អតីសិស្សឆ្នាំ១៩៩៣ដល់១៩៩៥ ប្រារព្ធពិធីរំលឹកគុណគ្រូ
ខេត្តកំពង់ចាម ៖ អតីតសិស្សដែលធ្លាប់បានសិក្សានៅវិទ្យាល័យព្រះសីហនុ ក្រុងកំពង់ចាមឆ្នាំសិក្សា១៩៩៣-៩៤ និង១៩៩៤-៩៥ បានរៃអង្គាសប្រមូលថវិកាមកពី
ខេត្តកំពង់ចាម ៖ អតីតសិស្សដែលធ្លាប់បានសិក្សានៅវិទ្យាល័យព្រះសីហនុ ក្រុងកំពង់ចាមឆ្នាំសិក្សា១៩៩៣-៩៤ និង១៩៩៤-៩៥ បានរៃអង្គាសប្រមូលថវិកាមកពីគ្របទិសទីរួមទាំងអ្នករស់សហរដ្ឋអាមេរិកផងបានប្រមាណជិត១ម៉ឺនដុល្លារមករៀបចំពិធីរំលឹកគុណគ្រូ។ ហើយសម្រាប់ថវិកាដែលនៅសល់បានជួលជាងឲ្យធ្វើតុ២០និងកៅអីឈើ២០ មកជូនលោកនាយកវិទ្យាល័យ នារសៀលថ្ងៃទី៩ ខែកក្កដា ឆ្នាំ២០១៦ ដែលកំពុងតែជួបនឹងកង្វះខាតសម្រាប់គ្រូៗអង្គុយបង្រៀនសិស្ស។
លោក ឃុន សំឡូត តំណាងឲ្យអតីសិស្សនៅវិទ្យាល័យព្រះសីហនុ ជំនាន់ខាងលើប្រាប់ឲ្យដឹងថា នៅថ្ងៃនេះរូបលោក និងអ្នកផ្សេងៗទៀតជាច្រើននាក់ ពិតមានក្តីរំភើបសប្បាយរីករាយ ដោយបានចូលរួមយកតុ និងកៅអីមកជូនដល់លោកគ្រូអ្នកគ្រូ សម្រាប់អង្គុយបង្រៀនសិស្ស ហើយថវិកាដែលបានមកនេះគឺមានការចូលរួមបរិច្ចាកដោយស្ម័គ្រចិត្ត ពីមិត្តភក្តិរួមទាំង២ជំនាន់ មានអ្នកខ្លះនៅក្នុងស្រុក និងខ្លះទៀតនៅឯនាយសមុទ្រឯណោះ។
លោក ឃុន សំឡូត តំណាងអតីតសិស្សបានរំលឹកឲ្យដឹងថា កាលពីថ្ងៃទី២៤ ខែមករា ឆ្នាំ២០១៦ មិត្តភក្ដិជាង១០០នាក់បាននាំគ្នារៀបចំពិធីរំលឹកគុណគ្រូ ដោយបានអញ្ចើញលោកគ្រូអ្នកគ្រូដែលចូលនិវត្តន៍ចំនួន៣០នាក់ អញ្ជើញចូលរួមកម្មវិធី និងចែកអំណោយដល់ពួកគាត់ ដែលបានជួយបង្ហាត់បង្រៀនផ្តល់ចំណេះដឹងដល់សិស្សឆ្នាំសិក្សា១៩៩៣-៩៤និង១៩៩៤-៩៥។ ការដែលមានចំណេះដឹងខ្ពង់ខ្ពស់ ហើយក៏មានអ្នកខ្លះបានបន្តការសិក្សានៅប្រទេសជប៉ុនដូចជារូបលោកជាដើម ដូច្នេះអ្វីៗដែលមានបានសព្វថ្ងៃគឺដោយសារតែលោកគ្រូអ្នកគ្រូ។ ថវិកាដែលនៅសល់បានមកធ្វើតុ និងកៅអី ជូនដល់លោកនាយកវិទ្យាល័យសម្រាប់បំពេញកង្វះខាតនៅតាមបន្ទប់សិក្សា ហើយរូបលោកនឹងប្តេជ្ញាចិត្តបន្តជួយបន្ថែមទៀត។
