មហិច្ឆតាខ្ពស់ណាស់! កីឡាវ៉ូវីណាម ប្ដេជ្ញាដណ្ដើមមេដាយមាស៩គ្រឿង នៅឆ្នាំ២០២៣
- ភ្នំពេញ
រាជធានីភ្នំពេញ ៖ មិនមែនគ្រាន់តែប្រកាសនោះទេ តែឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បានបង្ហាញពីការ
រាជធានីភ្នំពេញ ៖ មិនមែនគ្រាន់តែប្រកាសនោះទេ តែឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បានបង្ហាញពីការ
រាជធានីភ្នំពេញ ៖ មិនមែនគ្រាន់តែប្រកាសនោះទេ តែឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បានបង្ហាញពីការត្រៀមខ្លួនយ៉ាងច្បាស់លាស់ ពីការប្ដេជ្ញាចិត្តរបស់សហព័ន្ធនេះ ថានឹងដណ្ដើមអោយបានមេដាយមាសរហូតដល់៩គ្រឿង នៅក្នុងព្រឹត្តិការណ៍ស៊ីហ្គេម ដែលកម្ពុជាធ្វើជាម្ចាស់ផ្ទះនៅឆ្នាំ២០២៣។
ក្នុងការជំរុញផែនការដណ្ដើមមេដាយមាសអោយបាន៩គ្រឿងនេះ ឯកឧត្តមបានបន្តថា សហព័ន្ធបានបង្កើននូវការហ្វឹកហាត់យ៉ាងយកចិត្តទុក ដោយតម្រូវអោយកីឡាករកីឡាការិនីបង្កើនសមត្ថភាពលើគ្រប់វិញ្ញាសារ ដើម្បីសម្រេចអោយបានការដណ្ដើមមេដាយមាសអោយបាន៩គ្រឿង នៅក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ក្នុងនាមជាម្ចាស់ផ្ទះ។ ការលើកឡើងរបស់ប្រមុខសហព័ន្ធខាងលើ មិនត្រឹមតែបានធ្វើឡើងក្នុងពិធីបិទការប្រកួតកីឡាវ៉ូវីណាម ជ្រើសរើសជើងឯកថ្នាក់ជាតិ ប្រចាំឆ្នាំ២០២១ នៅទីលាននៃសាកលវិទ្យាល័យភូមិន្ទភ្នំពេញ នាពេលកន្លងមកកាលពីល្ងាចថ្ងៃទី២៦ ខែមករា ឆ្នាំ២០២២ តែប៉ុណ្ណោះទេ តែក៏បន្តប្រកាសជំហរដដែលនេះ នៅក្នុងជំនួបផ្សេងៗ ជាមួយកីឡាករផងដែរ។
រំលឹកដល់ការប្រកាសដាក់ក្បាលមេក្រូ ក្រោមអធិបតីភាពឯកឧត្តម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) នាគ្រានោះ ឯកឧត្តម អ៊ូ រតនា បញ្ជាក់ថា ក្រៅពីការហ្វឹកហាត់ ការប្រកួតពិតជាមានសារសំខាន់ណាស់ សម្រាប់កីឡាករ-កីឡាការិនី ដើម្បីអភិវឌ្ឍន៍ និងបង្កើនសមត្ថភាពកីឡាករ-កីឡាការិនី រួមទាំងចៅក្រម-អាជ្ញាកណ្ដាលផងដែរ។ តាមរយៈនេះ សហព័ន្ធនឹងស្វះស្វែងរកលទ្ធភាព និងកៀគរការឧបត្ថម្ភគាំទ្រពីសំណាក់ដៃគូពាក់ព័ន្ធ ដើម្បីបង្កើនព្រឹត្តិការណ៍ប្រកួតឲ្យបានច្រើន ឆ្ពោះទៅរកមេដាយលើឆាកអន្ដរជាតិ ជូនប្រទេសជាតិ។
ឯកឧត្តមបន្ដថា សហព័ន្ធកំពុងខិតខំអភិវឌ្ឍធនធានកីឡាករ-កីឡាការិនី គ្រប់ឈុត សម្រាប់ត្រៀមស៊ីហ្គេម ទាំងជម្រើសជាតិថ្នាល រហូតដល់ក្រុមធំ និងតាមបណ្ដាសមាគម/ក្លិប គ្រប់រាជធានី-ខេត្ត ដើម្បីត្រៀមលក្ខណៈចូលរួមការប្រកួតនានា ទាំងថ្នាក់ជាតិ និងអន្ដរជាតិ ក្រោមពាក្យស្លោក «កម្ពុជាឆ្ពោះទៅដណ្ដើមមេដាយមាសកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ និងប្រជាជនម្នាក់ លេងកីឡាមួយយ៉ាងតិចប្រចាំជីវិត»។
