ទីក្រុងបាងកក៖ ចេកណាំវ៉ាកំពុងត្រូវប៉ាន់ខ្លាំងនៅប្រទេសថៃ មិនត្រឹមតែលក់បានថ្លៃប៉ុណ្ណោះទេ ថ្លៃហើយនៅតែមានមនុស្សសម្រុកទិញ រកតែចេកលក់គ្មានផង។ បន្ទាប់ពីប្រទេសថៃទទួលរងអាកាសក្ដៅហួតហែងកាលពីរដូវប្រាំងកន្លងទៅនេះ ដើមចេកណាំវ៉ាងាប់ខ្ទេចខ្ទីគ្មានសល់។ ដូច្នេះ ផ្លែចេកណាំវ៉ាចាប់ផ្ដើមឡើងថ្លៃខ្លាំងនៅលើទីផ្សារ។ គេរំពឹងថាពីនេះទៅមុខពីបីខែទៀត…
ទីក្រុងបាងកក៖ ចេកណាំវ៉ាកំពុងត្រូវប៉ាន់ខ្លាំងនៅប្រទេសថៃ មិនត្រឹមតែលក់បានថ្លៃប៉ុណ្ណោះទេ ថ្លៃហើយនៅតែមានមនុស្សសម្រុកទិញ រកតែចេកលក់គ្មានផង។ បន្ទាប់ពីប្រទេសថៃទទួលរងអាកាសក្ដៅហួតហែងកាលពីរដូវប្រាំងកន្លងទៅនេះ ដើមចេកណាំវ៉ាងាប់ខ្ទេចខ្ទីគ្មានសល់។ ដូច្នេះ ផ្លែចេកណាំវ៉ាចាប់ផ្ដើមឡើងថ្លៃខ្លាំងនៅលើទីផ្សារ។ គេរំពឹងថាពីនេះទៅមុខពីបីខែទៀត ចេកណាំវ៉ានៅតែឡើងថ្លៃដដែល។ នេះបើយោងតាមការព្យាកររបស់អ្នកបោះដុំ។
សព្វថ្ងៃនេះ ចេកណាំវ៉ាមួយស្និតលក់ចេញចាប់ពី៥០ទៅ៦០បាត (១,៤៦-១,៧៦ដុល្លារ)។ មានន័យថាឡើងថ្លៃមួយជាពីរបើប្រៀបធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមអ្នកបោះដុំចេកណាំម្នាក់ឈ្មោះសុឆាដា ខងភូន (Suchada Kongpunt)។ កាលពីខែមេសាកន្លងទៅនេះ អាកាសធាតុក្ដៅខ្លាំងណាស់។ ម៉្យាងទៀតគ្មានភ្លៀងកក់ខែទាល់តែសោះ។ ដូច្នេះ កូនចេកតូចៗដែលទើបតែដុះពន្លកថ្មីៗក៏ត្រូវងាប់ស្ទើរតែទាំងអស់នៅទូទាំងប្រទេសថៃ។
អ្នកលក់ចេកខាងលើនេះប្រាប់ថាដោយសារមូលហេតុទាំងនេះហើយទើបបានជាធ្វើឱ្យចេកណាំវ៉ាខ្សត់ខ្សោយទៅៗ ធ្វើឱ្យតម្លៃនៅលើទីផ្សារហក់ឡើងខ្ពស់កប់ពពក។ តម្លៃហក់ឡើងខ្ពស់ក៏ដោយសារពួកឈ្មួញដណ្ដើមគ្នាទិញចេកណាំវ៉ា។ អ្នកខ្លះហ៊ានឱ្យថ្លៃខ្ពស់ដើម្បីប្រមូលទិញដល់កន្លែងដាំរបស់ប្រជាកសិករ។ ម៉្យាងទៀត ការចំណាយលើថ្លៃប្រេងឥន្ធនៈដឹកជញ្ជូនចេកពីចម្ការចូលទៅក្នុងទីផ្សារក៏ធ្វើឱ្យចេកណាំវ៉ាឡើងថ្លៃផងដែរ។
