ខេត្តមណ្ឌលគិរី ៖ តំបន់ទេសចរណ៍ធម្មជាតិទឹកធ្លាក់ជីអាំង មានចម្ងាយប្រមាណ ៤៥គីឡូម៉ែត្រ ពីទីរួមខេត្តមណ្ឌលគិរី ស្ថិតនៅភូមិពូញ៉ាវ ឃុំមេម៉ង់ ស្រុកកែវសីមា ខេត្តមណ្ឌលគិរី កំពុងក្លាយជាគោលដៅទេសចរណ៍ធម្មជាតិដ៏ទាក់ទាញមួយ សម្រាប់ភ្ញៀវទេសចរជាតិ និងអន្តរជាតិ ដែលចង់សម្រាកលំហែកាយ ស្រូបយកខ្យល់អាកាសបរិសុទ្ធ និងរីករាយជាមួយទេសភាពធម្មជាតិដ៏ស្រស់ស្អាត ។
អ្នកទេសចរអាចធ្វើដំណើរចេញពីក្រុងសែនមនោរម្យ ដោយធ្វើដំណើរតាមផ្លូវក្រាលគ្រួសក្រហមប្រមាណ ២០គីឡូម៉ែត្រ ហើយបន្តចូលតាមផ្លូវមួយខ្សែទៀតប្រមាណ ៤គីឡូម៉ែត្រ ទើបដល់ទីតាំងទឹកធ្លាក់។ មកដល់ទីនេះ អ្នកទេសចរក៏អាចមើលឃើញពីជីវភាពរស់នៅ និងវប្បធម៌ប្រពៃណីរបស់បងប្អូនជនជាតិដើមភាគតិចនៅក្នុងខេត្តមណ្ឌលគិរី ។
បើតាមលោក សុគុណ ជុ ប្រធានសហគមន៍ទេសចរណ៍ធម្មជាតិទឹកធ្លាក់ជីអាំង ស្ថិតនៅភូមិពូញ៉ាវ ឃុំមេម៉ង់ ស្រុកកែវសីមា ខេត្តមណ្ឌលគិរី បានបញ្ជាក់ប្រាប់ថា សហគមន៍នេះ បានបង្កើតឡើងក្នុងឆ្នាំ២០២៣ ហើយនៅទីតាំងទឹកធ្លាក់កន្លែងនេះមានបោះតង់ មានសេវាជូនភ្ញៀវកម្សាន្ត បម្រើម្ហូបអាហារ។ ក្រៅពីនេះ ភ្ញៀវអាចងូតទឹកកម្សាន្ត ដើរលេងតាមព្រៃភ្នំជាដើម។ នៅសហគមន៍ក៏មានសត្វកម្រជាច្រើនដូចជា៖ ឈ្លូស ប្រើស ជ្រូកព្រៃ ស្វា មាន់ព្រៃជាដើម ។
លោកបានបញ្ជាក់ថា គិតមកដល់ពេលនេះ សមាជិកសហគមន៍សរុប ៣១នាក់ ក្នុងចំណោមនេះសុទ្ធសឹងជាអ្នកបម្រើសេវាវិស័យទេសចរណ៍ និងជាអ្នកប្រកបរបរកសិកម្ម។ ពិសេសជាងនេះ រាល់ដំណាំ និងសត្វចិញ្ចឹមរបស់ពួកគាត់ តែងយកមកលក់ឱ្យភ្ញៀវទេសចរ ដែលផ្តល់នូវចំណូលដល់គ្រួសារពួកគាត់។ សម្រាប់ម្ហូបអាហារដែលបម្រើភ្ញៀវទេសចរសុទ្ធសឹងជារបស់ធម្មជាតិ ដាំ និងរកបាននៅទីនោះផ្ទាល់តែម្តង ។
ប្រធានសហគមន៍រូបនេះបានប្រាប់ថា រាល់ការមកទស្សនាសហគមន៍ទេសចរណ៍ធម្មជាតិទឹកធ្លាក់ជីអាំង គឺជាការរួមចំណែកដ៏សំខាន់ក្នុងការលើកកម្ពស់ជីវភាព និងការអភិវឌ្ឍន៍សហគមន៍។ វាបានជួយបង្កើតឱកាសការងារសម្រាប់សហគមន៍មូលដ្ឋានក្នុងការប្រកបរបរប្រកបដោយចីរភាព ពង្រឹងសមត្ថភាពសហគមន៍ និងជំរុញការការពារធនធានធម្មជាតិដែលពួកគេតែងអាស្រ័យផល ។
