ខេត្តបន្ទាយមានជ័យ៖ ស្ត្រី២នាក់ម្តាយកូននៃគ្រួសារមួយបានអំពាវសុំឲ្យថ្នាក់ដឹកនាំ ពិសេសរាជរដ្ឋាភិបាលមេត្តាជួយពួកគាត់ផង ព្រោះប្តីជាអតីតយោធិនពិការ មិនដែលទទួលបានប្រាក់បៀវត្សរ៍ទេ ក្រោយធ្លាក់ខ្លួនពិការដោយសារសង្រ្គាម មិនតែប៉ុណ្ណោះ រស់នៅទាំងវេទនា សូម្បីផ្ទះនិងដីក៏គ្មាន ខណៈបុរសជាប្តីបានស្លា.ប់ចោលទៀត…
ខេត្តបន្ទាយមានជ័យ៖ ស្ត្រី២នាក់ម្តាយកូននៃគ្រួសារមួយបានអំពាវសុំឲ្យថ្នាក់ដឹកនាំ ពិសេសរាជរដ្ឋាភិបាលមេត្តាជួយពួកគាត់ផង ព្រោះប្តីជាអតីតយោធិនពិការ មិនដែលទទួលបានប្រាក់បៀវត្សរ៍ទេ ក្រោយធ្លាក់ខ្លួនពិការដោយសារសង្រ្គាម មិនតែប៉ុណ្ណោះ រស់នៅទាំងវេទនា សូម្បីផ្ទះនិងដីក៏គ្មាន ខណៈបុរសជាប្តីបានស្លា.ប់ចោលទៀត ។
គ្រួសារមួយនេះ ស្ត្រីជាម្តាយឈ្មោះគី គឹមសៀន អាយុ៥៧ឆ្នាំ និងកូនស្រីអាយុ១៩ឆ្នាំ បច្ចុប្បន្នរស់នៅក្នុងសង្កាត់ និងក្រុងប៉ោយប៉ែត។ ស្ត្រីជាម្តាយបានរៀបរាប់ថា ប្តីរបស់គាត់ឈ្មោះម៉ោញ តាំង អាយុ៥៨ឆ្នាំ អតីតជាយោធាកងពលលេខ១២ បច្ចុប្បន្នកងពលតូចថ្មើជើងលេខ៥១ មានឋានន្តរស័ក្តិអនុសេនីយ៍ទោ។
គាត់បន្តថា ប្តីគាត់បានចូលធ្វើយោធាតាំងពីឆ្នាំ១៩៨៣ ហើយនៅឆ្នាំ១៩៩៦ ប្តីគាត់បានជួបគ្រោះអកុសលជាន់មីនរបួសដាច់ជើងខាងឆ្វេងនៅសមរភូមិចំណុចបឹងប្រម៉ា ក្នុងភូមិសន្តិភាព ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។ ស្ត្រីខាងលើបន្តថាក្រោយជួបគ្រោះថ្នាក់ពីឆ្នាំ១៩៩៦ដល់១៩៩៨ ប្តីគាត់ក៏ធ្លាក់ខ្លួនឈឺធ្ងន់ធ្វើឲ្យគ្រួសារជួបកាលំបាកទាំងថវិកាមើលថៃជំងឺ និងជីវភាព។
នៅឆ្នាំ២០១០ ក្រោយជំងឺបានធូរស្រាល ប្តីគាត់បានវិលទៅអង្គភាពវិញ ដើម្បីសុំបើកប្រាក់បៀវត្សរ៍ បែរជាគេប្រាប់ថា ឈ្មោះយោធារបស់គាត់គេលក់ឲ្យអ្នកផ្សេងហើយ ។ ស្ត្រីរូបនេះបន្តថា ប្តីគាត់បានស្លា.ប់ថ្ងៃទី២៨ ខែតុលា ឆ្នាំ២០២០ ក្នុងមន្ទីរពេទ្យមិត្តភាពកម្ពុជាជប៉ុនមង្គលបូរី ។ ស្រ្តីខាងលើបញ្ជាក់ថា ប្តីគាត់មុនស្លា.ប់បានស្វះស្វែងរកកាអន្តរាគមន៍សុំប្រាក់បៀវត្សរ៍ឡើងវិញ ដោយដាក់ពាក្យស្នើសុំតាំងពីថ្នាក់មូលដ្ឋាន រហូតដល់មន្ទីរសង្គមកិច្ចអតីតយុទ្ធជន និងយុវនិតិសម្បទាខេត្តប៉ុន្តែមកទល់ពេលនេះគ្មានបានលទ្ធផលអ្វីបន្តិចឡើយ។
