រាជធានីភ្នំពេញ ៖ ឯកឧត្តម អ៊ីម៉ាហ្គាវ៉ា យូគិអុ អតីតឯកអគ្គរាជទូតជប៉ុនប្រចាំកម្ពុជា ដំបូងគេក្រោយការដួលរលំរបបខ្មែរក្រហម បានទទួលមរណភាពនៅប្រទេសជប៉ុនកាលពីថ្ងៃទី ៣០ ខែធ្នូ ឆ្នាំ២០២១ ។ នេះបើតាមការប្រកាសរបស់ស្ថានទូតជប៉ុនប្រចាំនៅកម្ពុជានាថ្ងៃទី ៧ ខែមករា ឆ្នាំ ២០២២ ។
ជាមួយនឹងការប្រកាសអំពីដំណឹងដ៏សោកសៅនេះ ស្ថានទូតជប៉ុនប្រចាំនៅកម្ពុជាក៏បានសម្តែងនូវសមានចិត្តដ៏ជ្រាលជ្រៅ និងមរណទុក្ខយ៉ាងក្រៀមក្រំបំផុតចំពោះមរណភាពរបស់ឯកឧត្តម ឯកឧត្តម អ៊ីម៉ាហ្គាវ៉ា យូគិអុ ។
សូមបញ្ជាក់ថា ឯកឧត្តម អតីតឯកអគ្គរាជទូត អ៊ីម៉ាហ្គាវ៉ា បានចូលបំរើការងារនៅក្រសួងការបរទេសជប៉ុនក្នុងឆ្នាំ ១៩៥៦ ហើយត្រូវបានចាត់បញ្ជូនមករាជធានីភ្នំពេញ ប្រទេសកម្ពុជា ក្នុងឋានៈជាសិក្ខាកាមភាសាខ្មែរ នៅឆ្នាំ១៩៥៧ ហើយបានធ្វើការនៅទីនេះអស់រយៈពេល ៨ ឆ្នាំ រហូតដល់ឆ្នាំ១៩៦៥។ នៅឆ្នាំ ១៩៩២ បន្ទាប់ការបើកស្ថានទូតជប៉ុនឡើងវិញ ឯកឧត្តម ក៏បានក្លាយជាឯកអគ្គរាជទូតជប៉ុនទីមួយប្រចាំកម្ពុជា ។
ប្រភពពីស្ថានទូតជប៉ុនប្រចាំនៅកម្ពុជាបានបន្ថែមថា «ក្នុងឋានៈជាអ្នកការទូតមួយរូប ដែលមានការយល់ដឹងយ៉ាងជ្រៅជ្រះអំពីប្រវត្តិសាស្ត្រ នយោបាយ សេដ្ឋកិច្ច សង្គម និងវប្បធម៌កម្ពុជា ឯកឧត្តម អ៊ីម៉ាហ្គាវ៉ា បានធ្វើការពិភាក្សា យ៉ាងស្វិតស្វាញជាមួយ ព្រះករុណាព្រះបាទសម្តេច នរោត្តម សីហនុ សម្តេចអគ្គមហាសេនាបតីតេជោហ៊ុន សែន និងភាគីពាក់ព័ន្ធដ៏ទៃទៀត ហើយក៏បានធ្វើជាសហប្រធានគណៈកម្មាធិការទី៣ នៃសន្និសិទអន្តរជាតិស្តីពីកម្ពុជានៅទីក្រុងប៉ារីសក្នុងឆ្នាំ១៩៨៩ផងដែរ ដើម្បីសម្រេចបាននូវសន្តិភាពនៅកម្ពុជា» ។
ក្នុងឋានៈជាឯកអគ្គរាជទូតប្រចាំកម្ពុជា ឯកឧត្តម បានជួយសំរបសំរួលក្នុងការទទួលកងកម្លាំងរក្សាសន្តិភាពជប៉ុនស្ថិតក្រោមអាជ្ញាធរបណ្តោះអាសន្នរបស់អង្គការសហប្រជាជាតិប្រចាំកម្ពុជា (អ៊ុនតាក់) ដែលបន្ទាប់មកមានការបោះឆ្នោតសកលជាលើកដំបូង និងដំណើរការកសាងប្រទេសកម្ពុជាឡើងវិញ។
ដើម្បីបន្តកេដំណែលនៃចំណូលចិត្តយ៉ាងខ្លាំងរបស់ឯកឧត្តម អ៊ីម៉ាហ្គាវ៉ា ចំពោះប្រទេសកម្ពុជា យើងនឹងបន្តកិច្ចខិតខំប្រឹងប្រែងរបស់យើង ដើម្បីការរីកចម្រើនថែមទៀត នៃទំនាក់ទំនងរវាងប្រទេសជប៉ុន និងកម្ពុជា។ នេះបើតាមស្ថានទូតជប៉ុន ៕
ចែករំលែកព័តមាននេះ