ដោយឡែកលោក ហេង ខេង អនុប្រធានមន្ទីរបរិស្ថានខេត្តមណ្ឌលគិរី បានបញ្ជាក់ប្រាប់ថា ក្នុងចំណោមសហគមន៍ទាំង២៦ នៅខេត្តមណ្ឌលគិរី មានទាំងសហគមន៍តំបន់ការពារធនធានធម្មជាតិ និងសហគមន៍ជនជាតិដើមភាគតិច។ ដោយឡែកសហគមន៍ទេសចរណ៍ធម្មជាតិវិញមានចំនួន៣ គឺសហគមន៍ឡែងកៅ នៅភូមិអណ្តូងក្រឡឹង សហគមន៍ទេសចរណ៍ធម្មជាតិទឹកធ្លាក់ជីអាំង និងសហគមន៍ទេសចរណ៍ភ្នំណាំលៀរ ដែលជាទីតាំងទេសចរណ៍ដ៏ទាក់ទាញមួយ ស្ថិតនៅក្នុងស្រុកពេជ្រចិន្តា ខេត្តមណ្ឌលគិរី ។
លោកបានប្រាប់ថា ក្រៅពីតំបន់ទេសចរណ៍ល្បីៗក្នុងខេត្តមណ្ឌលគិរី សហគមន៍ទេសចរណ៍ធម្មជាតិទឹកធ្លាក់ជីអាំង មានទីតាំងស្ថិតនៅតំបន់ទេសភាពដ៏ស្រស់ត្រកាលនៃដែនជម្រកសត្វព្រៃកែវសីមា ក្នុងខេត្តមណ្ឌលគិរី។ លើសពីនេះ ទឹកធ្លាក់ជីអាំងបានផ្តល់ឱ្យភ្ញៀវទេសចរនូវបទពិសោធន៍ពីធម្មជាតិ ដែលរួមចំណែកគាំទ្រដល់ជីវភាពសហគមន៍មូលដ្ឋាន និងការអភិរក្សធនធានធម្មជាតិក្នុងតំបន់។ នៅទីនេះ ភ្ញៀវទេសចរអាចស្វែងយល់ពីសម្រស់ធម្មជាតិដ៏ស្រស់ស្អាតរបស់ប្រទេសកម្ពុជា ព្រមទាំងភ្ជាប់ទំនាក់ទំនងជាមួយសហគមន៍មូលដ្ឋាន និងស្វែងយល់ពីមរតកវប្បធម៌ដ៏សម្បូរបែបរបស់ជនជាតិដើមភាគតិចពូនង ។
គួរឱ្យដឹងថា តាមរយៈការគាំទ្រថវិកាពីគម្រោងរេដបូកកែវសីមា ក្រោមការអនុវត្តដោយអង្គការ WCS Cambodia សហការជាមួយមន្ទីរបរិស្ថានខេត្តមណ្ឌលគិរី មន្ទីរទេសចរណ៍ខេត្តមណ្ឌលគិរី និងការគាំទ្រផ្នែកបច្ចេកទេសពីអង្គការ CRDT សហគមន៍ទេសចរណ៍ធម្មជាតិទឹកធ្លាក់ជីអាំង-Chy Ang Community Based Ecotourism បាននឹងកំពុងអភិវឌ្ឍខ្លួន ដើម្បីត្រៀមទទួលស្វាគមន៍ភ្ញៀវទេសចរមកទស្សនាកម្សាន្ត និងគយគន់សម្រស់ព្រៃព្រឹក្សាដ៏ស្រស់ត្រកាលនៃដែនជម្រកសត្វព្រៃកែវសីមា ។
បន្ថែមពីសម្រស់ព្រៃដ៏ខៀវស្រងាត់ និងទឹកធ្លាក់ដ៏ថ្លាឆ្វង់ សហគមន៍ទេសចរណ៍ធម្មជាតិទឹកធ្លាក់ជីអាំង ក៏មានសេវាកម្មទេសចរណ៍ដូចជា៖ ការរៀបចំម្ហូបអាហារ ផ្ទះស្នាក់ កន្លែងបោះតង់ ការសម្តែងរបាំជនជាតិដើមភាគតិច និងសេវាកម្មនាំភ្ញៀវទេសចរផងដែរ ។
