រាជធានីភ្នំពេញ ៖ សែន រ៉ាដេត មកពីក្លិបអប្សរាគុនខ្មែរ ត្រូវបានគេរៀបចំឱ្យឡើងប្រកួតដណ្ដើមខ្សែក្រវាត់ NagaWorld ពីកីឡាករថៃឈ្មោះ Kheay Ba ក្នុងប្រភេទទម្ងន់៥១គីឡូក្រាមនៅលើសង្វៀនទូរទស្សន៍
រាជធានីភ្នំពេញ ៖ សែន រ៉ាដេត មកពីក្លិបអប្សរាគុនខ្មែរ ត្រូវបានគេរៀបចំឱ្យឡើងប្រកួតដណ្ដើមខ្សែក្រវាត់ NagaWorld ពីកីឡាករថៃឈ្មោះ Kheay Ba ក្នុងប្រភេទទម្ងន់៥១គីឡូក្រាមនៅលើសង្វៀនទូរទស្សន៍អប្សរាប៉ុស្ដិ៍លេខ១១ នាថ្ងៃសៅរ៍ ទី២៥ មិថុនា ខាងមុខនេះ។
លោកឧត្តមសេនីយ៍ តែម ម៉ឺន ប្រធានសហព័ន្ធកីឡាប្រដាល់កម្ពុជាបានឱ្យដឹងនៅក្នុងឱកាសធ្វើសន្និសីទសារព័ត៌មានកាលពីថ្ងៃទី២២ មិថុនា ថា ការប្រកួតលើកនេះសែន រ៉ាដេត គឺជាអ្នកឡើងដណ្ដើមខ្សែក្រវាត់ពីកីឡាករថៃKheay Ba ដូច្នេះគេកំពុងតែរង់ចាំមើលថាតើ សែន រ៉ាដេត ទៅរួចឬអត់ ? ទោះជាយ៉ាងណា លោកបានផ្ដាំផ្ញើដល់អាជ្ញាកណ្ដាល និងចៅក្រមទាំងអស់ ត្រូវតែប្រកាន់នូវភាពយុត្តិធម៌ គ្មានភាពលម្អៀង ធ្វើយ៉ាងណាកុំឱ្យអ្នកមើលរិៈគន់ដល់គណៈកម្មការរៀបចំការប្រកួតដែលនាំឱ្យប៉ះពាល់កិត្តិយសសហព័ន្ធកីឡាប្រដាល់កម្ពុជា ។
ក្រៅពីនោះ នៅមានគូប្រកួតមិត្តភាពកម្ពុជា-ថៃ១គូទៀត ដែលតម្រូវទៅលើកីឡាករ សុខ សុវណ្ណ មកពីក្លិបកងពលធំអន្តរាគមន៍លេខ២ ប្រកួតជាមួយកីឡាករថៃឈ្មោះ Yorth Sayamក្នុងប្រភេទទម្ងន់៦២គីឡូក្រាម ។ ចំណែកគូប្រកួតកម្ពុជានិងកម្ពុជាវិញមាន កីឡាករផុន វាសនា មកពីសមាគមកីឡាប្រដាល់ខេត្តកោះកុងប្រកួតជាមួយកីឡាករ ម៉ន ភារុន មកពីក្លិបការិយាល័យទី៥កងទ័ពជើងគោក ។ កីឡាករ ងួន សម្បត្តិ មកពីសមាគមកីឡាប្រដាល់ខេត្តកោះកុង ប្រកួតជាមួយកីឡាករ ម៉ៃ សិទ្ធិ មកពីក្លិបសុភានូមានជ័យ ។ កីឡាករ ស៊ូ ប៉ាន់យ៉ា មកពីសមាគមកីឡាប្រដាល់ក្រសួងកសិកម្ម ប្រកួតជាមួយកីឡាករប៊ុន សុធា មកពីក្លិបមជ្ឈមណ្ឌលកីឡាខ ភ ម និងកីឡាករកំពែងខ្មៅ មកពីសមាគមកីឡាប្រដាល់ក្រសួងកសិកម្ម ប្រកួតជាមួយកីឡាករ ផាន់ ផាត់យុទ្ធ មកពីក្លិបសាលវ័ន្តកីឡា ៕
ចែករំលែកព័តមាននេះ