ខេត្តបាត់ដំបង ៖ នេះជាលើកដំបូងហើយដែលមន្រ្តីនៅក្នុងរដ្ឋបាលខេត្តបាត់ដំបងមួយរូប បានដាក់ពាក្យទៅកាន់ក្រសួងមហាផ្ទៃ ដើម្បីសុំលាឈប់ពីការងារនៅក្នុងក្របខណ្ឌក្រសួងមហាផ្ទៃដែលធ្វើឲ្យមន្រ្តីនានា និងមហាជនមានការភ្ញាក់ផ្អើលយ៉ាងខ្លាំង នៅព្រឹកថ្ងៃទី១៩ មករា នេះ ក្រោយពីបានឃើញ «ពាក្យស្នើសុំលាឈប់ពីការងារនោះ បង្ហោះជាសាធារណៈនៅក្នុងបណ្ដាញសង្គមរបស់សាមីខ្លួនផ្ទាល់» ។ សូមបញ្ជាក់៖ រដ្ឋមន្ត្រីក្រសួងព័ត៌មាន សោកស្តាយយុវជនម្នាក់ដើរចោលការងាររដ្ឋ ព្រោះយល់ថា មានរឿងបក្ខពួកនិយម
នៅក្នុងបណ្ដាញសង្គមដែលមានឈ្មោះ Ly Dinory ដែលគេស្គាល់ថា ឈ្មោះ លី ឌីនូរី ជាមន្រ្តីបំរើការនៅក្នុងរដ្ឋបាលខេត្តបាត់ដំបងបានបង្ហោះ «ពាក្យស្នើសុំឈប់ពីការងារ» នេះ កាលពីយប់ថ្ងៃទី១៨ មករា តែបានធ្វើឲ្យមានការភ្ញាក់ផ្អើលខ្លាំងដល់មន្រ្តីនានា និងមហាជនទូទៅនៅក្នុងខេត្ត នៅព្រឹកថ្ងៃទី១៩ មករា ដោយសារតែការលាលែងពីតំណែងរបស់មន្រ្តីរាជការនៅក្នុងខេត្តនេះមិនធ្លាប់មាន និងជារឿងដ៏កម្របំផុត។
បើយោងលើពាក្យស្នើសុំលាឈប់ពីការងាររស់លោក លី ឌីនូរី ចុះថ្ងៃទី ១៨ មករា ឆ្នាំ២០២២ ដែលកោះសន្តិភាពទទូលបាន
នៅព្រឹកថ្ងៃទី១៩ មករា នេះ ។ លោក លី ឌីនូរី មានឋានន្តរស័ក្ដិ វរៈមន្រ្តីថ្នាក់លេខ២ នៃក្របខ័ណ្ឌមន្រ្តីរដ្ឋបាលជាន់ខ្ពស់ក្រសួងមហាផ្ទៃ តួនាទីបច្ចុប្បន្នមន្រ្តីសាលាខេត្តបាត់ដំបង ។ លោកបានគោរពជូនសម្ដេចក្រឡាហោម ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដោយកម្មវត្ថុ «សំណើសុំអនុញ្ញាតលាឈប់ពីក្របខណ្ឌមន្រ្តីរាជការស៊ីវិល ក្រសួងមហាផ្ទៃ» ។
អង្គសេចក្ដីនៃកម្មវត្ថុ លោក លី ឌីនូរី បានជម្រាបជូនសម្ដេចក្រឡាហោមយ៉ាងដូច្នេះថា «ខ្ញុំបាទ បានបំពេញភារកិច្ចជាមន្រ្តីរាជការក្រមខណ្ឌក្រសួងមហាផ្ទៃ ចាប់តាំងពីឆ្នាំ២០០៧ រហូតបច្ចុប្បន្នជាមន្រ្តីសាលាខេត្តបាត់ដំបង ។ ដោយខ្ញុំបាទ ពុំពេញចិត្តនឹងការបង្កើតបក្សពួកនៅក្នុងសាលាខេត្ត ខ្ញុំបាទសូមគោរពស្នើសុំលាឈប់ពីក្របខណ្ឌមន្រ្តីរាជការស៊ីវិល ក្រសួងមហាផ្ទៃ ចាប់ពីពេលនេះតទៅ»។
