រាជធានីភ្នំពេញ ៖ មានក្រុមហ៊ុនមួយបានស្នើផែនការវិនិយោគវារីវប្បកម្មតាមបែបចិញ្ចឹមត្រីសមុទ្រក្នុងបែ នៅជិតតំបន់កោះដែកគោល និងកោះថាស ដែលដំណាក់កាលទី ១ នៃផែនការវិនិយោគនោះ គឺលើផ្ទៃទឹកសមុទ្រចំនួន ១៩៨៤…
រាជធានីភ្នំពេញ ៖ មានក្រុមហ៊ុនមួយបានស្នើផែនការវិនិយោគវារីវប្បកម្មតាមបែបចិញ្ចឹមត្រីសមុទ្រក្នុងបែ នៅជិតតំបន់កោះដែកគោល និងកោះថាស ដែលដំណាក់កាលទី ១ នៃផែនការវិនិយោគនោះ គឺលើផ្ទៃទឹកសមុទ្រចំនួន ១៩៨៤ ហិកតា ។ ក្រុមហ៊ុន ដែលស្នើសុំចិញ្ចឹមត្រីក្នុងសមុទ្រនេះត្រូវគេស្គាល់ឈ្មោះថា ជីន យូ តាំង ។
លោក វេង សាខុន រដ្ឋមន្ត្រីក្រសួងកសិកម្មឱ្យដឹងថា ការចិញ្ចឹមក្នុងសមុទ្រគេអាចធ្វើបាន ។ លោកថា តាមរយៈបទពិសោធន៍នៃបណ្តាប្រទេសមួយចំនួននៅក្នុងតំបន់ ការចិញ្ចឹមត្រីក្នុងលំហសមុទ្រ ដែលអាចទាញអត្ថប្រយោជន៍ជាសេដ្ឋកិច្ចបានយ៉ាងច្រើន ទាំងអ្នកវិនិយោគ និងប្រជាសហគមន៍នេសាទ តាមកំណើននៃត្រីធម្មជាតិដែលចូលមករកចំណីពីតំបន់ចិញ្ចឹម ។
ឆ្លើយតបចំពោះសំណើវិនិយោគរបស់ក្រុមហ៊ុនខាងលើ លោករដ្ឋមន្ត្រីស្វាគមន៍ និងគាំទ្រចំពោះផែនការវិនិយោគវារីវប្បកម្មសមុទ្ររបស់ក្រុមហ៊ុន ដែលផែនការវិនិយោគនេះ គឺពិតជាសំខាន់សម្រាប់ជួយដល់ការអភិវឌ្ឍដល់វិស័យជលផលនៅកម្ពុជា និងជាពិសេសចូលរួមបង្កើតការងារជូនប្រជាពលរដ្ឋ បង្កើនទាំងផលត្រីសមុទ្រធម្មជាតិ និងផលត្រីចិញ្ចឹមសម្រាប់ផ្គត់ផ្គង់ក្នុងស្រុក ។
លោករដ្ឋមន្ត្រីបានណែនាំបន្ថែមដល់ក្រុមហ៊ុនឱ្យបញ្ជូនឯកសារវាយតម្លៃលើផលប៉ះពាល់បរិស្ថាន និងសង្គមលើគម្រោងវិនិយោគវារីវប្បកម្មសមុទ្រនេះមកក្រសួង និងជាពិសេសត្រូវធ្វើការស្នើសុំ និងមានការអនុម័តពីក្រុមប្រឹក្សាអភិវឌ្ឍន៍កម្ពុជាជាមុនសិន ទើបក្រសួងកសិកម្ម រុក្ខាប្រមាញ់ និងនេសាទអាចចុះកិច្ចព្រមព្រៀងលើការអនុវត្តគម្រោងនេះជាមួយក្រុមហ៊ុនបាន ។
ប្រភពពីក្រសួងកសិកម្ម រុក្ខាប្រមាញ់ និងនេសាទ ឱ្យដឹងថា នៅថ្ងៃទី ១៨ ខែមករា នេះ លោក វេង សាខុន បានចុះត្រួតពិនិត្យមើលការនេសាទសមុទ្រ ការស្រាវជ្រាវ និងអភិវឌ្ឍន៍ជលផលសមុទ្រ ការអភិរក្ស និងការគ្រប់គ្រងធនធានជលផលនៅក្នុងតំបន់សមុទ្រ និងបានទៅពិនិត្យមើលទីតាំងសមុទ្រនៅជុំវិញតំបន់កោះថាស ដែលក្រុមហ៊ុន ជីន យូ តាំង ស្នើសុំចិញ្ចឹមត្រីនោះផងដែរ ៕
ចែករំលែកព័តមាននេះ