នៅក្នុងទស្សនៈមួយដែលគេហៅថា ទស្សនៈកម្មផលបានពន្យល់ថា តាមន័យត្រង់ពាក្យថា កម្ម មានន័យថា អំពើប្រកបដោយចេតនា ដែលពាក្យនេះសំដៅលើជំនឿរបស់អ្នកកាន់ព្រះពុទ្ធសាសនា ។ ខ្លឹមសារពុទ្ធឱវាទពោលថា កាលណាមានកម្ម…
នៅក្នុងទស្សនៈមួយដែលគេហៅថា ទស្សនៈកម្មផលបានពន្យល់ថា តាមន័យត្រង់ពាក្យថា កម្ម មានន័យថា អំពើប្រកបដោយចេតនា ដែលពាក្យនេះសំដៅលើជំនឿរបស់អ្នកកាន់ព្រះពុទ្ធសាសនា ។ ខ្លឹមសារពុទ្ធឱវាទពោលថា កាលណាមានកម្ម ប្រាកដជាមានផល ទាំងនៅក្នុងជាតិនេះ និងជាតិខាងមុខជាប្រាកដ កម្មល្អនឹងផ្ដល់ផលល្អ ឯកម្មអាក្រក់នឹងផ្ដល់ផលអាក្រក់ ។
សូមលើកយកឧទាហរណ៍សាមញ្ញមួយមកបញ្ជាក់ ឧបមាបុគ្គលម្នាក់ជាអ្នកជក់បារី ផឹកសុរា និងបរិភោគច្រើនហួសប្រមាណ ដោយមិនមានការធ្វើលំហាត់ប្រាណឲ្យបានទៀងទាត់ ជាលទ្ធផលបុគ្គលនោះឯងងាយនឹងកើតជំងឺឡើងឈាម ហើយត្រូវរងទុក្ខវេទនាជាអនេក ។ ចំណែកឯបុគ្គលដែលចេះតមចំណីអាហារ និងចេះថែរក្សាសុខភាពឲ្យបានល្អវិញតែងតែមានជីវិតរស់នៅប្រកបដោយសុខុមាលភាព សូម្បីតែពេលគាត់មានវ័យចំណាស់ហើយក៏ដោយ ។
ដូច្នេះបុគ្គលដែលបានធ្វើនូវអំពើល្អ និងកម្មល្អច្រើននឹងសោយនូវជីវិតដែលពោរពេញដោយសេចក្ដីសប្បាយរីករាយ លុះអស់អាយុសង្ខារក៏មកកើតជាមនុស្សខ្ពង់ខ្ពស់ ឬកើតនៅស្ថានទេវតានៅជាតិខាងមុខ ។ ផ្ទុយទៅវិញ បុគ្គលដែលបានធ្វើនូវអំពើអាក្រក់ច្រើន ហើយសន្សំនូវអកុសលកម្មច្រើនតែងមានជីវិតរស់នៅប្រកបដោយភាពលំបាក ហើយនឹងកើតនៅក្នុងអបាយភូមិទៀតផង ។
កម្មគឺប្រៀបបានទៅនឹងគ្រាប់ពូជ ហើយអ្នកត្រូវចេះជ្រើសរើសគ្រាប់ពូជដែលអ្នកចង់ដាំ ដូច្នេះសូមមេត្តានាំគ្នាដាំគ្រាប់ពូជល្អៗឲ្យបានច្រើន តាមលទ្ធភាពដែលយើងអាចធ្វើទៅរួច ៕ សាន សារិន
ចែករំលែកព័តមាននេះ