ប្រទេសអារ៉ាប៊ីសាអូឌីត ៖ ជនជាតិអេត្យូពីប្រមាណជា៥២០នាក់ ដែលត្រូវកាត់ទោសប្រហារជីវិតពីបទរត់ពន្ធគ្រឿងញៀន កំពុងរង់ចាំការប្រហារជីវិតនៅអារ៉ាប៊ីសាអូឌីត ។ រដ្ឋាភិបាលទីក្រេតំបន់មួយនៅភាគខាងជើងអេត្យូពី កាលពីថ្ងៃទី១២ វិច្ឆិកាបានផ្ញើសារលិខិតមួយអំពាវនាវដល់អាជ្ញាធរអារ៉ាប៊ីសាអូឌីតឲ្យលើកលែងទោសប្រហារជិវិតពួកគេ ។
អារ៉ាប៊ីសាអូឌីតប្រកាស កាលពីថ្ងៃទី១១ វិច្ឆិកា ថា បានប្រហារជីវិតជនជាតិអេត្យូពី២នាក់ពីបទរត់ពន្ធគ្រឿងញៀន ១សប្ដាហ៍បន្ទាប់ពីការប្រហារជីវិតជនជាតិអេត្យូពី៥នាក់ទៀត ពីបទចោទប្រកាន់ដូចគ្នា ។ ជនជាតិអេត្យូពី៥នាក់ ត្រូវបានប្រហារជីវិតរួចហើយ កាលពីខែមិថុនា និង៥នាក់កាលពីខែកក្កដា ។ ជាមួយការប្រហារជិវិតមនុស្សដល់៣៤នាក់ ក្នុងឆ្នាំនេះ ជនជាតិអេត្យូពីជាជនបរទេសទទួលរងការកាត់ទោសប្រហារជីវិតច្រើនជាងបំផុត ។
តាមអង្គការសិទ្ធិមនុស្ស AMNESTY INTERNATIONAL ថា អារ៉ាប៊ីសាអូឌីត រវាងឆ្នាំ២០២២ និង២០២៥ ក្លាយជាប្រទេសទី៣ដែលបានប្រហារជីវិតអ្នកទោសច្រើនជាងគេបំផុត បន្ទាប់ពីចិន និងអ៉ីរ៉ង់។ តាំងពីដើមឆ្នាំ២០២៦នេះ មកនៅអារ៉ាប៊ីសាអូឌីតមានការប្រហារជីវិតអ្នកទោសដល់ជាង២០០នាក់ ។ ការប្រហារជីវិតពួកអ្នកទោសរត់ពន្ធគ្រឿងញៀនតែងធ្វើដោយការព្យួរ.ក។
លោកហាយីសស៊ីបាហ្គាឌីប្រធានការិយាល័យកិច្ចការយុវជន របស់រដ្ឋាភិបាលតំបន់ទីក្រេ ក្នុងសន្និសីទសារព័ត៌មានមួយថ្លែងថា នៅអារ៉ាប៊ីសាអូឌីតជនជាតិអេត្យូពីដល់ទៅ៥២០នាក់ ត្រូវកាត់ទោសប្រហារជីវិត ហើយពួកគេកំពុងរង់ចាំការប្រហារជីវិត។ ភាគច្រើននៃមនុស្សទាំងនេះ មកពីតំបន់ទីក្រេ ។ អ្នកត្រូវទទួលទោសប្រហារជីវិតមួយចំនួនចាញ់បោកពួកមេខ្យល់ហើយមួយចំនួនទៀត ជាអ្នកធ្វើការឲ្យពួកអ្នកដឹកជញ្ជូនគ្រឿងញៀន ។
ពួកគេភាគច្រើនត្រូវកាត់ទោសដោយមិនមានមេធាវីជួយការពារ ឬគ្មានអ្នកជួយបកប្រែភាសាឲ្យ ។ អេត្យូពីដែលជាប្រទេសថែរក្សាទំនាក់ទំនងល្អជាមួយអារ៉ាប៊ីសាអូឌីត ត្រូវស្នើដល់ក្រុងរីយ៉ាដឲ្យលើកលែងការប្រហារជីវិតពួកគេ ៕
ចែករំលែកព័តមាននេះ