ភ្នំពេញ៖ ក្រសួង​ពាណិជ្ជកម្មកម្ពុជា នៅថ្ងៃទី៣ ខែមករា ឆ្នាំ២០២២ បានចេញសេចក្តីជូនដំណឹង ដល់​ក្រុមហ៊ុន ពាណិជ្ជករ សមាគមដឹកជញ្ជូន​ទំនិញនាំចេញ-នាំចូល និងសាធារណជន ពី​ការកកស្ទះ​ការដឹកនជញ្ជូនទំនិញឆ្លងកាត់ព្រំដែនវៀត​ណាម-ចិន ដោយសារតែបញ្ហាប្រឈមនឹងស្ថានភាព​ឆ្លងរាលដាលជំងឺកូវីដ១៩ ពិសេស​អូមីក្រុង​។

តាមសេចក្តីប្រកាស វៀតណាមបានជូនដំណឹងមកថា សកម្មភាព​នាំចូល និងនាំចេញទំនិញនៅច្រកព្រំដែន​វៀតណាម និងចិន បានជួបប្រទះ​ការកកស្ទះ​យ៉ាងខ្លាំង ជាពិសេស​ នៅច្រក​ទ្វារព្រំដែនខេត្ត Lang Son និងខេត្ត​ Quang Ninh ដែលបណ្តាល​ជាចម្បង​មកពីការរឹតបន្តឹងវិធានការ​បង្ការ​ការរីករាលដាលជំងឺកូវីដ១៩ របស់ប្រទេសចិន ក្រោមគោលនយោបាយ «Zero Covid»។

ក្រសួង​ឧស្សាហកម្ម និងពាណិជ្ជកម្ម វៀតណាម បាន​បញ្ជាក់ថា គិតត្រឹមថ្ងៃទី២១ ខែធ្នូ ឆ្នាំ២០២១ ក្នុងខេត្តទាំងពីរខាងលើ មានរថយន្តប្រមាណជាង ៦០០០គ្រឿង កំពុងរង់ចាំ​ការនាំចេញទៅកាន់ប្រទេសចិន។ តាមការវាយតម្លៃ​ជារួមឃើញថា បរិមាណទំនិញ ដែលអាចនាំចេញ​បាននៅតាមច្រកព្រំដែន​សំខាន់ៗ មួយចំនួន ជាមួយប្រទេសចិន មានចំនួនត្រឹមតែ ២៥-៣០% ប៉ុណ្ណោះ បើប្រៀបធៀប​ទៅនឹងលក្ខខណ្ឌ​នាំចេញធម្មតា​។ លើសពីនេះ ច្រកទ្វារព្រំដែន​មួយចំនួនទៀត នៅតែបន្តផ្អាក​ដំណើរការ​គយជាបណ្តោះអាសន្ន រហូតដល់​មានសេចក្តីជូនដំណឹងជាថ្មី​។

ស្ថិតក្នុងបរិការណ៍នេះ ក្រសួង​ពាណិជ្ជកម្មកម្ពុជា បានប្រកាសជូនដំណឹងដល់​ក្រុមហ៊ុន ពាណិជ្ជករ និងសមាគមដឹកជញ្ជូន​ទំនិញនាំចេញ-នាំចូល​ ឲ្យបានជ្រាប និងពិនិត្យ​លទ្ធភាព​រកមធ្យោបាយ​ និងវិធីនាំចេញផ្សេង ដើម្បីជៀសវាង​ហានិភ័យ និងបញ្ហា​នានា ដែល​បណ្តាលមកពី​ការកកស្ទះ​តាមរយៈការបញ្ជូនទំនិញ​ឆ្លងកាត់​ប្រទេសវៀតណាម ទៅកាន់ប្រទេស​ចិន តាមច្រកព្រំដែន​គោក រវាង​ប្រទេសវៀតណាម និងប្រទេសចិន​៕