ADផ្ទាំងផ្សព្វផ្សាយពាណិជ្ជកម្ម

Picture

ថ្នាក់​ដឹក​នាំចិន​ជំរុញ​ឱ្យ​គាំទ្រ​ពាណិជ្ជ​កម្ម​សេរី និង​បើក​ទូលាយ និង​​ប្រឆាំង​​ដាច់​ខាត​​នយោបាយ​គាំពារ​និយម

2 ថ្ងៃ មុន

ទី​ក្រុង​ស៊ឹន​ចិន៖ ប្រធានា​ធិបតីចិន លោក​ស៊ី​ជីន​ពីង បាន​អំពាវ​​នាវ​​​ឱ្យ​មាន​ការ​គាំទ្រយ៉ាង​ខ្លាំង​ក្លា​ចំពោះ​​ពាណិជ្ជ​កម្ម​ដែល​ប្រកប​ដោយ​ភាព​​សេរី និង​បើក​ទូលាយ​ ហើយ​លោក​​ប្រកាស​ប្រឆាំង​នឹង​នយោយបាយ​គាំ​ពារ​និយម​​។ លោក​ថ្លែង​ដូច្នេះ​នៅ​ពេល​បើក​កិច្ច​ប្រជុំ​កំពូល​អេប៉ិច​។ គេ​រំពឹង​ថា​លោក​នឹង​ជួប​គ្នា​ត្រី​ភាគី​ជា​មួយ​សមភាគី​អាមេរិក និង​រុស្ស៊ី​។ ប្រសាសន៍​របស់​លោក​ស៊ី​ជីន​ពីង​ធ្វើ​ឡើង​បន្ទាប់​ពី​ទី​ក្រុង​វ៉ាស៊ីនតោន​ប្រកាស​​រឹត​ត្បិត​បន្ថែម​ទៀត​ទៅ​លើ​ការ​នាំ​ចេញ​បន្ទះ​ឈីប​បំពាក់​បច្ចេក​វិទ្យា​ទំនើប​​របស់​ក្រុមហ៊ុន​ Nvidia។

បើ​ដូច្នេះ​មែន​ វា​នឹង​រឹត​តែ​ធ្វើ​ឱ្យ​ជម្លោះ​ពាណិជ្ជ​កម្ម​រវាង​អាមេរិក និង​ចិន​ដែល​ទើប​តែ​ស្ងប់​ស្ងាត់​នោះ​កាន់​តែ​ពិបាក​ដោះ​ស្រាយ​។ ប្រទេស​ចិន​ប្រកាស​ថា​ខ្លួន​នឹង​ចាត់​វិធាន​ការ​វាយ​បក​វិញ​ចំពោះ​ចំណាត់​ការ​របស់​អា​មេរិក​។ លោក​ស៊ី​ជីន​ពីង​ថ្លែង​ថា​យើង​ត្រូវ​តែ​ប្រកាន់​ខ្ជាប់​ទៅ​តាម​ប្រព័ន្ធ​ពាណិជ្ជ​កម្ម​ដែល​ផ្អែក​លើ​វិធាន​ជា​គោល ហើយ​​ស្រប​ទៅ​តាម​គោល​ការណ៍​របស់​អង្គ​ការ​ពាណិជ្ជ​កម្ម​ពិភពលោក,​ ​ត្រូវ​គាំទ្រ​ការ​ធ្វើ​ពាណិជ្ជ​កម្ម​ និង​វិនិយោគ​​ដែល​ប្រកប​ដោយ​ភាព​សេរី និង​បើក​ទូលាយ, ត្រូវ​រក្សា​ស្ថិរ​ភាព និង​ប្រតិ​បត្តិ​ការ​ដោយ​រលូន​នៃ​ប្រព័ន្ធ​ឧស្សាហ​កម្ម​ និង​សង្វាក់​ផ្គត់​ផ្គង់​ជា​សាកល​​។

