នៅប្រជុំកោះតុងហ្គា ពលរដ្ឋបាននាំគ្នារត់ភៀសខ្លួនទៅកាន់ទីខ្ពស់ ដើម្បីគេចពីរលកយក្សស៊ូណាមី បណ្ដាលមកពីការផ្ទុះគួរឲ្យភ្ញាក់ផ្អើល នៃភ្នំភ្លើង
ប្រជុំកោះតុងហ្គា ៖ នៅប្រជុំកោះតុងហ្គា ពលរដ្ឋបាននាំគ្នារត់ភៀសខ្លួន កាលពីយប់ថ្ងៃទី១៥ ខែមករា ឆ្នាំ២០២២ ទៅកាន់ទីខ្ពស់ ដើម្បីគេចពីរលកយក្សស៊ូណាមី បណ្ដាលមកពីការផ្ទុះគួរឲ្យភ្ញាក់ផ្អើល នៃភ្នំភ្លើង HUNGA TONGA-HUNGA HA’APAI ដែលគេបានចេញការប្រកាសអាសន្នស៊ូណាមី នៅសហរដ្ឋអាមេរិក ស៊ីលី ជប៉ុន និងប្រទេសមួយចំនួនទៀត។
បណ្ដារូបភាពដែលគេថតបាន បង្ហាញភ្នំភ្លើងផ្ទុះដែលបញ្ចេញពពកផ្សែង និងផេះ ព្រមទាំងរលកយក្សដែលកើតមានភ្លាមៗ នៅជុំវិញ ប្រជុំកោះនេះក្នុងមហាសមុទ្រប៉ាស៊ីហ្វិក។
ភ្នំភ្លើង HUNGA TONGA-HUNGA HA’APAI ស្ថិតនៅលើកោះមួយ ក្នុងចំណោមកោះគ្មានមនុស្សរស់នៅនៃប្រជុំកោះតុងហ្គា ស្ថិតនៅចម្ងាយប្រមាណជា៦៥គីឡូម៉ែត្រ ពីរដ្ឋធានីរបស់ប្រទេស គឹក្រុង NUKU’ALOGIE ដែលការផ្ទុះកាលពីថ្ងៃទី១៤ ខែមករា បណ្ដាលឲ្យមានរលកយក្សស៊ូណាមីកម្ពស់១,២០ម៉ែត្រ។ នេះបើតាមការិយាល័យឧតុនិយមអូស្ត្រាលី។
ស៊ូណាមីនាពេលមុននេះ រលកមានកម្ពស់មិនលើសពី៣០សង្ទីម៉ែត្រឡើយ។ ការប្រកាសអាសន្នទើបត្រូវបានលុបចោលពេលភ្នំភ្លើងផ្ទុះជាថ្មី។ ពលរដ្ឋតុងហ្គានិយាយថា ការផ្ទុះភ្នំភ្លើងនេះពិតជាខ្លាំង ដោយដីញ័ររង្គើរក៏ដូចជាផ្ទះ ហើយរលកសមុទ្រធំៗក៏កើតមាន។ ប៉ុន្មាននាទីក្រោយការផ្ទុះទឹកបានរាតត្បាតលិចផ្ទះនានា ហើយផ្ទះមួយចំនួនក៏រលំបាក់។
រលកយក្សស៊ូណាមី នាថ្ងៃទី១៥ ខែមករា បានមកដល់ឆ្នេរសមុទ្រជប៉ុនក្រោយការផ្ទុះភ្នំភ្លើងនោះ។ រលកយក្សកម្ពស់ដល់ជិត៣ម៉ែត្រ បានមកដល់ឆ្នេរសមុទ្រជប៉ុន។ នេះបើតាមការអះអាងរបស់ទីភ្នាក់ងារឧតុនិយមជាតិជប៉ុន។ ទីភ្នាក់ងារនោះបញ្ជាក់ថា រលកយក្សកម្ពស់១,២ម៉ែត្រ បានមកដល់កោះ AMAMI OCHIMA ភាគខាងត្បូងប្រទេស នាវេលាម៉ោង២៣និង៥៥នាទីម៉ោងក្នុងស្រុកថ្ងៃទី១៥ ខែមករា មុនពេលតំបន់ដទៃៗទៀត តាមបណ្ដោយឆ្នេរប៉ាស៊ីហ្វិកជប៉ុនសង្កេតឃ្រើញរលកតូចៗ។
ការប្រកាសអាសន្នស៊ូណាមី ត្រូវបានធ្វើនៅប្រជុំកោះហ្វុីជី និងប្រជុំកោះសាម៉ាវ នូវែលហ្សេឡង់ វ៉ានូអាទូ ស៊ីលី អូស្ត្រាលី និងសហរដ្ឋអាមេរិកផងដែរ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