សិស្សស្រី ទេព រស្មី រៀនថ្នាក់ទី១២K នៅវិទ្យាល័យព្រះសីហុន ឆ្នាំសិក្សា២០១៥-២០១៦ ដែលជាសិស្សពូកែលេខ១ផ្នែករូបវិទ្យាទូទាំងខេត្តកំពង់ចាម បានសម្ដែងនូវសេចក្តីត្រេកអរសប្បាយក្នុងចិត្តដោយបានឃើញបងៗ ដែលបានបញ្ចប់ការសិក្សាជាង២០ឆ្នាំមកហើយ នូវតែមិនបានបំភ្លេចទីកន្លែងដែលធ្លាប់បានសិក្សានៅវិទ្យាល័យនេះ បានយកតុ និងកៅឈើ មកជូនដល់លោកគ្រូអ្នកគ្រូ ហើយនាងក៏និងខិតខំយកគំរូល្អៗតាមរៀមច្បង ដើម្បីកសាងខ្លួនទៅជាពលរដ្ឋល្អក្នុងសង្គមជាតិ។ លោកគ្រូ អ៊ុំ លឹមផល្លី បង្រៀនគណិតវិទ្យាថ្នាក់ទី១២ វិទ្យាល័យព្រះសីហនុ មានប្រសាសន៏ឲ្យដឹងថា រូបលោកពិតមានអារម្មណ៏សប្បាយរីករាយនៅពេលដែលបានឃើញអតីតសិស្សដែលធ្លាប់បានបង្រៀនដោយបាននាំគ្នារៀបចំពិធីរំលឹកគុណគ្រូកន្លងមក និងថែមទាំងបានបរិច្ចាកថវិកាធ្វើតុ និងកៅអីជូនសម្រាប់ឲ្យលោកគ្រូ អ្នកគ្រូបានអង្គុយសមរម្យ ពិតជាគួរឲ្យកោតសសើរមែន។
លោកគ្រូ ខៀវ ប៊ុនថុល បង្រៀនគណិតវិទ្យាថ្នាក់ទី១២ មានប្រសាសន៍ស្ទើរតែស្រក់ទឹកភ្នែកឲ្យដឹងថា រូបលោកមានការរំភើបក្នុងចិត្តឥតឧបមា ដោយបានឃើញអតីតសិស្ស ដែលធ្លាប់បានបង្រៀនតាំងពីជាង២០ឆ្នាំមកហើយ បានបរិច្ចាកថវិកាធ្វើតុ និងកៅអីជូនដល់លោកគ្រូអ្នកគ្រូនាឳកាសនេះ ហើយសូមឲ្យប្អូនៗយកតម្រាប់តាមពួកគាត់ ដែលមានការងារធ្វើ មានមុខមាត់ នៅក្នុងសង្គមប្រកបដោយទឹកចិត្តល្អប្រពៃដែលចេះដឹងគុណគ្រូ។
លោក ថាវ សុខផល នាយកវិទ្យាល័យព្រះសីហនុ បានថ្លែងឲ្យដឹងដែរថា ក្នុងនាមគណៈគ្រប់គ្រងវិទ្យាល័យព្រះសីហនុពិតជាមានមោទនភាព ដោយបានឃើញអតីតសិស្សដែលធ្លាប់បានសិក្សាក្នុងអំឡុងឆ្នាំសិក្សា១៩៩៣-៩៤និង១៩៩៤-៩៥ រៀបចំពិធីរំលឹកគុណគ្រូ ដោយបានចំណាយអស់ថវិកាជាច្រើន ហើយថវិកាដែលនៅសល់ គឺបានចំណាយជួលជាងឲ្យធ្វើតុ២០និងកៅអី២០ មកជូនដល់រូបលោកបន្ថែមទៀត សម្រាប់បែងចែកនៅតាមបន្ទប់សិក្សាដល់លោកគ្រូ អ្នកគ្រូ សម្រាប់អង្គុយបង្រៀន។
ប្អូនៗដែលបានបញ្ចប់ការសិក្សា បានចេញទៅប្រកបមុខរបរផ្សេងៗក្នុងសង្គមទាំងក្របខណ្ឌរដ្ឋ និងឯកជន មានការរីកចម្រើនលូតលាស់គួរឲ្យកោតសសើរ។ ជាមួយនោះសូមឲ្យសិស្ស ដែលសិក្សានៅជំនាន់ក្រោយៗរៀបចំកម្មវិធីណាមួយសម្រាប់ទុកជា អនុស្សាវរីយ៍នៅក្នុងវិទ្យាល័យព្រះសីហនុ ៕
ចែករំលែកព័តមាននេះ