័តមាននេះ