រាជធានីភ្នំពេញ ៖ មនុស្សចំនួន៥នាក់ត្រូវរងរបួសធ្ងន់ស្រាល នៅក្នុងហេតុការណ៍គ្រោះថ្នាក់ចរាចរណ៍រថយន្តកូរ៉េមួយគ្រឿងបើកលឿន មិនប្រយ័ត្នជ្រុលរេចង្កូតបើកបុកឡើងលើសួនច្បារពុះចែកទ្រូងផ្លូវ ហើយជ្រុលបុកនឹងបង្គោលភ្លើង រួចក៏ជ្រុលបន្តទៅបុករះរថយន្តមួយគ្រឿង និងម៉ូតូ៣គ្រឿងផ្សេងទៀត នៅចំណុចតាមបណ្តោយផ្លូវ៣០ម៉ែត្រក្បែរនឹងក្រសួងកិច្ចការនារី ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ បង្កអោយមានការភ្ញាក់ផ្អើលជាខ្លាំង កាលពីវេលាម៉ោង១៧ និង៣០នាទីល្ងាចថ្ងៃទី១៣ ខែមករា ឆ្នាំ២០២២ ។
រថយន្តបង្ក ជារថយន្តកូរ៉េដឹកអ៊ីវ៉ាន់ ពណ៌ស ពាក់ស្លាកលេខ ភ្នំពេញ 2K-4163 ។ ចំណែករថយន្តរងគ្រោះម៉ាកព្រូស ពណ៌កណ្តុរប្រមេះ ពាក់ស្លាកលេខ ភ្នំពេញ 2AH-9159 និងម៉ូតូរងគ្រោះ៣គ្រឿងទៀតមានម៉ាក Honda SL ពណ៌សមួយគ្រឿង និងហុងដាឌ្រ៊ីម ពណ៌ខ្មៅ២គ្រឿងទៀត ។
យោងតាមប្រភពព័ត៌មានអោយដឹងថា នៅមុនកើតហេតុគេសង្គេតឃើញរថយន្តបង្កបើកបរដោយបុរសម្នាក់ធ្វើដំណើរតាមបណ្តោយផ្លូវ៣០ម៉ែត្រក្នុងទិសដៅពីកើតទៅលិច និងក្នុងល្បឿនយ៉ាងលឿន ។ ខណៈដល់ចំណុចកើតហេតុ រថយន្តបង្កបានរេចង្កូតទៅខាងឆ្វេងដៃជ្រុលបុកឡើងលើសួនច្បារពុះចែកទ្រូងផ្លូវ រួចក៏ជ្រុលបុកនឹងបង្គោលភ្លើងចំកណ្តាលសួន បណ្តាលអោយរងការខូចខាត ។
នៅពេលជាមួយគ្នា រថយន្តបង្កនៅមិនទាន់អស់ល្បឿនក៏ជ្រុលចង្កូតឡើងទៅផ្លូវម្ខាងទៀតទៅបុកនឹងរថយន្តព្រូសមួយគ្រឿងដែលកំពុងបើកបរក្នុងគន្លងផ្លូវអាទិភាព បណ្តាលអោយរងការខូចខាតកៀបស្ត្រីម្នាក់ជាអ្នកបើកបររងរបួសធ្ងន់ ។
ភ្លាមៗនោះដែរ រថយន្តនៅតែមិនទាន់អស់ល្បឿនក៏ជ្រុលបន្តបុករះម៉ូតូ៣គ្រឿងបន្ថែម បណ្តាលម៉ូតូដួលពេញដងផ្លូវ និងមនុស្សចំនួន០៤នាក់ ត្រូវរងរបួសធ្ងន់ស្រាល ។
រីឯរថយន្តបង្កត្រូវរងការខូចខាតខាងមុខផ្នែករថយន្តខាងឆ្វេងទាំងស្រុងនឹងដាច់កន្ទុយខាងលើចេញពីរថយន្តតែម្តង ។ បន្ទាប់ពីបង្កហេតុហើយនោះតៃកុងរថយន្តបង្កបានបើកទ្វាររថយន្តចេញទៅក្រៅ ហើយរត់គេចខ្លួនពីកន្លែងកើតហេតុ បាត់ស្រមោលតែម្តង ។
ក្រោយកើតហេតុ កម្លាំងសមត្ថកិច្ចមូលដ្ឋានបានចុះអន្តរាគមន៍ដល់ទីតាំងខាងលើនឹងបានជួយទំនាក់ទំនងទៅកាន់រថយន្តសាម៉ុយអោយទៅទទួលយកជនរងគ្រោះទាំងអស់ ដើម្បីយកទៅសង្គ្រោះ ។
ទន្ទឹមនឹងនោះ នគរបាលមូលដ្ឋានក៏បានបន្តសហការជាមួយនគរបាលជំនាញ អោយចុះអន្តរាគមន៍វាស់វែង អូសយកទាំងរថយន្តបង្ក និងរថយន្តក៏ដូចជា ម៉ូតូជនរងគ្រោះ សរុបទាំងអស់០៥គ្រឿង យកទៅកាន់ការិយាល័យនគរបាលចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រងចាំដោះស្រាយទៅតាមផ្លូវច្បាប់នៅពេលក្រោយផងដែរ ៕
ចែករំលែកព័តមាននេះ