កោះសន្តិភាពមិនអាចស្វែងរកសុំការបំភ្លឺបន្ថែមជុំវិញការស្នើសុំលាឈប់ពីការងាររាជការពីលោក លី ឌីនូរី បាននៅឡើយទេ នៅព្រឹកថ្ងៃទី ១៩ កមរា នេះ។ ប៉ុន្តែបើយោងលើបណ្ដាញសង្គមរបស់លោក លី ឌីនូរី (Ly DinorY) ដែលបានបង្ហោះប្រាប់មហាជន គេអាចប៉ាន់ស្មានថា មន្រ្តីរូបនេះ បានដាក់ស្នើសុំលាលែងការងារ គឺក្រោយប៉ុន្មានម៉ោងប៉ុណ្ណោះ បន្ទាប់ពីលោកទទួលបានលិខិតអញ្ជើញលើកទី១ពីរដ្ឋបាលខេត្ត សុំឲ្យលោកចូលបំពេញការងារវិញ ដែលលិខិតអញ្ជើញនោះបានបញ្ជាក់ថា លោកលី ឌីនូរី បានអវត្តមាន គ្មានច្បាប់ជាប់ៗគ្នារយៈពេល០២សប្ដាហ៏កន្លងមកហើយ ។ លិខិតអញ្ជើញរបស់រដ្ឋបាលខេត្តនោះ ចុះថ្ងៃទី ១៨ មករា ឆ្នាំ២០២២ ដែលអាចចេញប៉ុន្មានម៉ោង មុនលោកឌី នូរី ដាក់ពាក្យស្នើសុំលាឈប់ពីការងារ ហើយត្រូវមន្រ្តីរូបនេះ យកទៅបង្ហោះតាមបណ្ដាញសង្គមរបស់ខ្លួននៅរសៀលថ្ងៃដដែលនេះ។
បើតាមប្រភពពីមន្រ្តីសាលាខេត្តបានឲ្យដឹងថា គេមិនទាន់ដឹងឲ្យជាក់លាក់អំពីមូលហេតុ ដែលនាំឲ្យលោក លី ឌីនូរី ដាក់ពា្យស្នើសុំលាឈប់ពីការងាររាជការនោះទេ តែអាចដឹងព្រាលៗថា លោក ឌីនូរី ទំនងមានបញ្ហាផ្ទៃក្នុងនៅក្នុងការិយាល័យជំនាញរបស់លោក ដែលបែងចែកការងារគ្នាមិនច្បាស់លាស់ បែបបក្សពួកនិយម ។ ប្រភពដដែលបានបញ្ជាក់ថា ដោយសារតែបញ្ហានេះហើយ ធ្វើឲ្យលោកបាត់មុខពីកន្លែងធ្វើការ ដោយគ្មានច្បាប់ជិតកន្លះខែ។ លុះនៅព្រឹកថ្ងៃទី១៨ មករា រដ្ឋបាលខេត្ត បានចេញលិខិតអញ្ជើញគាត់ជាលើកទី១ ហៅគាត់ឲ្យចូលបំរើការវិញ។ ប៉ុន្តែនៅពេលគាត់ទទួលបានលិខិតនោះ គាត់ក៏បានយកទៅបង្ហោះ បន្ថែមទម្ងន់នូវខ្លឹមសារប៉ុន្មានប្រយោគចាក់ដោតបេះដូងថ្នាក់ដឹកនាំអសកម្មមួយចំនួនគួរឲ្យឈឺចាប់ ។
នៅលើបណ្ដាញសង្គម លោក លី ឌីនូរី បានបង្ហោះលិខិតអញ្ជើញនោះជាសាធារណៈ ហើយបានបន្ថែមនូវសំណេរយ៉ាងចាក់ដោត ដែលបានលើកជាសំនួរផង ជាមតិរិះគន់ដល់ថ្នាក់ដឹកនាំអសមត្ថភាពមួយចំនួនផង។ នៅក្នុងសំណេរសង្កត់បន្ថែមនោះ មន្រ្តីលាលែងតំណែងរូបនេះបានសរសេរយ៉ាងដូច្នេះថា « ថ្ងៃនេះបានទទូលលិខិតអញ្ជើញលើកទី១ របស់រដ្ឋបាលខេត្តបាត់ដំបង។ ខ្ញុំមិនបដិសេធទេ ប៉ុន្តែមានសំនួរខ្លះៗ៖ ១ តើរយៈពេលកន្លងមក ក្រុមអស់លោកធ្វើទុក្ខបុកម្នេញខ្ញុំ វាមិនទាន់អស់ចិត្តគ្រប់គ្រាន់មែនទេ ? ២ នៅពេលដែលខ្ញុំចូលបំពេញការងារ តើធានាទេមានការងារធ្វើសម្រាប់ខ្ញុំ ដូចមន្រ្តីធម្មតា ? ឬចង់ឲ្យខ្ញុំមកអង្គុយអានកាសែតដូចរយៈកាលមុន ? តើខ្ញុំមានកំហុសអ្វី ?» មន្រ្តីរូបនេះបានលើកឡើងក្នុងសំណេរទៀតថា »ប្រសិនបើមកអង្គុយអានកាសែតត្រឹមអានកាសែត ខ្ញុំមិនមកល្អជាង សុខចិត្តសុំលាឈប់ទៅធ្វើការងារឯកជនវិញ។ បក្សពួកនិយមខ្លាំងពេក នាំឲ្យអន្តរាយដល់ស្ថាប័នរដ្ឋ។ នេះប្រហែលជាខ្ញុំ មិនមែននៅក្នុងក្រុមគេទេដឹង ? កន្លែងដែលមានបក្សពួកពេក ខ្ញុំមិនធ្វើការជាមួយទេ សូមជ្រាប»។
បើយោងលើខ្លឹសារនៃសំណេរបន្ថែមរបស់មន្រ្តីលាលែងតំណែងរូបនេះ សបញ្ជាក់ឲ្យឃើញថា «មូលហេតុ ដែលលោក លី ឌីនូរី សម្រេចដាក់ពាក្យទៅក្រសួងមហាផ្ទៃសុំលាឈប់ពីការងារមន្រ្តីរាជការ គឺដោយសារតែលោកកំពុងរងសម្ពាធការងារពីថ្នាក់ដឹកនាំ បែងចែកការងារមិនច្បាស់លាស់ បែបប្រកាន់បក្សពួកនៅក្នុងការិយាល័យជំនាញរបស់លោក» ។ ប៉ុន្តែលោក សឿម
ប៊ុនរិទ្ធ អភិបាលរងខេត្ត និងជាអ្នកនាំពាក្យសាលាខេត្តបាត់ដំបងផង បានចាត់ទុកការប្រកាសលាលែងការងាររបស់លោក លី ឌីនូរី ថា «ជាការរវើរវាយរបស់មន្រ្តីរូបនេះតែប៉ុណ្ណោះ» ។ លោក សឿម ប៊ុនរិទ្ធ បានលើកឡើងបែបនេះ នៅពេលលោកឆ្លើយបំភ្លឺប្រាប់កោះសន្តិភាព នៅព្រឹកថ្ងៃទី១៩ មករា និងស្របពេលដែលមន្រ្តីនានា កំពុងមានការភ្ញាក់ផ្អើលនឹងការលាលែងតំណែងរបស់មន្រ្តីខាងលើ ។ លោកអភិបាលរងខេត្តរូបនេះ បានមានប្រសាសន៍ថា តាមពិតលោកលី ឌីនូរី បានអវត្តមានមិនចូលបំពេញការងារអស់រយៈ២សប្ដាហ៏កន្លងមកហើយ ។ ប៉ុន្តែនៅពេលរដ្ឋបាលខេត្តចេញលិខិតអញ្ជើញ លើកទី១ ឲ្យគាត់ចូលបំរើការងារក្នុងស្ថាប័នវិញ ក៏ស្រាប់តែគាត់មានអារម្មណ៏រវើរវាយ រួចដាក់ពាក្យស្នើសុំលាឈប់ពីក្របខណ្ឌមន្រ្តីរាជការ។
លោកបានបញ្ជាក់ថា ធាតុពិតការងារគាត់ ត្រូវបានបែងចែកយ៉ាងច្បាស់ទៅតាមរចនាសម្ព័ន្ធនៅក្នុងអង្គភាព ទៅតាមអនុក្រិត្យ ឬ ព្រះរាជក្រិត្យគ្រប់គ្រាន់អស់ទៅហើយ មិនមែនដូចការលើកឡើងនៅក្នុងពាក្យលាលែងរបស់គាត់នោះទេ។ ប៉ុន្តែយ៉ាងណា លោកអភិបាលរងខេត្ត ក៏បានទទូលស្គាល់ថា ពាក្យលាឈប់ពីការងារក្របខណ្ឌមន្រ្តីរាជការដែលបានបង្ហោះតាមបណ្ដាញសង្គម និងត្រូវសាម៉ីខ្លួនចែកចាយទីកាន់បណ្ដាសារព័ត៌មាននានានោះ ពិតជារបស់លោកលី ឌីនូរី មែន ហើយលោកបានបន្ថែមថា រដ្ឋបាលខេត្តបានទទូលពាក្យលាឈប់ពីការងាររបស់លោក ឌីនូរី ហើយពេលនេះរដ្ឋបាលខេត្ត បាននិងកំពុងដំណើការលើនីតិវិធីនេះ៕
ចែករំលែកព័តមាននេះ