លោក ត្រាំ អះអាងច្បាស់ៗថា ថៃជាអ្នកចាប់ផ្តើមសង្គ្រាមឡើងវិញជាមួយកម្ពុជា
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាងច្បាស់ៗថា ប្រទេសថៃជាអ្នកចាប់ផ្តើមសង្គ្រាមឡើងវិញជាមួយប្រទេសកម្ពុជា។…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាងច្បាស់ៗថា ប្រទេសថៃជាអ្នកចាប់ផ្តើមសង្គ្រាមឡើងវិញជាមួយប្រទេសកម្ពុជា។ ការអះអាងនេះ កើតឡើងនៅក្នុងពិធីប្រកាសផែនការផលិតនាវាចម្បាំងថ្មីសម្រាប់កងទ័ពជើងទឹកសហរដ្ឋអាមេរិក ដែលជាផ្នែកមួយនៃ «កងនាវាមាស» ឬ «Golden Fleet» នៅព្រឹកថ្ងៃទី២៣ ខែធ្នូ ឆ្នាំ២០២៥ (ម៉ោងនៅកម្ពុជា) ។
ថ្លែងចំពោះមុខបណ្តាអ្នកសារព័ត៌មាននៅក្នុងពិធីនោះ លោក ត្រាំ បានបញ្ជាក់ថា លោកបានដោះស្រាយបញ្ចប់សង្គ្រាមចំនួន៨ ដោយក្នុងនោះ រួមមានទាំងសង្គ្រាមរវាងថៃ និងកម្ពុជាផងដែរ។
ឆ្លើយតបនឹងសំណួអ្នកសារព័ត៌មាន លោក ត្រាំ បានថ្លែងដូច្នេះថា «ខ្ញុំបានដោះស្រាយបញ្ចប់សង្គ្រាមចំនួន៨ ។ ថៃកំពុងចាប់ផ្តើមធ្វើឱ្យប្រសើរឡើងវិញហើយ ។ អ្នកដឹងទេ ពួកគេ (ថៃ) បានចាប់ផ្តើម (សង្គ្រាម) ជាមួយកម្ពុជា ។ ពួកគេ (ថៃ និងកម្ពុជា) បានចាប់ផ្តើម (សង្គ្រាម) ឡើងវិញ។ ប៉ុន្តែខ្ញុំគិតថា លោក Marco (រដ្ឋមន្ត្រីការបរទេសអាមេរិក) យើងត្រៀមខ្លួនបានយ៉ាងល្អ ដើម្បីបញ្ចប់ (សង្គ្រាមរវាងថៃ និងកម្ពុជា) ។ ដូច្នេះ យើងបានដោះស្រាយបញ្ចប់សង្គ្រាមចំនួន៨ ហើយសង្គ្រាមមួយនេះ គឺនៅកណ្តាលគេ»។
គួររំលឹកថា មុនការលើកឡើងនេះ រដ្ឋមន្ត្រីក្រសួងការបរទេសអាមេរិក លោក Marco Rubio បានបើកការសន្ទនាតាមទូរស័ព្ទជាមួយរដ្ឋមន្ត្រីការបរទេសថៃ លោក ស៊ីហាសក្តិ ភួងកេតកែវ (Sihasak Phuangketkeow) ដោយជំរុញថៃចាត់វិធានការជាក់ស្តែង ដើម្បីបន្ធូរបន្ថយភាពតានតឹងតាមព្រំដែនជាមួយប្រទេសកម្ពុជា និងវិលត្រឡប់ទៅអនុវត្តកិច្ចព្រមព្រៀងសន្តិភាពទីក្រុងគូឡាឡាំពួរ ប្រទេសម៉ាឡេស៊ីឡើងវិញ ។
យោងតាមការចេញផ្សាយពីក្រសួងការបរទេសអាមេរិក នៅថ្ងៃទី១៩ ខែធ្នូ ឆ្នាំ២០២៥ តាមរយៈលោក Tommy Pigott អ្នកនាំពាក្យរងសំខាន់របស់ក្រសួងបានឱ្យដឹងថា លោក Marco Rubio រដ្ឋមន្ត្រីការបរទេសអាមេរិក បានជួបពិភាក្សា (តាមទូរស័ព្ទ) ជាមួយនឹងលោក ស៊ីហាសក្តិ ភួងកេតកែវ រដ្ឋមន្ត្រីការបរទេសថៃ។
ជាលទ្ធផល លោក Marco Rubio បានគូសបញ្ជាក់អំពីការព្រួយបារម្ភរបស់សហរដ្ឋអាមេរិកទាក់ទងនឹងអំពើហិង្សាជាបន្តបន្ទាប់ តាមបណ្តោយព្រំដែនកម្ពុជា និងបានសង្កត់ធ្ងន់លើតម្រូវការបន្ទាន់ក្នុងការកាត់បន្ថយភាពតានតឹង។
លើសពីនេះទៀត លោករដ្ឋមន្ត្រីការបរទេសអាមេរិក បានជំរុញឱ្យរដ្ឋមន្ត្រីការបរទេសថៃ ចាត់វិធានការជាក់ស្តែង ដើម្បីបន្ថយស្ថានការណ៍ និងឱ្យប្រទេសថៃវិលត្រឡប់ទៅអនុវត្តកិច្ចព្រមព្រៀងសន្តិភាពទីក្រុងគូឡាឡាំពួរឡើងវិញ៕
ចែករំលែកព័តមាននេះ