រាជធានីភ្នំពេញ ៖ នៅទីបំផុតសំណុំឯកសារពាក់ព័ន្ធនឹងការស្នើសុំដាក់បញ្ចូលក្បាច់គុនល្បុក្កតោ ជាសម្បត្តិបេកតិកភ័ណ្ឌពិភពលោកបានធ្វើរួចរាល់ហើយ ដោយកម្ពុជារំពឹងថានឹងបញ្ចប់តាមការគ្រោងទុកនៅខែតុលាខាងមុខនេះ គឺមុនកាលកំណត់ដែលកម្ពុជានឹងស្នើដាក់នៅដើមឆ្នាំ២០១៧ នៅអង្គការ UNESCO ។ នេះជាព័ត៌មានដែលទទួលបានការចាប់អារម្មណ៍ភាគច្រើន ដោយសារតែល្បុក្កតោ ជាក្បាច់គុនចំណាស់ និងមានការទទួលស្គាល់ទូលំទូលាយ រួចមកហើយនៅលើពិភពលោក ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានបង្ហើបឱ្យដឹងនៅក្នុងពិធីចុះអនុស្សណៈនៃការយោគយល់ ស្ដីពីការដាក់បញ្ចូលក្បាច់គុនបុរាណខ្មែរទៅក្នុងការហ្វឹកហ្វឺនរបស់កងយោធពលខេមរភូមិន្ទ កាលថ្ងៃពុធកន្លងទៅថា ក្បាច់គុនល្បុក្កតោ ត្រូវបានចាត់ចែងរៀបចំឯកសារយ៉ាងសស្រាក់សស្រាំ ដើម្បីឱ្យបានរួចរាល់តាមការគ្រោងទុករបស់អង្គការ UNESCO ក្នុងគម្រោងស្នើសុំដាក់បញ្ចូលជាសម្បត្តិបេតិកភ័ណ្ឌពិភពលោក ។ លោកថា ឯកសារទាំងស្រុងនឹងត្រូវរួចរាល់នៅខែតុលា ហើយបន្ទាប់ពីបានរួចរាល់ គឺគម្រោងយកទៅឆ្លងនៅអង្គការ UNISCO នឹងត្រូវធ្វើឡើងតាមអ្វីដែលបានកំណត់ ។ លោកបង្ហាញការសាទរយ៉ាងខ្លាំងបន្ទាប់ពីក្បាច់គុនដ៏ចំណាស់មួយនេះ ក្រៅពីត្រូវបានទទួលស្គាល់ហើយ ក៏ត្រូវត្រៀមដាក់បញ្ចូលជាសម្បត្តិមនុស្សជាតិ ដែលមិនអាចមានអ្នកណាចម្លងបាន ឬលួចបាននោះទៅទៀត ។ ឯកសារដែលបានរៀបចំរួមមានទាំងវីដេអូឃ្លីប ទាំងឯកសារសំណេរ ដោយត្រូវធ្វើជាភាសាអន្តរជាតិនោះផង ដើម្បីងាយស្រួលពន្យល់មហាជន និងបណ្ដាប្រទេសដែលមានសិទ្ធិទទួលយកល្បុក្កតោឱ្យក្លាយជាសម្បត្តិពិភពលោកយល់ច្បាស់ ។
លោកនិយាយថាខែ៩ ឬខែ១០ ក្រុមការងារទាំងមូលនឹងធ្វើឱ្យចប់នូវឯកសារទាំងនោះ បន្ទាប់ពីបានប្រមូលកីឡាករចំណាស់ៗ និងអ្នកយល់ដឹងពីល្បុក្កតោ ដែលលោកចាត់ទុកថា ជាឯកសាររស់មកផលិតជាវីដេអូឃ្លីប និងប្រមូលភស្ដុតាងរាប់មិនអស់ផ្សេងទៀតដើម្បីចងក្រងជាឯកសារ។ លោកថា