រាជធានីភ្នំពេញ ៖ រាជធានីភ្នំពេញ នឹងក្លាយជាមជ្ឈមណ្ឌល នៃការជួបជុំវប្បធម៌អន្តរជាតិ តាមរយៈព្រឹត្តិការណ៍ «ភូមិហ្វ្រង់កូហ្វូនី» (Village de la Francophonie) ដែលនឹងបើកដំណើរការរយៈពេល៥ថ្ងៃ ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ នៅបរិវេណសួនច្បារវត្តបទុមវតី ក្រោមប្រធានបទ «ស្នាមញញឹមខ្មែរ ស្នាមញញឹមហ្វ្រង់កូហ្វូនី» ដើម្បីបង្ហាញពីភាពសម្បូរបែប នៃអត្តសញ្ញាណ វប្បធម៌ ប្រពៃណី សិល្បៈ និងសក្តានុពលរបស់កម្ពុជា និងបណ្តាប្រទេសក្នុងសហគមន៍ហ្វ្រង់កូហ្វូនី ។
ក្នុងដំណើរត្រៀមរៀបចំសម្រាប់ព្រឹត្តិការណ៍អន្តរជាតិដ៏សំខាន់នេះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានអនុគណៈកម្មការទី៣ នៃគណៈកម្មការជាតិរៀបចំកិច្ចប្រជុំកំពូលហ្វ្រង់កូហ្វូនីលើកទី២០ ឆ្នាំ២០២៦ នៅរសៀលថ្ងៃទី១២ ខែវិច្ឆិកា ឆ្នាំ២០២៦ បានអញ្ជើញពិនិត្យមើលវឌ្ឍនភាពនៃការរៀបចំ «ភូមិហ្វ្រង់កូហ្វូនី» ដើម្បីធានាឱ្យការរៀបចំទីតាំង និងសកម្មភាពនានាប្រព្រឹត្តទៅដោយរលូន និងមានភាពទាក់ទាញ ស្របតាមផែនការដែលបានកំណត់ ។
ព្រឹត្តិការណ៍នេះនឹងរៀបចំពិធីបើកសម្ពោធជាផ្លូវការនៅព្រឹកថ្ងៃទី១៣ ខែវិច្ឆិកា ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងលោកជំទាវ Louise Mushikiwabo អគ្គលេខាធិការនៃអង្គការអន្តរជាតិហ្វ្រង់កូហ្វូនី (OIF)។
«ភូមិហ្វ្រង់កូហ្វូនី» ត្រូវបានរៀបចំឡើងដោយក្រសួងទេសចរណ៍ សហការជាមួយក្រសួងការបរទេស និងសហប្រតិបត្តិការអន្តរជាតិ ក្រសួងកិច្ចការនារី ក្រសួងវប្បធម៌ និងវិចិត្រសិល្បៈ រដ្ឋបាលរាជធានីភ្នំពេញ ព្រមទាំងក្រសួង ស្ថាប័នពាក់ព័ន្ធ ដោយមានគោលបំណងបង្កើតជាទីតាំងជួបជុំ ផ្លាស់ប្តូរបទពិសោធន៍ និងចែករំលែកភាពសម្បូរបែបនៃវប្បធម៌រវាងប្រទេសនានា ព្រមទាំងផ្តល់ឱកាសដល់សាធារណជនបានស្វែងយល់ពីពិភពហ្វ្រង់កូហ្វូនីកាន់តែទូលំទូលាយ។
ក្នុងរយៈពេល៥ថ្ងៃនេះ ភូមិហ្វ្រង់កូហ្វូនីនឹងបើកទទួលស្វាគមន៍គណៈប្រតិភូ ភ្ញៀវទេសចរជាតិ អន្តរជាតិ និងសាធារណជន ចាប់ពីម៉ោង១០:០០នាទីព្រឹក ដល់ម៉ោង៩:០០នាទីយប់ ដោយមានកម្មវិធីចម្រុះជាច្រើន រួមមាន៖
១- តំបន់ពន្លាជាតិ៖ មានការតាំងបង្ហាញអំពីអត្តសញ្ញាណជាតិ វប្បធម៌ ប្រពៃណី សិល្បៈ សក្តានុពលទេសចរណ៍ និងសមិទ្ធផលនានារបស់ប្រទេស រដ្ឋ និងតំបន់ដែលជាសមាជិកអង្គការ OIF ព្រមទាំងស្ថាប័នចំណុះអង្គការ OIF សរុបចំនួន៧៣ទីតាំងពន្លា។
