ប្រមុខការ៉ាតេ ដាសតឿនដល់មន្ត្រីចៅក្រម អាជ្ញាកណ្ដាលដាក់ពិន្ទុឱ្យសុក្រឹត្យបំផុត
- ភ្នំពេញ
រាជធានីភ្នំពេញ ៖ លោកសាយ ណូរ៉ា អនុប្រធានសហព័ន្ធកីឡាការ៉ាតេកម្ពុជា បានធ្វើការដាស់តឿន និងផ្ដាំផ្ញើរទៅដល់មន្ត្រីចៅ
រាជធានីភ្នំពេញ ៖ លោកសាយ ណូរ៉ា អនុប្រធានសហព័ន្ធកីឡាការ៉ាតេកម្ពុជា បានធ្វើការដាស់តឿន និងផ្ដាំផ្ញើរទៅដល់មន្ត្រីចៅក្រម និងអាជ្ញាកណ្ដាលដែលជាអ្នកផ្ដល់ពិន្ទុនៅក្នុងការប្រកួតធ្វើយ៉ាងណារាល់ការដាក់ពិន្ទុត្រូវឱ្យមានភាពសុក្រឹត្យបំផុត។លោកថ្លែងបែបនេះនាឱកាសបើកការប្រកួតជ្រើសរើសជើងឯកថ្នាក់ជាតិប្រចាំឆ្នាំ២០២១នៅមជ្ឈមណ្ឌលហ្វឹកហាត់កីឡាការ៉ាតេ ក្នុងសាកលវិទ្យាល័យភូមិន្ទភ្នំពេញកាលពីថ្ងៃទី១៤ មករា។
លោកសាយ ណូរ៉ា បានមានប្រសាសន៍ឱ្យដឹងទៀតថាចំពោះកីឡាករ កីឡាការិនីដែលបានចូលរួមសរុបទាំងអស់១៥៤នាក់ មកពីបណ្ដាក្លិប និងសមាគមមកពីតាមរាជធានីខេត្តចំនួន២៤ ។ លោកបានមានប្រសាសន៍លើកឡើងទៀតថា សហព័ន្ធកីឡាការ៉ាតេកម្ពុជានាពេលកន្លងមកធ្លាប់បានសាងស្នាដៃយ៉ាធំធេងជូនជាតិមាតុភូមិ ដូចជាការចេញទៅប្រកួតនៅលើឆាកអន្តរជាតិដណ្ដើមបានមេដាយជាច្រើនគ្រឿងមកជូនជាតិ ។ សព្វថ្ងៃសហព័ន្ធកីឡាការ៉ាតេមានគ្រូបង្ហាត់ជាជនបរទេសចំនួន២រូបគឺគ្រូជប៉ុនជាអ្នកជួយបង្ហាត់ផ្នែកកាតានិងគ្រូជនជាតិអ៊ីរ៉ង់បង្ហាត់ផ្នែកប្រយុទ្ធ ហើយឆ្លងកាត់វគ្គបណ្ដុះបណ្ដាលនាពេលកន្លងមកយើងទទួលបានចៅក្រមដែលមានកម្រិតអន្តរជាតិចំនួន៤រូបផងដែរ។
លោកក៏បានធ្វើការដាស់តឿនទៅដល់កីឡាករ កីឡាការិនីការ៉ាតេកម្ពុជា ត្រូវតែខិតខំប្រឹងប្រែងហ្វឹកហាត់ឱ្យបានសកម្មបំផុត ដើម្បីត្រៀមចូលរួមប្រកួតជ្រើសរើសជើងឯកកីឡាការ៉ាតេអាស៊ីអាគ្នេយ៍លើកទី៩ដែលកម្ពុជាទទួលធ្វើជាម្ចាស់ផ្ទះនៅខែមីនាខាងមុខនេះ ចាប់ពីថ្ងៃទី១៤ដល់ថ្ងៃទី២០ មីនា ឆ្នាំ២០២២ ហើយក៏ត្រៀមប្រកួតដណ្ដើមមេដាយដែលកម្ពុជាទទួលធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣ផងដែរ។ដូច្នេះសម្រាប់ការប្រកួតជ្រើសរើសជើងឯកថ្នាក់ជាតិនាពេលនេះក៏ជាឱកាសមួយដើម្បីធ្វើការវាស់ស្ទង់សមត្ថភាព បច្ចេកទេស ដើម្បីចូលរួមប្រកួតដែលកម្ពុជាទទួលធ្វើនាខែមិនខាងមុខ។
លោកបានឱ្យដឹងទៀតថា លោកអគ្គបណ្ឌិតសភាចារ្យអូន ព័ន្ធមុន្នីរ័ត្ន ប្រធានសហព័ន្ធកីឡាការ៉ាតេកម្ពុជាតែងតែបានយកចិត្តទុកយ៉ាងខ្លាំង ហើយលោកក៏បានធ្វើការផ្ដាំផ្ញើរទៅដល់កីឡាករ កីឡាការិនីត្រូវខិតខំប្រឹងប្រែងប្រកួតឱ្យអស់ពីសមត្ថភាព ជាពិសេសចៅក្រោមអាជ្ញាកណ្ដាលត្រូវប្រឹងប្រែងយកចិត្តទុកដាក់ក្នុងការដាក់ពិន្ទុឱ្យអស់ពីសមត្ថភាព ក្នុងការវិនិឆ័យនិងត្រឹមត្រូវតាមច្បាប់អន្តរជាតិ ដើម្បីឱ្យកីឡាករ កីឡាការិនីទទួលបានលទ្ធផលនិងសមិទ្ធិផលដោយអស់ចិត្ត ។ ចំពោះការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍លើកទី៩នេះទៀតនេះគឺជាលើកទី១ហើយក្នុងប្រវត្តិសាស្ត្រតែការខិតខំប្រឹងប្រែងរបស់ថ្នាក់ដឹកនាំសហព័ន្ធនិងមានការចូលរួមពីប្រមុខរាជរដ្ឋាភិបាលនៅក្នុងវិស័យកីឡាដែលស្ថិតនៅក្នុងបរិបទកូវីដធ្វើឱ្យព្រឹត្តិការណ៍នៃការប្រកួតនាពេលខាងមុខ អាចដំណើរការទៅបាន ៕
ចែករំលែកព័តមាននេះ