រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សាថ្មី និងពិធីអបអរសាទរខួប៧០ឆ្នាំ
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សាថ្មី និងពិធីអបអរសាទរខួប៧០ឆ្នាំនៃការបង្កើតសាកលវិទ្យាល័យវិទ្យាសាស្ត្រសុខាភិបាល នាព្រឹកថ្ងៃទី១៦ ខែមិថុនា ឆ្នាំ២០១៦ នៅសាកលវិទ្យាល័យវិទ្យាសាស្ត្រសុខាភិបាល ជូនកាដូដល់និស្សិតសាកលវិទ្យាល័យនេះ គឺដោះស្រាយជូនជាកញ្ចប់ដោយបញ្ឈប់មិនឱ្យមាននិស្សិតជាប់បម្រុងទៀតទេ ឱ្យមានអ្នកពេញសិទ្ធិប៉ុន្មាន អ្នកឯកទេសប៉ុន្មាន គឺយកតែម្តង និស្សិតដែលជាប់ទ្រឹស្តីធ្លាក់ផ្ទាល់មាត់ឱ្យចូលរៀនទាំងអស់ ។
ជាមួយគ្នានេះ សម្តេចតេជោក៏បានសម្រេចលើតម្លៃប្រឡងឱ្យចុះមកត្រឹមតែ១០ម៉ឺនរៀល ។ ចំណែកគ្រូពេទ្យឯកទេស៣៣០នាក់ ដោះស្រាយជាកញ្ចប់បញ្ចូលក្របខណ្ឌទាំងអស់ ។ គ្រូពេទ្យដែលជាប់កិច្ចសន្យាចំនួន ៣.៦៨៩នាក់ ត្រូវបានបញ្ចូលក្របខណ្ឌ ។
សម្តេចតេជោនាយករដ្ឋមន្ត្រីមានប្រសាសន៍ថា ពិតជាមានការរីករាយយ៉ាងខ្លាំង ព្រោះបានរួមចំណែកដោះស្រាយនៅក្នុងកំណែទម្រង់មួយចំនួនដែលមានការចាំបាច់ត្រូវធ្វើការកែទម្រង់។ ការកែទម្រង់ទាំងអស់សុទ្ធតែបម្រើគោលដៅសម្រាប់ប្រជាពលរដ្ឋកម្ពុជា និងនិស្សិតរបស់យើង ។
ទន្ទឹមគ្នានេះដែរ សម្តេចតេជោនាយករដ្ឋមន្ត្រី ក៏បានសម្តែងនូវការអបអរសាទរចំពោះការកែទម្រង់លើវិស័យសាធារណការ និងដឹកជញ្ជូន ដែលធ្វើឱ្យមធ្យោបាយធ្វើដំណើររបស់ប្រជាពលរដ្ឋមានភាពងាយស្រួលលើបញ្ហាប័ណ្ណបើកបរទោចក្រយាន្ត ដែលវិធីតែមួយគត់គឺការលុបចោល និងតម្រូវឱ្យមានតែអត្តសញ្ញាណប័ណ្ណតែមួយមុខ ។ ក្នុងករណីនេះសម្តេចតេជោមានប្រសាសន៍បញ្ជាក់ថា មិនលើកលែងទាំងអស់ទេ ទោចក្រយានយន្តចាប់ពី១២៥CCចុះក្រោមគឺលើកលែង ។ ចាប់ពី១២៦CC ឡើងទៅ ចាំបាច់ត្រូវតែមានប័ណ្ណបើកបរ ។ ចំពោះតម្លៃនៃការធ្វើប័ណ្ណក៏បញ្ចុះដែរ ។
សម្តេចតេជោនាយករដ្ឋមន្ត្រី បានថ្លែងនូវការអរគុណដែលយើងបានរួមគ្នាខិតខំអនុវត្ដ បើសិនជាមិនរួមគ្នាអនុវត្ដទេនោះ ការងារទាំងនោះមិនអាចសម្រេចទេ ។
ចំពោះនិស្សិតទាំងឡាយ ទោះបីចង់បង្កើតអគារសិក្សាប៉ុន្មានក៏ដោយ បើគ្មានការចូលរួមចង់រៀនរបស់និស្សិតទេ មិនអាចទៅរួចទេ លុះត្រាតែមានការចូលរួមដែលយើងរួមគ្នាធ្វើទាំងអស់គ្នា ។
