ដង្កូវហ្វូងកំពុងបំផ្លាញ ស្រូវពង្រោះប្រជាកសិករ
ខេត្តព្រះសីហនុ ៖ ដង្កូវហ្វូងជាដង្កូវម្យ៉ាងដែលកំពុងស៊ីបំផ្លាញស្រូវពង្រោះរបស់បងប្អូនប្រជាកសិករនៅក្នុងឃុំមួយចំនួនក្នុងស្រុកព្រៃនប់ ហើយនោះគឺជាសត្វប្រភេទទីបី
ខេត្តព្រះសីហនុ ៖ ដង្កូវហ្វូងជាដង្កូវម្យ៉ាងដែលកំពុងស៊ីបំផ្លាញស្រូវពង្រោះរបស់បងប្អូនប្រជាកសិករនៅក្នុងឃុំមួយចំនួនក្នុងស្រុកព្រៃនប់ ហើយនោះគឺជាសត្វប្រភេទទីបី ដែលបានមកស៊ី និងកាត់បំផ្លាញស្រូវពង្រោះដែលទើបព្រោះ ក្នុងដើមរដូវវស្សាឆ្នាំនេះដែលទីមួយគឺកណ្តុរ ទីពីរខ្យង ហើយសម្រាប់សត្វដង្កូវនេះ កាលពីឆ្នាំកន្លងទៅតំបន់ស្រុកព្រៃនប់ មិនដែលមានមកកាត់បំផ្លាញឡើយ គឺមានតែខ្យងតែប៉ុណ្ណោះ ចម្លែកតែឆ្នាំនេះកើតចេញនូវសត្វចង្រៃប្រភេទនេះមួយទៀតមកជាន់បន្តពីសត្វកណ្តុរ និងសត្វខ្យង ។
តាមប្រភពពីមន្ត្រីសាលាស្រុកព្រៃនប់ បានឲ្យដឹងនៅព្រឹកថ្ងៃទី២៨ ខែមិថុនានេះថា គឹតត្រឹមថ្ងៃនេះ ស្រូវពង្រោះដែលរងគ្រោះដោយសត្វដង្កូវបំផ្លាញធ្ងន់ធ្ងរខ្លាំងជាងគេគឺ នៅក្នុងឃុំសំរុង ស្រុកព្រៃនប់មានជិត១០០ហិកតា ដែលទទួលរងផលប៉ះពាល់ តែនៅក្នុងចំនួនទាំងនេះ មិនត្រូវបំផ្លាញអស់ទាំងស្រុងនោះទេ។ ជាមួយនឹងបញ្ហានេះលោក អ៊ឹង សំអុល ប្រធានការិយាល័យកសិកម្មស្រុកបានឲ្យដឹងថា ស្រូវពង្រោះរបស់កសិករនៅក្នុងឃុំសំរុង ពិតជាកំពុងត្រូវបានកាត់ស៊ីបំផ្លាញដោយសត្វដង្កូវហ្វូងពិតមែន ហើយពេលនេះខាងកសិកម្មកំពុងចុះពិនិត្យតាមដាន និងបាញ់ថ្នាំដើម្បីទប់ស្កាត់កុំឲ្យរាលដាលដល់ឃុំផ្សេងៗទៀត ហើយរាយការណ៍ទៅមន្ទីរ ក្រសួង ដើម្បីជួយទោះបីជាពេលនេះ នៅត្រឹមជាកាប៉ះពាល់ក៏ដោយ ។
លោកប្រធានបានបន្តទៀតថា ការប្រកបរបរកសិកម្មដំណាំស្រូវនៅក្នុងស្រុកព្រៃនប់នេះ ជារៀងរាល់ឆ្នាំឲ្យតែដើមរដូវ គឺត្រូវជួបបញ្ហាជាតែម្ដង អស់ពីកណ្ដុរ ខ្យង ។ ប្រជាកសិករខ្លះក្នុងមួយដើមរដូវ ព្រោះពីរទៅបីដងទំរាំបានផល ហើយសម្រាប់ឆ្នាំនេះ កើតចេញនូវសត្វដង្កូវហ្វូងមកកាត់ស៊ីបំផ្លាញទៀត តែទោះបីយ៉ាងណាខាងកសិកម្ម នឹងនៅគៀកជាមួយប្រជាកសិករ ជួយកំចាត់សត្វចង្រៃនេះឲ្យអស់ ។ សូមបញ្ជាក់ថាសត្វដង្កូវនេះកាតបំផ្លាញភាគច្រើនពេលស្រូវពង្រោះដុះបានជិតកន្លះចង្អាម ចំពោះស្រែដែលមិនសូវសំបូរទឹក ហើយនៅក្នុងតំបន់នោះស្ថិតក្នុងប៉ុលឌែ (ទំនប់កាពារទឹកប្រៃ) ហើយពេលនេះខាងកសិកម្ម និងខាងប៉ុលឌែកំពុងចុះពិនិត្យយ៉ាងយកចិត្តទុកដាក់ ដើម្បីសំម្រេចគួរបើកទ្វារទឹក ឬ បិទទ្វារទឹកដើម្បីពន្លិចដង្កូវ ឬយ៉ាងណា តែបើទឹកក្នុងស្រែមានច្រើន ខ្យងក្រហមស៊ី ក្នុងស្រែណាដែលមានពួកវាច្រើនស្រែនោះគ្មានសល់ឡើយ ។ ហើយត្រឹមថ្ងៃទី២៨ ខែមិថុនានេះ មិនបំផ្លាញតែនៅក្នុងឃុំសំរុងមួយប៉ុណ្ណោះទេនៅឃុំអណ្តូងថ្ម ឃុំព្រៃនប់ដែលជាឃុំជាប់ៗគ្នា ក៏កំពុងប៉ះពាល់បង្កមកពីសត្វដង្កូវនោះដែរ ទោះបីជាពេលនេះខាងជំនាញក៏ដូចជាខាងអាជ្ញាធរស្រុកកំពុងដុតដៃដុតជើងដើម្បីជួយ និងរាយការណ៍បន្តស្វែងរកវិធានការមកទប់ទល់នឹងសភាពការខាងលើនេះ ៕
ចែករំលែកព័តមាននេះ