អ្នកស្រីសុឆាដាប្រាប់ថាចេកណាំវ៉ាអាចនឹងឡើងថ្លៃថែមទៀតនៅរយៈពេល២ខែខាងមុខនេះ។ លោកស្រីគិតថាហេងស៊យអាចឡើងថ្លៃដល់មួយស្និតមួយរយបាតផងក៏មិនដឹង។ ប្រធាននាយកដ្ឋានជំរុញវិស័យកសិកម្មទទួលស្គាល់ថាចេកណាំវ៉ាឥឡូវនេះពិតខ្សត់មែនទែន។ ជាពិសេស នៅតំបន់ទីប្រជុំជន។ ថ្វីដ្បិតចេកណាំវ៉ាកំពុងត្រូវប៉ាន់យ៉ាងណាក្ដី ក៏ប៉ុន្តែទិន្នផលដែលទទួលបានមិនអាចឆ្លើយតបទៅនឹងតម្រូវការបានឡើយ។ មូលហេតុដោយសារដំណាំនេះមិនសូវចំណេញប៉ុន្មានទេ។
ទម្រាំចេកដាក់ផ្លែរហូតដល់អាចកាប់ចេញពីស្ទងយកទៅបន្ទុំគឺស៊ីពេលច្រើនខែណាស់។ នៅពេលបានចេកយកទៅលក់ហើយទូទាត់ថ្លៃដើម និងថ្លៃលក់គឺមិនសូវចំណេញទេ។ ពេលខ្លះលក់ខាតថែមទៀត។ យោងតាមការស្រាវជ្រាវរបស់នាយកដ្ឋានខាងលើនេះ កសិករត្រូវចំណាយថ្លៃដាំដុះជាមធ្យម៩,៦បាតក្នុងមួយស្និត។ កាលពីឆ្នាំមុន ចេកណាំវ៉ាមួយស្និតលក់បានតែ២,៦៤បាតតែប៉ុណ្ណោះ។
ហេតុនេះ កសិករលែងចង់ដាំចុះតទៅទៀត។ នៅទីផ្សារបោះដុំចេកណាំវ៉ាធំជាងគេរបស់ប្រទេសថៃ តម្លៃចេកប្រភេទនេះឡើងថ្លៃជាបន្តបន្ទាប់ចាប់តាំងពីខែមិថុនាដោយសារខែក្ដៅខ្លាំងដាំមិនសូវបានផលច្រើនប៉ុន្មានឡើយ។ ចេកណាំវ៉ាដែលលក់នៅលើទីផ្សារសព្វថ្ងៃនេះមានផ្លែតូចៗ បរិភោគមិនសូវឆ្ងាញ់ដូចលើកមុនទេ។ ចេកណាំវ៉ានឹងបន្តឡើងថ្លៃរហូតដល់ចុងឆ្នាំ២០២៤។
បើទុកជាតម្លៃចេកណាំវ៉ាធ្លាក់ថ្លៃក៏ធ្លាក់តិចតួច ហើយធ្លាក់ត្រឹមតែមួយរយៈពេលខ្លីតែប៉ុណ្ណោះ។ ឥឡូវនេះ ចេកណាំវ៉ាក៏មិនមែនងាយស្រួលដាំប៉ុន្មានដែរដោយសារគ្រោះរាំងស្ងួត, សត្វល្អិតបំផ្លាញ និងជំងឺរបស់រុក្ខជាតិ។ លោកប្រធាននាយកដ្ឋានខាងលើនេះបានផ្ដាំទៅកសិករមុននឹងដាំចេកណាំវ៉ាសូមរកពេលវេលាល្អសិន។ បើមិនអីចឹងទេដាំសុខៗជួបនឹងអាកាសធាតុរាំងស្ងួត។ ជួនកាលនៅពេលប្រមូលផលបានមកហើយបែរជាលក់បានថោក។ ទាំងនេះហើយជាបញ្ហាប្រឈមរបស់ពួកគេ៕
ចែករំលែកព័តមាននេះ