ទឹកធ្លាក់ «ជីអាំង» មានលក្ខណៈពិសេស ដោយទឹកហូរធ្លាក់ជាដំណាក់ៗជាច្រើនជាន់ អមដោយព្រៃឈើបៃតងខៀវស្រងាត់ វាលស្មៅធម្មជាតិ និងជួរភ្នំតូចធំដែលលេចត្រដែត ជាពិសេសនៅពេលព្រឹកមានអ័ព្ទស្រាលគ្របដណ្តប់ បង្កើតបានជាទស្សនីយភាពដ៏ស្រស់ស្អាត និងមានបរិយាកាសត្រជាក់ស្រួល ស្ងប់ស្ងាត់ សមស្របសម្រាប់ការសម្រាក និងកម្សាន្តនៅថ្ងៃចុងសប្តាហ៍។ ក្នុងរដូវវស្សា និងដើមរដូវរងា តំបន់នេះកាន់តែមានសម្រស់ទាក់ទាញ ដោយរុក្ខជាតិលូតលាស់ខៀវស្រងាត់ ពពក និងអ័ព្ទអណ្តែតតាមជ្រលងភ្នំ ដែលជាទីពេញនិយមសម្រាប់អ្នកស្រឡាញ់ធម្មជាតិ ការថតរូប និងការធ្វើដំណើរកម្សាន្តបែបផ្សងព្រេង ។
បច្ចុប្បន្ន ទឹកធ្លាក់ «ជីអាំង» នៅតែអាចចុះងូតទឹក និងលេងកម្សាន្តបាន ទោះបីលំហូរទឹកមានកម្លាំងខ្លាំងជាងរដូវប្រាំងបន្តិចក៏ដោយ។ ប៉ុន្តែ ភ្ញៀវទេសចរត្រូវបានណែនាំឱ្យមានការប្រុងប្រយ័ត្ននៅពេលចុះលេងទឹក និងគោរពតាមការណែនាំរបស់អ្នកគ្រប់គ្រងតំបន់។ ជាមួយសម្រស់ធម្មជាតិដ៏ទាក់ទាញ និងបរិយាកាសស្រស់ស្រាយ រមណីយដ្ឋានទឹកធ្លាក់ «ជីអាំង» កំពុងរង់ចាំស្វាគមន៍ភ្ញៀវទេសចរជាតិ និងអន្តរជាតិ ឱ្យមកទស្សនាកម្សាន្ត និងស្វែងយល់ពីសក្តានុពលទេសចរណ៍ធម្មជាតិដ៏សម្បូរបែបរបស់ខេត្តមណ្ឌលគិរី ។
គួរបញ្ជាក់ថា តាមរយៈការដឹកនាំរបស់សហគមន៍ជនជាតិដើមភាគតិចពូនង ស្ថិតក្នុងភូមិពូញ៉ាវ និងការគាំទ្រពីគម្រោងរេដបូកកែវសីមា ភ្ញៀវទេសចរអាចរីករាយជាមួយសកម្មភាពជាច្រើន ដូចជា៖ ដើរទស្សនាព្រៃព្រឹក្សានៅក្នុងដែនជម្រកសត្វព្រៃកែវសីមា, ស្វែងយល់ពីការរស់នៅរបស់សត្វព្រៃនៅក្នុងទីជម្រកធម្មជាតិ, ហែលទឹកលេងកម្សាន្ត នៅទីតាំងទឹកធ្លាក់ដ៏ត្រជាក់ស្រស់ស្រាយ, ពិសាម្ហូបប្រចាំតំបន់របស់ជនជាតិដើមភាគតិច, ទទួលបទពិសោធន៍ស្នាក់នៅផ្ទះស្នាក់របស់សហគមន៍, ស្វែងយល់ពីវប្បធម៌ និងប្រពៃណីដ៏អស្ចារ្យរបស់ជនជាតិដើមភាគតិចពូនងជាដើម ៕
ចែករំលែកព័តមាននេះ