កាលពីមុនឯកសារក្នុងការដាក់ស្នើមានចំណុចខ្វះខាតទើបបណ្ដាលឱ្យក្បាច់គុនល្បុក្កតោបរាជ័យក្នុងគម្រោងដាក់បញ្ចូលជាសម្បត្តិវប្បធម៌ពិភពលោក ។ ប៉ុន្តែក្រោមការចង្អុលបង្ហាញរបស់ក្រសួងវប្បធម៌ លោកថា ក្រុមការងារទាំងមូលបានស្ទុះស្ទាដុតដៃដុតជើងយ៉ាងខ្លាំង ដោយផ្អែកតាមលទ្ធផលការងារចុងក្រោយ គឺមើលទៅប្រសើរឡើងចង់លើសពីការគ្រោងទុកនោះផង ដោយសារតែឯកសាររស់ក៏មានច្រើន ហើយឯកសារជាប្រវត្តិសាស្ត្រជាច្រើនទៀត ក៏បញ្ជាក់ពីអត្តសញ្ញាណរបស់ល្បុក្កតោ ដែលមិនអាចឱ្យក្បាច់គុនមួយនេះ ត្រូវភាន់ច្រលំថា ជារបស់ជាតិសាសន៍ដទៃ ។
លោកថា ការងារផលិតឯកសារក្នុងរយៈពេលកន្លងមក បានទទួលការគាំទ្រពីសហគមន៍ ដោយភាគីជ្រោមជ្រែងទាំងនោះបានទាំងរុញឱ្យក្រុមការងារផលិតឯកសារឱ្យបានល្អ និងបានការតម្រង់ទិសពីក្រសួងវប្បធម៌ និងភាគីខាងកូរ៉េខាងត្បូងយ៉ាងពេញទំហឹងបន្ថែមទៀត។ លោកថា ដំណើរការរៀបចំឯកសារនឹងធ្វើឱ្យគ្រប់ជ្រុងជ្រោយដើម្បីធានាថា នៅដើមឆ្នាំ២០១៧ខាងមុខ គឺក្បាច់គុនល្បុក្កតោកម្ពុជាត្រូវបានដាក់បញ្ចូលឱ្យក្លាយជាសម្បត្តិរួមរបស់មនុស្សជាតិ ដែលមិនមានជាតិសាសន៍ណាមួយបំពានបាន ។ លោកបានថ្លែងការកោតសរសើរចំពោះសហព័ន្ធកីឡាល្បុក្កតោ ចំពោះក្រសួងវប្បធម៌ និងវិចិត្រសិល្បៈ និងចំពោះទីភ្នាក់ងារមូលនិធិវប្បធម៌កូរ៉េ ដែលក្រៅពីជួយសហការ គឺបានផ្ដល់ជំនួយក្នុងការផលិតនូវឯកសារទាំងនោះ ដែលលោកប្រកាសមិនហួសពីខែតុលានឹងបានជោគជ័យ ។
គួររំលឹកថា សំណើនៃការដាក់បញ្ចូលក្បាច់គុនល្បុក្កតោទៅក្នុងបញ្ជីបេតិកភ័ណ្ឌមនុស្សជាតិ បានបញ្ជូនទៅតាំងពីឆ្នាំ២០១២ម្ល៉េះ ប៉ុន្តែត្រូវបានអង្គការ UNESCOរុញត្រឡប់មកវិញ ដោយមានការណែនាំឲ្យបំពេញឲ្យមានទម្ងន់គ្រប់គ្រាន់បន្ថែមទៀត ។ ដោយឡែកសំណុំឯកសារកែច្នៃជាថ្មី ដែលរំពឹងថានឹងរួចរាល់នៅខែតុលានេះ នឹងបញ្ជូនទៅ UNESCO នៅខែមីនា ឆ្នាំ២០១៧ ខាងមុខ ។ គម្រោងនេះ ក៏មិនខុសពីការលើកមុខលើកមាត់ដល់កីឡាករល្បុក្កតោ ឱ្យមានកម្លាំងចិត្តប្រឹងប្រែងហ្វឹកហាត់ និងបានក្លាយជាធនធានល្បុក្កតោកាន់តែច្រើន ដើម្បីលើកស្ទួយដល់វិស័យនេះផងដែរ ៕
ចែករំលែកព័តមាននេះ