ទីក្រុងបាងកក៖ ប្រទេសថៃដែលជាទីតាំងផលិតរថយន្តដ៏ធំមួយនៅក្នុងតំបន់អាស៊ាននឹងដាក់ចេញគោលនយោបាយថ្មីដើម្បីទាក់ទាញអ្នកវិនិយោគទៅបណ្ដាក់ទុននៅក្នុងវិស័យនេះដោយផ្ដល់ផលប្រយោជន៍ដ៏ច្រើនសន្ធឹកសន្ធាប់សម្រាប់ពួកគេ។ ចាប់ពីឆ្នាំ២០២៨-២០៣២ ប្រទេសថៃត្រៀមបញ្ចុះពន្ធអាករយ៉ាងច្រើនសម្រាប់រថយន្តប្រភេទហាយប្រ៊ីច មានន័យថារថយន្តដែលប្រើប្រាប់សាំងលាយអគ្គិសនី។ នេះបើយោងតាមការបង្ហើបឱ្យដឹងពីគណៈកម្មការវិនិយោគរបស់ប្រទេសថៃ។
អស់ជាច្រើនទសវត្សមកហើយ ប្រទេសថៃបានក្លាយជាមជ្ឈមណ្ឌលផលិតរថយន្តនៅក្នុងតំបន់ ហើយក៏ជាមជ្ឈមណ្ឌលនាំចេញដ៏ធំរបស់ក្រុមហ៊ុនធំៗដូចជាតូយ៉ូតា និងហុងដាជាដើម។ ការវិនិយោគរបស់ក្រុមហ៊ុនផលិតរថយន្តអគ្គិសនីរបស់ប្រទេសចិនដូចជាក្រុមហ៊ុនប៊ីវ៉ាយឌី (BYD) និងហ្ក្រេត វ៉ល ម៉ូថឺ (Great Wall Motor) បានធ្វើឱ្យរង្គោះរង្គើចំពោះរថយន្តស៊េរីចាស់ៗ។ ប្រទេសថៃកំពុងប្រើប្រាស់វិធីទាក់ទាញអ្នកវិនិយោគបន្ថែមទៀតដោយផ្ដល់នូវផលប្រយោជន៍ជាច្រើន។
អគ្គលេខាធិការគណៈកម្មការវិនិយោគរបស់ប្រទេសថៃថ្លែងថានេះជាបច្ចេកវិទ្យាសំខាន់មួយដើម្បីឈានឆ្ពោះទៅរកការប្រើប្រាស់រថយន្តអគ្គិសនីសុទ្ធសាធតែម្ដងនាពេលអនាគត។ លោកចង់សំដៅទៅលើប្រភេទរថយន្តហាយប្រ៊ីច។ លោកថ្លែងថាសព្វថ្ងៃនេះប្រទេសថៃមានសមត្ថភាពពេញលេញជាមជ្ឈមណ្ឌលផលិតរថយន្តហាយប្រ៊ីចដ៏សំខាន់មួយ។ បើយើងគាំទ្រការផលិតរថយន្តហាយប្រ៊ីចមានន័យស្មើនឹងការលើកស្ទួយការផលិតគ្រឿងបន្លាស់រថយន្ត។
វិធានការណ៍នេះអាចនឹងអូសទាញអ្នកវិនិយោគឱ្យបណ្ដាក់ទុន៥០ពាន់លានបាត ឬស្មើនឹង១,៣៩ពាន់លានដុល្លារ។ រដ្ឋាភិបាលថៃនឹងដាក់ចេញគោលនយោបាយបញ្ចុះពន្ធរយៈពេលប្រាំឆ្នាំសម្រាប់រថយន្តហាយប្រ៊ីចរបស់ក្រុមហ៊ុនដែលមានទំហំវិនិយោគយ៉ាងតិច៣ពាន់លានបាតចាប់ពីពេលនេះទៅមុខរយៈពេល៤ឆ្នាំទៀត ហើយត្រូវជួយប្រើប្រាស់គ្រឿងរថយន្តដែលផលិតនៅក្នុងប្រទេសថៃផ្ទាល់តែម្ដង។ សម្រាប់ពេលបច្ចុប្បន្ននេះ ក្រុមហ៊ុនផលិតរថយន្តចំនួន៧អាចទាញយកផលចំណេញតាមរយៈគោលនយោបាយបញ្ចុះពន្ធរថយន្តនេះ។ ក្នុងនោះ ក្រុមវិនិយោគរបស់ជប៉ុនចំនួន៤ និងក្រុមហ៊ុនវិនិយោគរបស់ចិនចំនួន៣៕
ចែករំលែកព័តមាននេះ