ឥណ្ឌូណេស៊ីទទួលបានឱកាសធ្វើជាម្ចាស់ផ្ទះអាស៊ានប៉ារ៉ាហ្គេមលើកទី១១ ជំនួសវៀតណាម
- ភ្នំពេញ
រាជធានីភ្នំពេញ ៖ ប្រទេសវៀតណាមដែលពន្យារការប្រកួតកីឡាស៊ីហ្គេមលើកទី៣១ពីឆ្នាំ២០២១ ដល់ពាក់កណ្ដាលឆ្នាំ២០២២នោះ
រាជធានីភ្នំពេញ ៖ ប្រទេសវៀតណាមដែលពន្យារការប្រកួតកីឡាស៊ីហ្គេមលើកទី៣១ពីឆ្នាំ២០២១ ដល់ពាក់កណ្ដាលឆ្នាំ២០២២នោះបានលុបចោលការធ្វើជាម្ចាស់ផ្ទះនៃការប្រកួតកីឡាអាស៊ានប៉ារ៉ាហ្គេមលើកទី១១ដោយសារតែវិបត្តិកូវីដ១៩ ។
តាមទម្លាប់ប្រទេសណាដែលទទួលធ្វើជាម្ចាស់ផ្ទះស៊ីហ្គេម ត្រូវតែទទួលធ្វើជាម្ចាស់ផ្ទះនៃការប្រកួតកីឡាជនពិការដែលគេហៅថា
អាស៊ានប៉ារ៉ាហ្គេម(ASEAN Para Games)តែសម្រាប់វៀតណាមបែរជាលុបចោលទៅវិញ ។
ទោះជាយ៉ាងណា ក៏ក្រុមប្រឹក្សាភិបាលនៃសហព័ន្ធកីឡាជនពិការអាស៊ានបានបោះឆ្នោតគាំទ្រប្រទេសឥណ្ឌូណេស៊ី ទទួលរៀបចំធ្វើជាម្ចាស់ផ្ទះ ការប្រកួតកីឡាជនពិការ អាស៊ានប៉ារ៉ាហ្គេម លើកទី១១ ជំនួសប្រទេសវៀតណាម ។
ផ្អែកតាមសេចក្តីប្រកាសព័ត៌មានរបស់ក្រុមប្រឹក្សាភិបាលសហព័ន្ធកីឡាជនពិការអាស៊ាន កាលពីថ្ងៃទី១៥ ខែមករា ឆ្នាំ២០២២ ដែលបានបង្ហាញពីកិច្ចប្រជុំបន្ទាន់មួយ ដែលចូលរួមពីតំណាងគណៈកម្មាធិការជាតិប៉ារ៉ាឡាំពិក ក្នុងតំបន់បានពិភាក្សាអំពីការដេញថ្លៃរបស់ប្រទេសឥណ្ឌូណេស៊ី ដើម្បីធ្វើជាម្ចាស់ផ្ទះជំនួសនៃការប្រកួតអាស៊ានប៉ារ៉ាហ្គេម លើកទី១១ បន្ទាប់ពីការលុបចោលដោយម្ចាស់ផ្ទះដើម គឺវៀតណាម កាលពីឆ្នាំមុន។
ប្រទេសឥណ្ឌូណេស៊ីបានស្នើការប្រកួតនេះចាប់ពីថ្ងៃទី២០ ដល់៣១ ខែកក្កដា ឆ្នាំ២០២២ លើ១៣ប្រភេទកីឡានៅទីកន្លែងផ្សេងៗជុំ
វិញទីក្រុង Solo ។ ប្រធានគណៈកម្មាធិការជាតិប៉ារ៉ាឡាំពិកឥណ្ឌូនេស៊ីលោកSenny Marbunរីករាយចំពោះទំនុកចិត្តពីបណ្តាលប្រទេសអាស៊ាន។
លោកបានលើកឡើងថា ឥណ្ឌូណេស៊ីបានរៀបចំការប្រកួតកីឡាប៉ារ៉ាហ្គេមធំៗចំនួនពីរក្នុងរយៈពេល១០ឆ្នាំចុងក្រោយនេះ គឺASEAN Para Games លើកទី៦ នៅទីក្រុង Solo ឆ្នាំ២០១១ និង Asian Para Games ឆ្នាំ២០១៨ នៅទីក្រុង Jakarta នោះ ដោយលោកបានធានាថា រាល់សម្ភារបរិក្ខារ លក្ខខណ្ឌបច្ចេកទេស សម្រាប់ASEAN Para Games លើកទី១១ ត្រូវបានត្រៀមរួចរាល់។
លោកយី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជាមានប្រសាសន៍ថាក្រុមប្រឹក្សាភិបាលសហព័ន្ធកីឡា
ជនពិការអាស៊ានទុកពេលឲ្យឥណ្ឌូណេស៊ីបង្ហាញឯកសារពាក់ព័ន្ធមួយចំនួន និងទុកពេល១ខែសម្រាប់ការដេញថ្លៃដើម្បីទទួលបានសិទ្ធិផ្លូវការក្នុងការទទួលរៀបចំធ្វើម្ចាស់ផ្ទះអាស៊ានប៉ារ៉ាហ្គេមលើកទី១១នេះ។
