ទីក្រុងញូយ៉ក៖ នៅទីបំផុត លោកជេនស៊ី ហួងត្រូវបង្ខំចិត្តលាលែងពីមុខតំណែងជានាយកប្រតិបត្តិក្រុមហ៊ុន Nvidia ហើយបន្ទាប់ពីផ្ទុះរឿងអាស្រូវស្នេហាក្រៅចំណងអាពាហ៍ពិពាហ៍ ហើយត្រូវរដ្ឋាភិបាលអាមេរិកដាក់ការសង្ស័យថានារីកំណាន់របស់លោកគឺអ្នកស្រីអាលីស ហួងជាភ្នាក់ងារសម្ងាត់របស់រដ្ឋាភិបាលចិនដើម្បីលួចបញ្ជូនបន្ទះឈីបបំពាក់បច្ចេកវិទ្យាទំនើបឱ្យក្រុមហ៊ុននានារបស់ចិន។ ម៉្យាងទៀតការលាលែងពីតំណែងនេះក៏កើតមានឡើងបន្ទាប់ពីមានការបែកធ្លាយថាលោកជេនស៊ី ហួងមានស្នេហាលួចលាក់ជាមួយនារីកំណាន់ម្នាក់ទៀតដែលជាបុគ្គលិកជាន់ខ្ពស់របស់ Nvidia។
ការចាកចេញរបស់លោកហួងអាចនឹងនាំមកនូវផលវិបាកធ្ងន់ធ្ងរសម្រាប់គោលនយោបាយស្ដីពីការនាំចេញបន្ទះឈីបរបស់អាមេរិកដោយសារលោកហួងតែងតែជំរុញឱ្យនាំចេញសម្រាប់ទីផ្សារចិន និងម៉្យាងទៀត លោកហួងក៏មានទំនាក់ទំនងជិតស្និទ្ធជាមួយលោកដូណាល់ត្រាំផងដែរ។ វិបត្តិនេះក៏ប៉ះពាល់ដល់បុគ្គលដទៃទៀតដែលធ្វើការនៅក្នុងជួររដ្ឋាភិបាលរបស់លោកត្រាំផងដែរ ក្នុងនោះក៏មានលោកហូវើត លូតនីក (Howard Lutnick) ម្នាក់ដែរដែលជារដ្ឋមន្ត្រីក្រសួងពាណិជ្ជកម្ម និងដែលកំពុងប្រឈមនឹងការចោទសួរថាតើរដ្ឋាភិបាលរបស់លោកចាត់ចែងយ៉ាងដូចម្ដេចចំពោះការលក់បន្ទះឈីបទៅប្រទេសចិន។
ទាំងលោកហូវើត និងលោកហួងសុទ្ធតែបានជំរុញឱ្យរដ្ឋាភិបាលអាមេរិកបន្ធូរបន្ថយលក្ខខណ្ឌលក់បន្ទះឈីបទៅចិនទោះបីក្រុមប្រកាន់តឹងរបស់គណបក្សប្រជាធិបតេយ្យ និងសាធារណរដ្ឋជំរុញឱ្យប្រើវិធានការម៉ឺងម៉ាត់យ៉ាងណាក្ដី។ មន្ត្រីជាន់ខ្ពស់សេតវិមានមួយចំនួនបង្ហើបឱ្យដឹងថារដ្ឋាភិបាលលោកត្រាំកំពុងពិភាក្សាគ្នាថាគួរដកតំណែងលោកហូវើត លូតនីក ឬយ៉ាងណា។ ការចាកចេញរបស់លោកជេនសិន ហួងអាចប៉ះពាល់ខ្លាំងចំពោះវិស័យអេអាយ។
ការរីកចម្រើនខាងវិស័យនេះធ្វើឱ្យតម្លៃភាគហ៊ុនសរុបរបស់ Nvidia ហក់ឡើងខ្ពស់កាលពីដើមខែតុលារហូតដល់ជិត៦ទ្រីលានដុល្លារ។ ជាបន្តទៅទៀតនេះ លោកស្រីខូឡេត ក្រែស (Colette Kress) ដែលជានាយកហិរញ្ញវត្ថុរបស់ Nvidia នឹងឡើងកាន់តំណែងជានាយកប្រតិបត្តិស្ដីទីរបស់ក្រុមហ៊ុននេះដើម្បីទុកពេលឱ្យក្រុមហ៊ុនជ្រើសរើសអ្នកជំនួសតំណែងលោកជេនសិន ហួងជាអចិន្ត្រៃយ៍៕ ប្រភព៖ Channel News Asia
ចែករំលែកព័តមាននេះ