ខេត្តកណ្តាល ៖ កម្លាំងប៉ុស្តិ៍រដ្ឋបាលស្វាយរលំ ដឹកនាំដោយលោក ឡោ សុខៃ នាយប៉ុស្តិ៍រដ្ឋបាលបានចុះដេញក្រុមអ្នកញៀនល្បែងជល់មាន់រត់បាតជើងសព្រាត អ្នកខ្លះកាន់កន្ត្រកមាន់ អ្នកខ្លះរត់ធ្លាក់ទឹក ។…
ខេត្តកណ្តាល ៖ កម្លាំងប៉ុស្តិ៍រដ្ឋបាលស្វាយរលំ ដឹកនាំដោយលោក ឡោ សុខៃ នាយប៉ុស្តិ៍រដ្ឋបាលបានចុះដេញក្រុមអ្នកញៀនល្បែងជល់មាន់រត់បាតជើងសព្រាត អ្នកខ្លះកាន់កន្ត្រកមាន់ អ្នកខ្លះរត់ធ្លាក់ទឹក ។ ហេតុការណ៌នេះធ្វើឡើង នៅថ្ងៃទី០៨ ខែមករា ឆ្នាំ២០២២ ក្នុងចំការដើមពុទ្រា ភូមិលេខ៣ សង្កាត់ស្វាយរលំ ក្រុងតាខ្មៅ ខេត្តកណ្តាល ។
លោក ឡោ សុខៃ នាយប៉ុស្តិ៍រដ្ឋបាលស្វាយរលំ បានប្រាប់អោយដឹងថា បន្ទាប់ពីមានទទួលព័ត៌មានពីពលរដ្ឋល្អរាយការណ៌ជូនលោកថា មានក្រុមអ្នកញៀនល្បែងជល់មាន់ នាំគ្នាដឹកមាន់ទៅជល់យ៉ាងគគ្រឹកគ្រេកនោះ លោកបានដឹកនាំកម្លាំងប៉ុស្តិ៍រដ្ឋបាលចុះទៅតែម្តង ។
ពេលចុះនោះ ក្រុមអ្នកញៀនល្បែងដឹងមុន ដោយមានអ្នកចាំមើលផ្លូវ បានតេប្រាប់គ្នាវាធ្វើអោយពួកក្រុមញៀនល្បែងនោះនាំគ្នារត់បាតជើងសព្រាតបែកគ្នាអស់ទៅ ។
ពលរដ្ឋបានប្រាប់អោយដឹងថា ពួកក្រុមអ្នកញៀនល្បែងជល់មាន់នោះ នាំគ្នាជល់មាន់ស្ទើររៀងរាល់ថ្ងៃ ជាពិសេសថ្ងៃសៅរ៌ និងថ្ងៃអាទិត្យតែម្តង ប្រមូលផ្តុំគ្នាលេងភ្នាល់ចាក់លុយមួយគូៗ ជិតរាប់លានរៀលស្រែកហ៊ោរកញ្ច្រៀវ មិនញញើតសមត្ថកិច្ចមូលដ្ឋានទាល់តែសោះ ។
ដោយឡែកពលរដ្ឋបានសំណូមពរអោយសមត្ថកិច្ចគ្រប់ជាន់ថ្នាក់មេត្តា ជួយបង្ក្រាបករណីល្បែងជល់មាន់នេះផង មើលឃើញថា នៅសង្កាត់ស្វាយរលំ និងសង្កត់សិប្បូរ ក្រុងតាខ្មៅ សម្បូរណាស់ ។ ពួកគាត់បន្ថែមថា បើល្បែងស៊ីសងនៅតែមានកើតឡើងរីកដូចផ្សិតបែបនេះ តើភូមិឃុំ មានសុវត្ថិភាពនៅត្រង់ណា ។ ហើយល្បែងស៊ីសង ជាដើមចមនៃបទល្មើស ៕
ចែករំលែកព័តមាននេះ