កាលពីថ្ងៃសៅរ៍ កន្លងទៅនេះ លោកម៉ារ៉ាដូណា បាននិយាយថា លោកនឹងចាត់វិធានការផ្លូវច្បាប់ប្តឹងលោក Julio Grondona ប្រធានសហព័ន្ធបាល់ទាត់អាហ្សង់ទីន ពីបទផ្សព្វផ្សាយព័ត៌មានមិនពិត។ លោក Julio Grondona បានផ្សព្វផ្សាយថា លោកម៉ារ៉ាដូណា ជាប់ពាក់ព័ន្ធទៅនឹងការបន្តប្រើប្រាស់សារធាតុញៀន និងគ្រឿងស្រវឹង។ លោកម៉ារ៉ាដូណា បាននិយាយថា លោកឈប់ប្រើប្រាស់សារធាតុញៀន និងគ្រឿងស្រវឹងអស់រយៈពេលជាង៦ឆ្នាំហើយ តែលោក Julio Grondona បានផ្តល់កិច្ចសម្ភាសន៍តាមទូរទស្សន៍ថា លោកកំពុងបន្តប្រើប្រាស់វាទៀត។
ជាមួយនឹងការផ្តល់បទសម្ភាសន៍បែបនេះ លោកម៉ារ៉ាដូណា បានបញ្ជាក់ថា លោកបាននឹងកំពុងទាក់ទងជាមួយមេធាវីរបស់លោកដើម្បីរៀបចំដាក់ពាក្យបណ្តឹង តែលោកមិនបានបញ្ជាក់ឱ្យដឹងថា ពេលណានោះទេ។ លោកបានបន្តទៀតថា លោក Grondona គឺជាមនុស្សចាស់វង្វេង និងជាមនុស្សមានរោគចិត្ត ហើយក៏ជាមនុស្សក្បត់មួយដែរ ពីព្រោះលោក Grondona ធ្លាប់បានសន្យាជាមួយលោកថា នឹងឱ្យបន្តតំណែងជាគ្រូបង្វឹកក្រោយពេលត្រឡប់មកពីប្រកួតបាល់ទាត់ពិភពលោកឆ្នាំ២០១០ នៅអាហ្វ្រិកខាងត្បូង តែក្រោយមកលោក Grondona បានក្បត់ពាក្យសន្យាធ្វើឱ្យរូបលោកក្លាយជាមនុស្សគ្មានការងារធ្វើ។
ជម្លោះរវាងលោក Grondona និងលោកម៉ារ៉ាដូណា បានក្លាយទៅជាប្រធានបទមួយដ៏ក្តៅគគុកក្រោយពីប្រកួតបាល់ទាត់ពិភពលោក តែទីបំផុតលោកម៉ារ៉ាដូណា គឺជាអ្នកចាញ់ ហើយត្រូវដើរចេញ ពីព្រោះលោកមិនធ្វើតាមការបញ្ជារបស់លោក Grondona ដែលបង្ខំឱ្យរូបលោកបណ្តេញជំនួយការគ្រូបង្វឹកមួយចំនួនចេញ៕
ចែករំលែកព័តមាននេះ