ការប្រកួតបើកឆាក Euro 2016 ក្នុងពូល B រវាងក្រុមអង់គ្លេស និងរុស្ស៊ីនៅពហុកីឡដ្ឋាន Stade Velodrome កាលពីរាត្រីថ្ងៃសៅរ៍ឈានចូលថ្ងៃអាទិត្យបានបញ្ចប់ក្នុងលទ្ធផលស្មើ១-១ ធ្វើឱ្យអ្នកគាំទ្រប្រទេសទាំងពីរមិនអស់ចិត្តរហូតកើតមានអំពើហិង្សាយ៉ាងពុះកញ្ជ្រោលថែមទៀតផង ។
យោងតាមសារព័ត៌មានអង់គ្លេស Daily Mail បានចេញផ្សាយថា អំពើហិង្សាមួយបានផ្ទុះឡើងផ្តើមចេញពីអ្នកគាំទ្រក្រុមរុស្ស៊ីបន្ទាប់ពីការតែតបញ្ចូលទី១គ្រាប់ចុងម៉ោងរបស់ខ្សែការពាររុស្ស៊ី Vasili Berezutski ជាហេតុធ្វើឱ្យអ្នកគាំទ្រអង់គ្លេសត្រូវបង្ខំចិត្តចាកចេញពីពហុកីឡដ្ឋានដោយអារម្មណ៍ភិតភ័យ អ្នកខ្លះរហូតដល់ថ្នាក់ផ្លោះរបងដើម្បីគេចចេញពីការវាយតប់ទៀតផង ។ អ្នកគាំទ្រប្រទេសទាំងពីរកើតមានជម្លោះជាថ្មីម្តងទៀតនៅជិតទីក្រុង Marseille ខណៈទីនោះពុំសូវមានប៉ូលិសឈរជើងការពារ ។ ប៉ូលិសបានសម្រេចបាញ់ទឹកទៅលើហ្វូងមនុស្សនៅកន្លែងបង្កជម្លោះដើម្បីបញ្ឈប់ការប្រើអំពើហិង្សារវាងអ្នកគាំទ្រប្រទេសទាំងពីរនៅតំបន់ Old Port ទីក្រុងMarseille។ ជម្លោះនេះនៅតែបន្តកើតមានរវាងជនបង្កក្នុងតំបន់នោះ និងប៉ូលិស ។
ហេតុការណ៍ដ៏អាក្រក់នេះ ត្រូវបានសហព័ន្ធកីឡាបាល់ទាត់ UEFA ធ្វើការថ្កោលទោសភា្លមៗចំពោះបុគ្គលណាដែលបានលូកដៃក្នុងអំពើហិង្សា គឺមិនអនុញ្ញាតឱ្យចូលមើលការប្រកួតបាល់ទាត់ទៀតឡើយ ស្របពេលដែលរូបភាព និងវីដេអូសកម្មភាពនៃអំពើហិង្សានេះត្រូវបានចែកចាយនៅលើប្រព័ន្ធផ្សព្វផ្សាយ ។ UEFA នឹងធ្វើការស៊ើបអង្កេតជុំវិញបញ្ហានេះ ដើម្បីរកឱ្យឃើញឬសគល់នៃបញ្ហា ក៏ដូចជាកាត់បន្ថយការកើតមានជម្លោះនៅពេលប្រកួតក្រោយៗទៀត ។ UEFA បន្ថែមថា ការអនុវត្តវិន័យនេះអាចធ្វើឡើងចំពោះតែប្រទេសណាដែលអ្នកគាំទ្ររបស់ខ្លួនប្រព្រឹត្រអំពើហិង្សាក្នុងបរិវេណពហុកីឡដ្ឋានតែប៉ុណ្ណោះ ។
អ្នកនាំពាក្យសហព័ន្ធកីឡាបាល់ទាត់UEFA លោក Mark Whittle បានថ្លែងថា សហព័ន្ធខកចិត្តយ៉ាងខ្លាំងនៅរាល់បញ្ហាដែលកើតមានឡើងក្នុងទីក្រុង Marseille ។ លោកក៏បានលើកឡើងថា សូមអ្នកគាំទ្រអង់គ្លេសទាំងអស់មេត្តារក្សាសេចក្តីថ្លៃថ្នូររបស់ខ្លួន ។
ទោះបីយ៉ាងណា សហព័ន្ធបាល់ទាត់រុស្ស៊ីបានបដិសេធភ្លាមៗទាក់ទងនឹងការចោទប្រកាន់អ្នកគាំទ្ររបស់ខ្លួនថាបានប្រើអំពើហិង្សាលើអ្នកគាំទ្រអង់គ្លេស ព្រមទាំងមិនទទួលស្គាល់រាល់កន្លែងបង្កជម្លោះនានាទៀតផង។ ប្រធានសហជីពអ្នកគាំទ្របាល់ទាត់រុស្ស៊ីលោក Aleksandr Shprigin បានលើកឡើងថា៖«ពិតណាស់!ពុំមានអំពើហិង្សាណាមួយកើតឡើងនោះទេ ។ ខាងអ្នកគាំទ្រអង់គ្លេសគ្រាន់តែក្រោកឈរ និងរត់ចេញបន្ទាប់ពីការប្រកួតចប់តែប៉ុណ្ណោះ ។ ដូចពួកយើងឃើញស្រាប់ហើយ គឺពុំមានការវាយតប់អ្វីទេ ព្រោះថាប៉ូលិសក៏ឈរនៅទីនោះដែរ» ។ លោក Shprigin បានបន្ថែមថា សហជីពនឹងដាក់ពិន័យអ្នកគាំទ្ររបស់ខ្លួនដែលបានប្រព្រឹត្តឥរិយាបថមិនត្រឹមត្រូវអំឡុងពេលនោះ ។
អ្វីដែលគួរឱ្យចាប់អារម្មណ៍នោះ មន្ត្រីកីឡារុស្ស៊ីលោក Vitaly Mutko បានទម្លាក់កំហុសទាំងស្រុងទៅលើភាពទន់ខ្សោយក្នុងការរៀបចំរបស់ប្រទេសបារាំង និងកង្វះសន្តិសុខនៅពហុកីឡដ្ឋាន ដែលឈានដល់កើតមានអំពើហិង្សានេះទៅវិញ ។ អាជ្ញាធរបារាំងមិនទាន់ចាត់វិធានការយ៉ាងណានៅឡើយទេជុំវិញករណីខាងលើនេះ ៕
ចែករំលែកព័តមាននេះ