ស្ត្រី២នាក់ម្តាយកូនបានអំពាវនាវសុំថ្នាក់ដឹកនាំមេត្តាជួយគ្រួសារ ពួកគាត់ឲ្យបានទទួលប្រាក់បៀវត្សរ៍ប្តីនិងឪពុកពួកគាត់ដែលបាត់បង់ជាច្រើនឆ្នាំ យកមកដោះស្រាយជីវភាពគ្រួសាផង ព្រោះបច្ចុប្បន្នដីនិងផ្ទះក៏គ្មាននៅ ហើយរស់អាស្រ័យលើអ្នកស្រុកជួយតែប៉ុណ្ណោះ។
ជុំវិញករណីនេះ លោកណុប ចាន់ថុល ប្រធានការិយាល័យរដ្ឋបាលនៃមន្ទីរសង្គមកិច្ចអតីតៈយុទ្ធជន និងយុវនិតិសម្បទាខេត្តបន្ទាយមានជ័យប្រាប់កោះសន្តិភាពតាមទូរស័ព្ទថា កន្លងមក ឈ្មោះម៉ោញ តាំង ជាយោធិនពិការខាងលើ បានដាក់សំណើរកកិច្ចអន្តរាគមន៍ស្នើសុំបើកប្រាក់បៀវត្សរ៍យោធិនពិការពីមូលដ្ឋានរហូតដល់ខេត្តមែន ។ មន្ត្រីរូបនេះប្រាប់ថា បញ្ហានេះអង្គភាពលោកបានយកចិត្តទុកដាក់ជួយបញ្ជាក់ពីភាពពិការនិងជួយសាហ៊ុយគាត់ចុះឡើងនាពេលកន្លងមកណាស់ដែរ។
មន្ត្រីដដែលបន្តថា មែនទែនទៅ គាត់អត់មានរបបគោលនយោបាយនៅមន្ទីរសង្គមកិច្ចខេត្តបន្ទាយមានជ័យទេ ហើយតាមសាកសួរយោធារូបនេះ ក្រោយគាត់ពិការបានទៅព្យាបាលនៅទីក្រុងភ្នំពេញ និងបន្ទាប់មក បានទៅរស់នៅឯស្រុកំណើត។លោកថា ករណីនេះបើសិនក្រោយគាត់ពិការក្រសួងការពារជាតិ,ក្រសួងមហាផ្ទៃ ដែលជាអង្គភាពដើមរបស់គាត់ផ្ទេរឈ្មោះគាត់ឲ្យមន្ត្រីអនុវត្តន៍នៅខេត្តបន្តទើបអាចជួយបានហើយថា បើអត់មានឯកសាអីចឹងខាងលោកមិនអាចសុំបើកថវិកាពីក្រសួងសេដ្ឋកិច្ច និងហិរញ្ញវត្ថុជូនគាត់បានទេ។
ជុំវិញករណីនេះទៀត កោះសន្តិភាពមិនអាចទំនាក់ទំនងទៅអង្គភាពដើមរបស់យោធិនពលីខាងលើ ដើម្បីសុំបំភ្លឺបានទេ ព្រោះមិនស្គាល់លេខទូរស័ព្ទ ។
ព័ត៌មានបន្ថែមនឹងមានផ្សាយជូនបន្តលើកាសែតកោះសន្តិភាព ។
ចែករំលែកព័តមាននេះ