សូមប្រយ័ត្ន! ត្រឹមតែ១០ថ្ងៃដំបូងនៃខែវិច្ឆិកា គ្រោះថ្នាក់ចរាចរណ៍បាត់បង់ជីវិតមនុស្ស៥០នាក់ និងរបួស១២៦នាក់
- ភ្នំពេញ
រាជធានីភ្នំពេញ ៖ សូមគោរពច្បាប់ចរាចរណ៍ និងបើកបរប្រុងប្រយ័ត្នជានិច្ច ព្រោះថា គ្រាន់តែក្នុងរយៈពេល១០ថ្ងៃ គិតចាប់ពីថ្ងៃទី១ រហូតដល់ថ្ងៃទី១០ ខែវិច្ឆិកា ឆ្នាំ២០២៦ មានហេតុការណ៍គ្រោះថ្នាក់ចរាចរណ៍ផ្លូវគោកនៅទូទាំងប្រទេសបានបន្តកើតឡើងចំនួន៧៥ករណី បណ្តាលឱ្យបាត់បង់ជីវិតមនុស្ស៥០នាក់ និងបង្កឱ្យមានអ្នករងរបួសធ្ងន់ និងស្រាលចំនួន១២៦នាក់ ។ នេះបើតាមរបាយការណ៍របស់ក្រសួងមហាផ្ទៃ ។
របាយការណ៍ឱ្យដឹងទៀតថា គ្រោះថ្នាក់ភាគច្រើនបានកើតឡើងនៅចន្លោះពេលយប់ ដោយមានរហូតដល់៤០ លើ៧៥ករណី ខណៈមូលហេតុចម្បង រួមមានការបើកបរលើសល្បឿនកំណត់ចំនួន៤០ករណី មិនគោរពសិទ្ធិចំនួន៩ករណី ស្រវឹង៨ករណី មិនប្រកាន់ស្ដាំ ៨ករណី ប្រជែងចំនួន៦ករណី បត់មិនប្រយ័ត្ន៣ករណី និងមិនគោរពសញ្ញាចរាចរណ៍ ១ករណី ។
ប្រភពថា គ្រោះថ្នាក់ទាំងនេះបានកើតឡើងនៅក្នុងមូលដ្ឋាន រាជធានីភ្នំពេញ ខេត្តកណ្តាល កំពង់ស្ពឺ កំពត ព្រះសីហនុ កំពង់ឆ្នាំង កោះកុង ពោធិ៍សាត់ បាត់ដំបង បន្ទាយមានជ័យ ឧត្តរមានជ័យ សៀមរាប ស្ទឹងត្រែង រតនគិរី មណ្ឌលគិរី ក្រចេះ ត្បូងឃ្មុំ កំពង់ចាម ព្រៃវែង និងខេត្តស្វាយរៀង ។
សូមជម្រាបថា កាលពីខែតុលា មានគ្រោះថ្នាក់ចរាចរណ៍ផ្លូវគោកនៅទូទាំងប្រទេស បានកើតឡើងចំនួន ២១៩ករណី បណ្តាលឱ្យបាត់បង់ជីវិតមនុស្សចំនួន១៤៧នាក់ និងបង្កឱ្យមានអ្នករងរបួសធ្ងន់ និងស្រាលចំនួន៣៨៣នាក់៕
ចែករំលែកព័តមាននេះ