ឯកឧត្តមប្រធានសហព័ន្ធ បានធ្វើការតាំងចិត្ត និងប្ដេជ្ញាចិត្តថា «ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ទើបប្រទេសកម្ពុជា បានទទួលសិទ្ធិធ្វើម្ចាស់ផ្ទះកីឡាស៊ីហ្គេម លើកទី៣២ ជាប្រវត្តិសាស្ដ្រ។ ដូច្នេះ មន្ដ្រី គ្រូបង្វឹក កីឡាករ-កីឡាការិនី នៃសហព័ន្ធកីឡាវ៉ូវីណាមកម្ពុជា បានរួមគ្នាប្ដេជ្ញានឹងស្វែងរកមេដាយមាសជូនជាតិឲ្យបាន ៩គ្រឿង ក្នុងព្រឹត្តិការណ៍ស៊ីហ្គេម លើកទី៣២ នៅកម្ពុជា»។
ទន្ទឹមជាមួយគ្នា ឯកឧត្តម វ៉ាត់ ចំរើន បានធ្វើការវាយតម្លៃខ្ពស់ ចំពោះកិច្ចខិតខំប្រឹងប្រែងរបស់សហព័ន្ធ រួមទាំងការកៀគរការឧបត្ថម្ភគាំទ្រពីវិស័យឯកជននានា។ ឯកឧត្តមថា ការតាំងចិត្តរបស់សហព័ន្ធ គឺជាអ្វីដែលបង្ហាញពីការត្រៀមខ្លួន ដើម្បីសម្រេចអោយបាននូវមហិច្ឆតា ក្នុងការដណ្ដើមមេដាយ ដើម្បីអោយសមនឹងការពុះពាររបស់កម្ពុជាដែលទទួលធ្វើជាម្ចាស់ផ្ទះស៊ីហ្គេម។ ឯកឧត្តមថា គណៈកម្មាធិការជាតិ CAMSOC ក៏កំពុងរង់ចាំ និងការឧបត្ថម្ភគាំទ្រនូវគ្រូបង្វឹកកម្រិតខ្ពស់មកពីសហព័ន្ធកីឡាវ៉ូវីណាមពិភពលោក សម្រាប់ជួយពង្រឹងការងារហ្វឹកហាត់របស់ក្រុមជម្រើសជាតិកីឡាវ៉ូវីណាមកម្ពុជា ដើម្បីឆ្ពោះទៅសម្រេចគោលដៅនាស៊ីហ្គេម ឆ្នាំ២០២៣ ផងដែរ។
ឯកឧត្តមបានគូសបញ្ជាក់ នាគ្រានោះថា «គ្រូបង្វឹកល្អ គឺជាថ្នាក់ដឹកនាំដ៏ល្អ ដែលនាំផ្លូវកីឡាករទៅរកជ័យលាភី។ អ៊ីចឹងយើងបានសម្រេចឆ្ពោះទៅរកកំពូលគ្រូរបស់សហព័ន្ធកីឡាវ៉ូវីណាមពិភពលោក និងត្រៀមមកក្នុងពេលឆាប់ៗ ហើយយើងក៏ត្រៀមខ្លួនធ្វើម្ចាស់ផ្ទះការប្រកួតជើងឯកអាស៊ីអាគ្នេយ៍ផងដែរ ដែលការប្រកួត Pre-Sea Games នេះ គ្រោងរៀបចំនាដើមឆ្នាំ២០២៣ ដើម្បីបញ្ជាក់ច្បាស់ថា តើគោលដៅ ៩មេដាយមាសបាន ឬក៏អត់?»។
បែបននេះក្ដី ឯកឧត្តម វ៉ាត់ ចំរើន នៅតែកោតសរសើរ និងចាត់ទុកកីឡាវ៉ូវីណាម គឺជាកីឡាដ៏មានសក្ដានុពលមួយ សម្រាប់ត្រៀមស៊ីហ្គេម លើកទី៣១ នៅវៀតណាម នាខែឧសភា ឆ្នាំ២០២២ ក៏ដូចជាដំណើរឆ្ពោះទៅស៊ីហ្គេម ឆ្នាំ២០២៣ នៅកម្ពុជា បន្ទាប់ពីសហព័ន្ធរៀបចំបានល្អ ក្នុងការប្រកួតជើងឯកថ្នាក់ជាតិ ពិសេសការកាត់សេចក្ដីរបស់អាជ្ញាកណ្ដាល-ចៅក្រម។ ត្រង់ចំណុចនេះ ឯកឧត្តមសង្ឃឹមថា កីឡាវ៉ូវីណាម នឹងក្លាយជាកីឡាដ៏មានប្រជាប្រិយភាពរបស់ប្រទេសកម្ពុជា នាស៊ីហ្គេម ឆ្នាំ២០២៣។
គួរបញ្ជាក់ផងដែរ ទន្ទឹមនឹងការបង្ហាញនូវការតាំងចិត្ត គេឃើញលទ្ធផលប្រកួតវ៉ូវីណាមថ្នាក់ជាតិមុននេះ ជម្រើសបាននូវកីឡាករកីឡាការិនីល្អៗជាច្រើនរូប អោយក្លាយជាធនធាន។ សម្រាប់ការប្រកួតជើងឯកថ្នាក់ជាតិ ប្រចាំឆ្នាំ២០២១ មុននេះ គឺបានដំណើរ ចាប់ពីថ្ងៃទី២៤-២៦ ខែមករា ឆ្នាំ២០២២ ដោយក្នុងការប្រកួតនោះ ក៏បានបង្ហាញនូវប្រតិភូ គ្រូបង្វឹក និងកីឡាករ-កីឡាការិនី ដែលពោរពេញដោយសមត្ថភាពខ្ពស់ រហូត៨៦នាក់ មកពី ៩សមាគម/ក្លិប និងក្រសួង ខណៈដែលក្លិបក្រសួងការពារជាតិ ដណ្ដើមបានមេដាយច្រើនជាងគេសរុបរហូតដល់១០គ្រឿង (មាស ៦, ប្រាក់ ១ និងសំរឹទ្ធ៣) ។
ក្រសួងមហាផ្ទៃ ឈរលេខ២ ដណ្ដើមបានមេដាយសរុប ៦គ្រឿង (មាស ៣ ប្រាក់ ១ និងសំរឹទ្ធ ២) និងខេត្តសៀមរាប ឈរលេខ៣ ដណ្ដើមបានមេដាយសរុប ៧គ្រឿង (មាស ២ ប្រាក់ ៣ និងសំរឹទ្ធ ២)៕
ចែករំលែកព័តមាននេះ