ដៃ​គូ​ពាណិជ្ជ​កម្ម​របស់​ចិន​រិះ​គន់​ថា​ចិន​ចំណេញ​មួយ​ឆ្នាំ​ៗ​​១​ទ្រី​លាន​ដុល្លារ​ពី​គោល​នយោ​បាយ​ដែល​គាំទ្រ​វិស័យ​ផលិត​កម្ម​របស់​ខ្លួន​ ហើយ​​ធ្វើ​ឱ្យ​អ្នក​ប្រើ​ប្រាស់ខាត​បង់​ប្រាក់​កាស​កាន់​តែ​ច្រើន​។ ទី​ក្រុង​ប៉េ​កាំង​អះ​អាង​ថា​ផែន​ការ​ស្ដី​ពី​កំណើន​សេដ្ឋ​កិច្ច​របស់​ខ្លួន​ប្រព្រឹត្ត​ទៅ​ដោយ​សម​រម្យ​។ ប៉ុន្តែ​អាមេរិក​ អឺរ៉ុប និង​ប្រទេស​ដទៃ​ទៀត​ព្រួយ​បារម្ភ​អំពី​ទំនិញ​របស់​ចិន​ដែល​ច្រើន​លើស​លប់​នៅ​លើ​សាកល​លោក​ ហើយ​ធ្វើ​ឱ្យ​ចិន​មាន​ប្រៀប​ខាង​ភូមិ​សាស្ត្រ​​នយោ​បាយ​។ ពួក​គេ​និយាយ​ថា​គោល​នយោបាយ​របស់​ចិន​គំរាម​កំហែង​វិស័យ​ឧស្សាហ​កម្ម​ និង​ការ​ងារ​របស់​ពួក​គេ​។

លោក​ស៊ី​ជីន​ពី​ង​ថ្លែង​ថា​ប្រទេស​ចិន​នឹង​បន្ត​វិនិយោគ​នៅ​ក្នុង​វិស័យ​ឧស្សាហ​កម្ម​ និង​ខិត​ខំ​អភិ​វឌ្ឍ​បច្ចេក​វិទ្យា​ថ្មី​ៗ​ដែល​នឹង​ផ្ដល់​ផល​ប្រយោជន៍​សម្រាប់​ប្រទេស​ដទៃ​។ ប្រទេស​ចិន​នឹង​បន្ធូរ​បន្ថយ​អត្រា​ពន្ធ​គយ​ ហើយ​នឹង​បើក​ទី​ផ្សាររបស់​ខ្លួន​កាន់​តែ​ធំ​ទូលាយ​។ ទន្ទឹម​នឹង​នោះ ចិន​នៅ​តែ​ប្រឆាំង​នយោ​បាយ​គាំពារ​និយម និង​ឯក​តោ​ភាគី​និយម​។ សារ​នយោបាយ​របស់​លោក​ស៊ី​ជីន​ពីង​ហាក់​ស្រប​ទៅ​នឹង​គោល​ជំហរ​របស់​​បណ្ដា​ប្រទេស​នៅ​តំបន់​អឌ្ឍ​គោល​ខាង​ត្បូង​ ហើយ​នឹង​ពង្រឹង​កិច្ច​ខិត​ខំ​ប្រឹង​ប្រែង​របស់​ទី​ក្រុង​ប៉េកាំង​ក្នុង​ការ​អនុ​វត្ត​​យុទ្ធ​សាស្ត្រ​បច្ចេក​វិទ្យា​របស់​ខ្លួន​ផ្ទុយ​ពី​វ៉ាស៊ីន​តោន​។ ខាង​លើ​នេះ​ជា​ការ​យល់​ឃើញ​របស់​លោក​​ចច​ឈឹន (George Chen) ដែល​ជា​ដៃ​គូ​ និង​ជា​នាយក​ក្រុម​ហ៊ុន​ឌីជីថល​ The Asia Group៕​ ប្រភព៖ Reuters​