កិច្ចប្រជុំស្តីពីការរៀបចំការប្រកួតនេះគឺដើម្បីរៀបចំការប្រកួតកីឡាជនពិការអាស៊ាននេះឡើងវិញ បន្ទាប់ពីម្ចាស់ផ្ទះចំនួនពីរបានលុបចោល២លើក (រយៈពេល៤ឆ្នាំ) គឺម្ចាស់ផ្ទះ ហ្វីលីពីន លុបចោលកាលពីឆ្នាំ២០១៩ និងម្ចាស់ផ្ទះ វៀតណាម សម្រេចលុបចោលមិនរៀបចំ នាឆ្នាំ២០២២នេះទេ ដោយធ្វើម្ចាស់ផ្ទះតែ ស៊ីហ្គេមប៉ុណ្ណោះ។ ការលុបចោលចំនួន២ព្រឹត្តិការណ៍នេះ គឺជាក្តីបារម្ភរបស់អាស៊ាន ដែលអត្តពលិកពិការ រួមទាំងគណៈកម្មការបច្ចេកទេសមិនបានដុះខាត់សមត្ថភាពជំនាញរបស់ខ្លួន ព្រមទាំងបបង្កនូវផលមិនល្អដល់គុណភាពបច្ចេកទេសរបស់អត្តពលិកក្នុងតំបន់។
លោកអគ្គលេខាធិការបន្ថែមថាប្រសិនបើការប្រកួតកីឡាជនពិការអាស៊ានលើកទី១១នេះអាចដំណើរបាននោះការបញ្ជូនអត្តពលិកពិការកម្ពុជាក៏នឹងអាចចូលរួមប្រកួតប្រជែង ក្នុងការកសាងសមត្ថភាពបន្ថែម ត្រៀមឆ្ពោះទទួលរៀបចំធ្វើជាម្ចាស់ផ្ទះ អាស៊ានប៉ារ៉ាហ្គេម លើកទី១២នាឆ្នាំ២០២៣បានកាន់តែល្អប្រសើរផងដែរ។
បច្ចុប្បន្នកីឡាករ កីឡាការិនី ពិការកម្ពុជាកំពុងហ្វឹកហាត់បិទខ្ទប់បានច្រើនប្រភេទកីឡាដែរ ក្រោមការទំនុកបម្រុងពីក្រសួងអប់រំ យុវជន និងកីឡា ហើយប្រសិនបើនៅក្នុងឆ្នាំ២០២២នេះមានការប្រកួតអន្តរជាតិកាន់តែច្រើន នោះការត្រៀមខ្លួនរបស់ប្រភេទកីឡាពិការ សម្រាប់ការធ្វើម្ចាស់ផ្ទះ អាស៊ានប៉ារ៉ាហ្គេម លើកទី១២ ឆ្នាំ២០២៣ ក៏មានឱកាសកាន់តែច្រើន ក្នុងការប្រជែងមេដាយ ព្រមទាំងផ្តល់ពិសោធន៍កាន់តែច្រើន សម្រាប់មន្ត្រីរដ្ឋបាល មន្ត្រីបច្ចេកទេសពិការផងដែរ។ ដូច្នេះវាពិតជាសំខាន់ណាស់ ដែលកម្ពុជាគាំទ្រពេញទំហឹងឲ្យមានការប្រកួតអាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូណេស៊ី នេះ ដើម្បីគោលដៅឆ្ពោះទៅទទួលធ្វើម្ចាស់ផ្ទះ អាស៊ានប៉ារ៉ាហ្គេម ឆ្នាំ២០២៣ ក្រោយបញ្ចប់ការប្រកួតកីឡា ស៊ីហ្គេម លើកទី៣២ ឆ្នាំ២០២៣ ប្រមាណ២សប្តាហ៍។
ចំពោះការឧបត្ថម្ភគាំទ្រសម្រាប់បេសកកម្មអន្តរជាតិ ជាធម្មតាតែងធ្វើសំណើរឆ្លងតាមរយៈសម្តេចតេជោ ហ៊ុន សែន ដែលជាធានគណៈកម្មាធិការជាតិប៉ារ៉ាឡាំពិកកម្ពុជាដែរដោយលោកជឿជាក់ថា សម្តេចតេជោនឹងផ្តល់ការលើកទឹកចិត្តអនុញ្ញាតឲ្យក្រុមអត្តពលិកពិការកម្ពុជាចូលរួមប្រកួតប្រជែងមេដាយ និងមន្ត្រីគណៈកម្មការជំនាញនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ក៏នឹងត្រូវចូលរួមដកពិសោធន៍នូវរបៀបរបបនៃប្រព័ន្ធប៉ារ៉ាឡាំពិក ដើម្បីជាចំណេះដឹងយកមកអនុវត្ត នៅក្នុងព្រឹត្តិការណ៍ជាប្រវត្តិសាស្ត្រដំបូងនៅកម្ពុជាឲ្យទទួលបានជោគជ័យដូចគ្នាផងដែរ ៕
ចែករំលែកព័តមាននេះ