រាជធានីភ្នំពេញ ៖ បុរសម្នាក់ស្រវឹងស្រាជោគ បើករថយន្តបុករះម៉ូតូ៣គ្រឿង មិនព្រមឈប់ ហើយព្យាយាមបើករត់ ធ្វើឲ្យប្រជាពលរដ្ឋទប់កំហឹងលែងបាន នាំគ្នាយកដុំថ្ម និង ជ្រុញ ព្រមទាំងដំបងគប់ហោះចូលក្នុងរថយន្ត
រាជធានីភ្នំពេញ ៖ បុរសម្នាក់ស្រវឹងស្រាជោគ បើករថយន្តបុករះម៉ូតូ៣គ្រឿង មិនព្រមឈប់ ហើយព្យាយាមបើករត់ ធ្វើឲ្យប្រជាពលរដ្ឋទប់កំហឹងលែងបាន នាំគ្នាយកដុំថ្ម និង ជ្រុញ ព្រមទាំងដំបងគប់ហោះចូលក្នុងរថយន្ត បណ្តាលឲ្យបែកមុខអ្នកបើកបររងរបួសធ្ងន់ បង្កឲ្យមានការភ្ញាក់ផ្អើលកាលពីវេលាម៉ោង៩ និង១០នាទីយប់ ថ្ងៃទី១១ ខែកក្កដា ឆ្នាំ២០១៦ នៅតាមបណ្តោយផ្លូវលេខ១៩៨៦ មុខសាកលវិទ្យាល័យ និង មន្ទីរពេទ្យសែនសុខ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
តាមប្រភពពីអ្នកឃើញហេតុការណ៍នេះបានឲ្យដឹងថា មុនពេលកើតហេតុ មានបុរសស្រវឹងស្រាជោគជាំម្នាក់បើករថយន្តម៉ាក TOYOTA PRADO ពណ៌សំបកឪឡឹក ពាក់ស្លាកលេខ ភ្នំពេញ 2I-8897 តាមបណ្តាលផ្លូវលេខ១៩៨៦ ទិសដៅពីលិចទៅកើត ដោយរេពេញផ្លូវ លុះមកដល់មុខសាលកវិទ្យាល័យ និង មន្ទីរពេទ្យសែនសុខ រថយន្តបានទៅបុកពីក្រោយម៉ូតូវីវ៉ា ពណ៌ខៀវ ពាក់ស្លាកលេខ កំពង់ចាម 1B-8717 ជិះស្របទិសគ្នាដោយ២នាក់ប្តីប្រពន្ធ បណ្តាលឲ្យដួលរងរបួសស្រាល ប៉ុន្តែដោយសារតែអ្នកបើកបរស្រវឹងមិនដឹងថា ខ្លួនបើករថយន្តទៅបុកគេ ទើបបន្តដំណើរទៅមុខទៀត រហូតដល់មុខភោជនីយដ្ឋាន តាយតាយ ក៏ទៅបុកពីក្រោយម៉ូតូស្មាស់ រីវ៉ូ ពណ៌ខ្មៅ ពាក់ស្លាកលេខ ភ្នំពេញ 1AD-0930 មួយគ្រឿងទៀត ជារបស់អ្នកគ្រូភាសាម្នាក់ ខ្ទាតមនុស្សចេញរងរបួសស្រាលទៀត តែមិនបានឈប់ ក៏បន្តដំណើរទាំងមានម៉ូតូរបស់អ្នកគ្រូភាសាបានជាប់នៅក្រោមរថយន្តអូសតាមផ្លូវបែកផ្កាភ្លើងព្រាត ខណៈពេលដែលបើករត់បានជ្រុលទៅបុកម៉ូតូ១គ្រឿងទៀតម៉ាកវ៉េវ ពណ៌ខ្មៅ ជាម៉ូតូរបស់អ្នករត់ឌុបម្នាក់ដែលអង្គុយចាំម៉ូយនៅមុខខារ៉ាអូខេ និងសណ្ឋាគារ ហេវិន រងការខូតខាត សំណាងមនុស្សលោតចេញទាន់ រងរបួសស្រាល ។
ប្រភពព័ត៌មានបន្តទៀតថា បន្ទាប់ពីអ្នកបើកបរស្រវឹងបើករថយន្តបុកម៉ូតូ៣គ្រឿងបន្តបន្ទាប់គ្នាហើយនៅតែមិនព្រមឈប់ដោះស្រាយ ហើយព្យាយាមបើករត់រហូតដល់ចំណុចស្តុបផ្លូវលេខ៥៩៨ កែងផ្លូវលេខ១៩៨៦ទើបរថយន្តទៅមុខលែងរួច ក៏ត្រូវប្រជាពលរដ្ឋជាច្រើននាក់ដែលឃើញហេតុការណ៍ មានចិត្តខឹងសម្បារបាននាំគ្នាយកដុំថ្ម ជ្រុញ ដំបង មកវាយ និង គប់កម្ទេចរថយន្ត ព្រមគប់ទៅលើបុរសអ្នកបើកបររថយន្ត បណ្តាលបែកកញ្ចក់ហោះទៅត្រូវអ្នកបើករថយន្តបែកមុខបែកមាត់ រងរបួសធ្ងន់ ។
ក្រោយពេលកើតហេតុ សមត្ថកិច្ចបានទៅជួយអន្តរាគមន៍ទាន់ពេលវេលា និងបានទាក់ទងទៅជំនាញចរាចរណ៍ក្រុងមកស្ទួចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ព្រមទាំងនាំអ្នកបើកបររថយន្តទៅជាមួយ ដើម្បីធ្វើការដោះស្រាយតាមនិតិវិធីច្បាប់ ៕
ចែករំលែកព័តមាននេះ