អតីតកម្មករម្នាក់ ងាកមកប្រកបរបរប្រមូលទិញមាន់ស្រែ ដឹកលក់ឆ្លងខេត្ត ទទួលបានប្រាក់ចំណេញសមរម្យ
- កំពង់ចាម
ខេត្តកំពង់ចាម ៖ បុរសម្នាក់ធ្លាប់តែស៊ីឈ្នួលនៅសត្តឃាតដ្ឋាន(កន្លែងកាប់ជ្រូក.គោ) ឱ្យគេ ដោយសារចំណាយមិនគ្រប់គ្រាន់ក្នុងគ្រួសារ ហើយក៏មានគំនិតបង្កើតថ្មី ចេញរកស៊ីជាអ្នកប្រមូលទិញមាន់ស្រែដឹកដើរលក់ឆ្លងខេត្ត ដោយទទួលបានប្រាក់ចំណេញគ្រាន់បើ ហើយថវិកាដែលរកបានយកមកផ្គត់ផ្គង់មើលថែទាំឪពុកជរានៅផ្ទះ។
លោកឌៀន ឌីម អាយុ៥១ឆ្នាំ រស់នៅស្រុកស្ទោង ខេត្តកំពង់ធំ បានរៀបរាប់ប្រាប់ឲ្យដឹងថា ប្រពន្ធរបស់គាត់បានចេញទៅស៊ីឈ្នួលធ្វើការឲ្យគេនៅរាជធានីភ្នំពេញ ក្នុងរយៈពេល២ទៅ៣ ខែទើបមកលេងផ្ទះម្ដងនៅក្នុងខេត្តកំពង់ធំ។ ដោយសារតែជីវភាពគ្រួសារមិនមានលុយចាយសម្បូរដូចគេ គាត់ក៏បានងាកចេញពីការងារនៅសត្តឃាត ដោយមានគំនិតមួយគឺសន្សំលុយបានគ្រាន់បើក៏ប្រមូលទិញមាន់ស្រែតាមភូមិឋានរបស់ប្រជាពលរដ្ឋក្នុងស្រុកស្ទោង២ទៅ៣ថ្ងៃ ទើបប្រមូលបានក្នុងរង្វង់ជាង៥០គីឡូក្រាម ដើម្បីដឹកឆ្លងខេត្តយកមកលក់នៅខេត្តកំពង់ចាម និងត្បូងឃ្មុំ។
បុរសអ្នកលក់មាន់បានបន្តឱ្យដឹងទៀតថា ពេលណាដែលបានមាន់គ្រប់ចំនួនគឺដឹកតាមម៉ូតូចាស់មួយគ្រឿងចេញពីផ្ទះឆ្ពោះមកកាន់ផ្សារនៅក្នុងក្រុងកំពង់ចាម ពេលព្រឹកព្រលឹម ហើយវិលត្រឡប់ទៅផ្ទះវិញនៅពេលយប់ឯណោះ។ រាល់ថ្ងៃគាត់មើលថែឪពុកចាស់ជរាម្នាក់ ចំណែកប្រពន្ធទៅស៊ីឈ្នួលបម្រើការងារជាអ្នកអនាម័យនៅតាមផ្ទះឱ្យគេក្នុងរាជធានីភ្នំពេញ ដើម្បីបានថវិកាសម្រាប់ផ្គត់ផ្គង់ជីវភាពគ្រួសារ។
បុរសនេះបញ្ជាក់ថា ពីមុនមកគាត់ធ្លាប់ស៊ីឈ្នួលជាអ្នកកាប់គោ ក្របី ឱ្យគេនៅក្នុងស្រុកស្ទោង ខេត្តកំពង់ធំ តែប្រាក់ខែបានមកចាយមិនគ្រប់គ្រាន់ក៏មានគំនិតមួយដោយយកលុយដែលសន្សំបានល្មម និងចេញប្រកបរបរថ្មីជាអ្នកទិញមាន់ក្នុងស្រុករបស់គាត់ ដើម្បីយកមកលក់នៅខេត្តកំពង់ចាមបានរយៈពេលជាងមួយខែមកហើយ ក្នុងមួយជើងគាត់អាចទទួលបានប្រាក់ចំណេញក្នុងរង្វង់១០ ទៅ១២ម៉ឺនរៀល។ ចំពោះមាន់ដែលទិញនៅតាមភូមិគឺគាត់រកមើលមាន់ណាដែលមានសុខភាពល្អ មិនឈឺ ដើម្បីយកមកដាក់ក្នុងទ្រុងធំឱ្យចំណីថែរក្សាបានល្អ ពេលគ្រប់ចំនួនហើយ លើកប្រមូលដាក់លើម៉ូតូដឹកចេញទៅលក់ដែលមានម៉ូយចាំទិញនៅកំពង់ចាម។
អ្នកលក់មាន់រូបនេះលើកឡើងថា គាត់មានការប្រុងប្រយ័ត្នក្នុងករណីឃើញមាន់ឈឺសំកុក ហើយក្នុងករណីបើប្រទះឃើញសង្ស័យឆ្លងផ្ដាសាយបក្សី(H5N1) គាត់នឹងរាយការណ៍ជូនទៅដល់កម្លាំងពេទ្យសត្វដើម្បីទប់ស្កាត់កុំឲ្យជំងឺនេះឆ្លងពីសត្វមកមនុស្ស ៕
ចែករំលែកព័តមាននេះ