រាជធានីភ្នំពេញ ៖ ទណ្ឌកម្មលើវិធានរក្សាការពារ (Safeguard Measurement) ចំនួន ៣ ឆ្នាំ របស់សហភាពអឺរ៉ុបចំពោះអង្ករដែលមានប្រភពពីកម្ពុជា និងភូមា នឹងបញ្ចប់នៅខែមករា ឆ្នាំ ២០២២ ខាងមុខ ។ អ្នកជំនួញអង្គរសង្ឃឹមថា ទីផ្សារសហគមន៍អឺរ៉ុប នឹងត្រូវបន្តកើនឡើង និងវិលទៅរកប្រក្រតីភាពវិញដោយនាំចូលដោយសេរី គ្មានការបង់ពន្ធអាករនាំចូល បន្ទាប់ពីការបញ្ចប់នូវការដាក់ទណ្ឌកម្មលើវិធានរក្សាការពារ (Safeguard Measurement) ចំនួន ៣ ឆ្នាំ ដល់កាលកំណត់នៅថ្ងៃទី ១៩ ខែមករា ឆ្នាំ ២០២២ ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពជា បានឱ្យដឹងថា ការដាក់ទណ្ឌកម្មលើវិធានរក្សាការពារនេះ មិនមែនដាក់តែកម្ពុជា នោះទេ នៅមានអង្កររបស់ភូមា ។ លោកថា ការដាក់ទណ្ឌកម្មនេះមិនមែនជារឿងនយោបាយនោះទេ គឺជារឿងបច្ចេកទេសនៅលើវិស័យស្រូវអង្ករដែលប្រជាជនរស់នៅសហគមន៍អឺរ៉ុបគាត់តវ៉ា ការនាំចូលអង្ករពីកម្ពុជា និងប្រទេសភូមាទៅធ្វើឱ្យគាត់ខាតបង់នូវអត្ថប្រយោជន៍ទៅវិញទេ ។
ក្រសួងពាណិជ្ជកម្ម កន្លងមបានចាត់ទុកការសម្រេចដាក់វិធានការការពារទីផ្សារដោយសហភាពអឺរ៉ុបមកលើអង្ករដែលមានប្រភពដើមមកពីកម្ពុជាថា មានឥទ្ធិពលគ្រប់គ្រាន់សម្រាប់ដកហូតចំណូលរបស់កសិករក្រីក្រកម្ពុជានិងជាអាវុធសម្រាប់ធ្វើឃាតកសិករនិងក្រមគ្រួសារដែលកំពុងជាប់បំណុលជាមួយ និងស្ថាប័នឥណទានដែលបានផ្តល់ប្រាក់កម្ចីដល់ពួកគត់ ។
លោកឧកញ៉ា ហ៊ុន ឡាក់ ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជាថ្មីៗនេះលើកឡើងថា ការនាំចេញអង្ករក្នុងរយៈពេល ១១ ខែ នៃឆ្នាំ ២០២១ នេះបានចំនួន ៥៣២ ១៧៩ តោន ដែលគិតជាទឹកប្រាក់មានចំនួនជាង ៣៦៦ លានដុល្លារសហរដ្ឋអាមេរិក ដែលបរិមាណនាំចេញនេះមានការធ្លាក់ចុះចំនួនជិត ១២% បើប្រៀបធៀបទៅនឹងរយៈពេលដូចគ្នាក្នុងឆ្នាំ ២០២០ ។ ប្រទេសដែលទិញអង្ករកម្ពុជាច្រើនជាងគេគឺ សាធារណរដ្ឋប្រជាមានិតចិន ចំនួន ៥០% នៃការនាំចេញសរុប ស្មើរនឹងបរិមាណចំនួន ២៥៦ ២៤៤តោន ការនាំចេញទៅកាន់សហគមន៍អឺរ៉ុបចំនួន ២៥% ឬ ១៣៤ ៤៣៨ តោន ការនាំចេញទៅកាន់ប្រទេសក្នុងតំបន់អាស៊ានជាពិសេស ម៉ាឡេស៊ី ព្រុយណេ និងសិង្ហបុរីបានចំនួន ៥៤ ៣៥០ តោន ឬ ១០% សម្រាប់គោលដៅផ្សេងក្នុងនោះ មានប្រទេសហ្កាប៊ុង អូស្ត្រាលី ណូវែលសេឡង់ ៕
ចែករំលែកព័តមាននេះ