សម្ដេចតេជោបានសម្តែងក្តីសង្ឃឹមថា យើងនឹងបន្ដដំណើររួមជាមួួយគ្នាទៅទៀតតាមរយៈផលិតផលថ្មីៗ និងគោលដៅដែលបានដាក់ចេញ។ តាមផ្នែកសុខាភិបាលគឺមានច្រើនណាស់ ដែលទាមទារឱ្យមានការធ្វើសកម្មភាពដោយមិនបានពឹងពាក់លើស្ថាប័នសុខាភិបាលតែមួយប៉ុណ្ណោះទេ ក៏ប៉ុន្ដែត្រូវធ្វើការរួមគ្នាជាមួយនឹងស្ថាប័នដទៃទៀត ដូចជាពាក់ព័ន្ធជាមួួយគ្រោះថ្នាក់ចរាចរណ៍ ។
ទាក់ទងទៅនឹងការព្យាបាលសុខភាពនៅមន្ទីរពេទ្យសាធារណៈ ក៏ដូចជាការព្យាបាលនៅគ្លីនិកដទៃទៀត សម្ដេចតេជោបានសង្កត់ធ្ងន់ថាយ៉ាងណាមិញក្នុងករណីដូចជា បើមានការត្រូវព្យូរសេរ៉ូមក្ដី ឬករណីផ្សេងៗគឺឱ្យពេទ្យជំនាញគេធ្វើ មិនត្រូវព្យូរសេរ៉ូមនៅមន្ទីរពេទ្យហើយយកអ្នកជំងឺមកផ្ទះ ។ បើមានបញ្ហាអាចមានក្នុងករណីយកមកផ្ទះ ជួនកាលលក្ខណៈបច្ចេកទេសនៃគ្រូពេទ្យឲ្យសេរ៉ូមធ្លាក់ទៅតាមកំណត់ ។ លុះដល់យកមកផ្ទះ ក្រែងករណីជាយថាហេតុធ្វើឱ្យតំណក់នៃការធ្លាក់ទឹកសេរ៉ូមនេះខុសពីធម្មតាដែលគ្រូពេទ្យបានកំណត់នោះ អាចបណ្ដាលឱ្យមានគ្រោះថ្នាក់ ។ បើចង់ដាក់ត្រូវដាក់នៅគ្លីនិក ឬហៅគ្រូពេទ្យមកដាក់ឱ្យ ដល់អស់ទុកឱ្យគ្រូពេទ្យមកដោះ យើងកុំដោះខ្លួនឯង ។
សម្ដេចតេជោបញ្ជាក់ថា គ្រូពេទ្យភាគច្រើនណាស់ដែលជាគ្រូពេទ្យសង្គ្រោះជីវិតមនុស្ស ។ ប៉ុន្ដែក៏នៅមានចំណុចខ្វះខាតមួយចំនួននៃបុគ្គលខ្លះ មិនមែនជាស្ថាប័នគ្រូពេទ្យទេ ។ ខ្ញុំមិនយល់ស្របជាមួួយមនុស្សខ្លះដែលបាននិយាយថា គ្រូពេទ្យ៩០%អាក្រក់ ។
ចំពោះបញ្ហានេះសម្តេចតេជោបានលើកឡើងថា បើដូច្នោះតើគ្រូពេទ្យទទួលបានទេ ? ចំពោះសម្តីនេះ គឺហាក់ដូចជាការមាក់ងាយចំពោះគ្រូពេទ្យពេកហើយ ប្រជាជនកម្ពុជាព្យាបាលនៅក្នុងស្រុក ។ បើ៩០% ជាមនុស្សអាក្រក់ទៅហើយ តើអាចគ្រោះថ្នាក់មនុស្សប៉ុន្មាននាក់ទៅ ។
ប្រទេសកម្ពុជាមានប្រជាជនឈរនៅលំដាប់ទី៧ នៅអាស៊ាន ប្រជាជនច្រើនទី១-ប្រទេសឥណ្ឌូណេស៊ីជាង២០០លាននាក់ ទី២-ហ្វ៊ីលីពីន ជាង១០០លាននាក់ ទី៣-វៀតណាមមាន៩០លាននាក់ ទី៤-ថៃ មាន៦០លាននាក់ ទី៥-ម៉ាឡេស៊ី៣៩លាននាក់ ទី៦-មីយ៉ាន់ម៉ា ទី៧-កម្ពុជា ទី៨-ឡាវ ទី៩-សិង្ហបុរី ទី១០-ប្រ៊ុយណេ ។