២- សន្និសីទ និងកិច្ចពិភាក្សា៖ មានការរៀបចំសន្និសីទ និងវេទិកាពិភាក្សាលើប្រធានបទចម្រុះប្រមាណ៤០កម្មវិធី ដើម្បីផ្លាស់ប្តូរចំណេះដឹង បទពិសោធន៍ និងទស្សនៈពាក់ព័ន្ធនឹងកិច្ចសហប្រតិបត្តិការក្នុងសហគមន៍ហ្វ្រង់កូហ្វូនី។
៣- ការសម្តែងសិល្បៈ និងវប្បធម៌៖ មានការសម្តែងសិល្បៈ និងវប្បធម៌របស់បណ្តាប្រទេសសមាជិកអង្គការ OIF ព្រមទាំងទស្សនីយភាពសិល្បៈរបស់កម្ពុជា ដែលរៀបចំដោយក្រសួងវប្បធម៌ និងវិចិត្រសិល្បៈ សរុបជាង៥០កម្មវិធី ដើម្បីបង្ហាញពីភាពសម្បូរបែបនៃសិល្បៈ និងអរិយធម៌របស់ប្រទេសនីមួយៗ។
៤- តំបន់តាំងពិព័រណ៍ទូទៅ៖ មានការចូលរួមពីបណ្តាប្រទេសសមាជិកអង្គការ OIF ក្រសួង ស្ថាប័នសាធារណៈ រដ្ឋបាលរាជធានី-ខេត្ត សមាគម អង្គការជាតិ និងអន្តរជាតិ ព្រមទាំងវិស័យឯកជន សរុបចំនួន១៣០ស្តង់ សម្រាប់បង្ហាញសមិទ្ធផល ផលិតផល សេវាកម្ម និងសក្តានុពលនានា។
៥- ភូមិអាហារហ្វ្រង់កូហ្វូនី៖ ជាទីតាំងសម្រាប់បង្ហាញ និងផ្សព្វផ្សាយម្ហូបអាហារ ភេសជ្ជៈ និងផលិតផលម្ហូបអាហារដែលមានអត្តសញ្ញាណជាតិរបស់កម្ពុជា និងបណ្តាប្រទេសក្នុងសហគមន៍ហ្វ្រង់កូហ្វូនី សរុបចំនួន៣០ស្តង់ ព្រមទាំងមានសកម្មភាពកម្សាន្ត និងកម្មវិធីអមជាច្រើនទៀត។
ក្រៅពីជាព្រឹត្តិការណ៍តាំងពិព័រណ៍ និងការសម្តែងសិល្បៈ «ភូមិហ្វ្រង់កូហ្វូនី» ក៏ជាវេទិកាដ៏សំខាន់ក្នុងការជំរុញការផ្លាស់ប្តូរវប្បធម៌ ការតភ្ជាប់ទំនាក់ទំនងរវាងប្រជាជន និងប្រជាជន ការលើកកម្ពស់វិស័យទេសចរណ៍ និងការពង្រឹងសាមគ្គីភាពរវាងបណ្តាប្រទេសក្នុងសហគមន៍ហ្វ្រង់កូហ្វូនី។
តាមរយៈព្រឹត្តិការណ៍នេះ កម្ពុជានឹងមានឱកាសបង្ហាញមុខមាត់ជាតិ អត្តសញ្ញាណវប្បធម៌ ប្រពៃណី សិល្បៈ និងបដិសណ្ឋារកិច្ចដ៏កក់ក្តៅរបស់ប្រជាជនខ្មែរ ជូនដល់មិត្តភក្តិអន្តរជាតិ ព្រមទាំងបង្ហាញពីសក្តានុពលរបស់កម្ពុជាក្នុងការរួមចំណែកពង្រឹងទំនាក់ទំនង និងកិច្ចសហប្រតិបត្តិការជាមួយសហគមន៍អន្តរជាតិ។ «ស្នាមញញឹមខ្មែរ ស្នាមញញឹមហ្វ្រង់កូហ្វូនី» មិនត្រឹមតែជាប្រធានបទនៃព្រឹត្តិការណ៍ប៉ុណ្ណោះទេ ប៉ុន្តែថែមទាំងជាសារនៃមិត្តភាព សាមគ្គីភាព និងការស្វាគមន៍ពិភពលោកមកកាន់កម្ពុជាផងដែរ ៕
ចែករំលែកព័តមាននេះ