លោក ម៉ម ប៊ុនហេង រដ្ឋមន្ត្រីក្រសួងសុខា ភិបាល ថ្លែងថា ដើម្បីឈានទៅរកឧត្តមភាពក្នុងការបណ្តុះបណ្តាល ការស្រាវជ្រាវ និងការផ្តល់សេវាសុខាភិបាលនៅព្រះរាជាណាចក្រកម្ពុជាដែលជាការរួមចំណែកជាមួយរាជរដ្ឋាភិបាល ក្នុងការអភិវឌ្ឍធនធានមនុស្សប្រកបដោយសមភាព និងសីលធម៌ខ្ពស់ ដើម្បីធានាឱ្យបានប្រសិទ្ធភាពនៃសេវាសាធារណៈ សំដៅបម្រើប្រជាពលរដ្ឋឱ្យកាន់តែប្រសើរឡើង សាកលវិទ្យាល័យបាននិងកំពុងកែសម្រួលកម្មវិធីសិក្សានានាទៅជាកម្មវិធីសិក្សាដែលមានទិសដៅបង្កើនសមត្ថភាពជំនាញនិងភាពប៉ិនប្រសប់នៃការអនុវត្តជាក់ស្តែង ។
សាកលវិទ្យាល័យបានបញ្ចូលការអនុវត្តបង្ហាញក្នុងកម្មវិធីសិក្សា ដើម្បីបណ្តុះបណ្តាលនិស្សិតឱ្យបានស្ទាត់ជំនាញមុននឹងចេញទៅអនុវត្តនៅតាមមន្ទីរពេទ្យ និងកន្លែងកម្មសិក្សានានា ។
លោករដ្ឋមន្ត្រី ថ្លែងទៀតថា អគារសិក្សាថ្មីដែលត្រូវសម្ពោធនេះមានកម្ពស់ ១០ជាន់ស្មើនឹង៤២ម៉ែត្រ ទទឹង២១ម៉ែត្រ បណ្ដោយ៣៧ម៉ែត្រ ចំណាយថវិកាសរុបទាំងអគារនិងសម្ភារចំនួន ១៦.០៩៨.៣៧១.៤០០រៀល និងថវិកាជាតិចំនួន១៩៧.៤២០.០០០រៀល ។ អគារនេះជាអគារទី៤ហើយ ក្រោយពីសាកលវិទ្យាល័យវិទ្យាសាស្ត្រសុខាភិបាល បានប្រែក្លាយជាគ្រឹះស្ថានសាធារណៈរដ្ឋបាលចាប់ពីចុងឆ្នាំ២០០១ មក ។
ដើម្បីរំឭកដល់គុណូបការៈដ៏ខ្ពងខ្ពស់និងថ្លៃថ្លាបំផុតចំពោះសម្ដេចតេជោនាយករដ្ឋមន្ត្រី ដែលបានរំដោះជាតិ ពីរបបប្រល័យពូជសាសន៍ និងបានដឹកនាំកសាងប្រទេសឱ្យមានសន្តិភាពទាំងស្រុង ស្ថិរភាពនយោបាយទូទាំងប្រទេស និងភាពរីកចម្រើនឥតឈប់ឈរ តាងនាមគណៈគ្រប់គ្រង មន្ត្រីរាជការ បុគ្គលិកនិស្សិតនៃសាកលវិទ្យាល័យវិទ្យាសាស្ត្រសុខាភិបាល សូមអនុញ្ញាតដ៏ខ្ពង់ខ្ពស់ ពីសម្ដេចតេជោប្រសិទ្ធនាមអគារថ្មីនេះថា «អគារសម្ដេចអគ្គមហាសេនាបតីតេជោ ហ៊ុន សែន អគារទី៣» ។
យើងខ្ញុំទាំងអស់គ្នា មានចិត្តសប្បាយយ៉ាងរីករាយ និងកិត្តិយសបំផុត ដែលពិធីសម្ពោធនេះចំពេលខួប៧០ឆ្នាំនៃការបង្កើតសាកលវិទ្យាល័យវិទ្យាសាស្ត្រសុខាភិបាល ។ យើងខ្ញុំត្រេកអរក្រៃលែងដែលសាកលវិទ្យាល័យមួយនេះ ជាសាកលវិទ្យាល័យមានវ័យចំណាស់ជាងគេនៅព្រះរាជាណាចក្រកម្ពុជា និងជាសាកលវិទ្យាល័យឈានមុខគេក្នុងការបណ្ដុះបណ្ដាលវិស័យសុខាភិបាល ហើយជាសាកលវិទ្យាល័យដែលរស់រានមានជីវិតជាលើកទី២នៅឆ្នាំ១៩៨០ ក្រោយថ្ងៃរំដោះ៧មករា ក្រោមការសម្រេចនិងឧបត្ថមផ្ទាល់ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ សាកលវិទ្យាល័យនេះ បានបំពេញកាតព្វកិច្ចយ៉ាងសកម្មបំផុត រួមចំណែកជាមួយរាជរដ្ឋាភិបាលក្នុងការអភិវឌ្ឍប្រទេសជាតិ ៕
ចែករំលែកព័តមាននេះ