ADផ្ទាំងផ្សព្វផ្សាយពាណិជ្ជកម្ម

Picture

ប្រដាល់​សាកលកម្ពុជា​​គ្រោង​ជួល​គ្រូ​ហុង​គ្រី​ មក​បង្ហាត់​ក្រុម​ជម្រើសជាតិ

4 ខែ មុន
  • ភ្នំពេញ

រាជធានី​ភ្នំពេញ​ ៖​ សហព័ន្ធ​កីឡាប្រដាល់​សាកល​កម្ពុជា​ មាន​គម្រោង​ចង់​ជួល​គ្រូ​មក​ពី​ប្រទេស​ហុង​គ្រី​ ដើម្បី​​បង្ហាត់​ដល់​ក្រុម​

រាជធានី​ភ្នំពេញ​ ៖​ សហព័ន្ធ​កីឡាប្រដាល់​សាកល​កម្ពុជា​ មាន​គម្រោង​ចង់​ជួល​គ្រូ​មក​ពី​ប្រទេស​ហុង​គ្រី​ ដើម្បី​​បង្ហាត់​ដល់​ក្រុម​កីឡាករ​-​កីឡាការិនី​ជម្រើសជាតិ​កម្ពុជា​ សម្រាប់​ត្រៀម​ប្រកួត​កីឡា​ស៊ី​ហ្គេ​ម​លើក​ទី​៣២ ​ឆ្នាំ​២០២៣​ ខាង​មុខ ​។ ​នេះ​បើ​តាម​ការ​លើក​ឡើង​របស់​លោក​ប៊ុ​យ សោ​ភ័​ណ្ឌ​ អគ្គលេខាធិការ​សហព័ន្ធ​កីឡាប្រដាល់​សាកល​កម្ពុជា នា​ឱកាស​បិទ​ការ​ប្រកួត​ជ្រើសរើស​ជើងឯក​ថ្នាក់​ជាតិ ប្រចាំឆ្នាំ​២០២១ ​ដែល​បាន​ធ្វើ​ឡើង​នៅ​ក្លិប​នាយកដ្ឋាន​អង្គរក្ស ស្ថិត​នៅ​ក្នុង​សង្កាត់​គីឡូម៉ែត្រ​លេខ​៦​ ខណ្ឌ​ឬ​ស្សី​កែវ​ កាលពី​ល្ងាច​ថ្ងៃអាទិត្យ​ ទី​២៦ ​ធ្នូ​​ ឆ្នាំ​២០២១ ។

លោក​ប៊ុ​យ សោ​ភ័​ណ្ឌ​ បានឱ្យ​ដឹង​ទៀត​ថា ប្រដាល់​សាកល​មិន​មាននៅ​ក្នុង​គម្រោង​ដែល​ត្រូវ​ចេញ​ទៅ​ហ្វឹកហាត់​នៅ​ក្រៅប្រទេស​ដូច​សហព័ន្ធ​ដ​ទៃ​ទៀត​នោះទេ​ ប៉ុន្តែ​ខាង​ក្រសួង​អប់រំ​យុវជន​និង​កីឡា​ ក៏​ដូច​ជា​គណៈកម្មាធិការ​ជាតិ​រៀបចំ​ស៊ី​ហ្គេ​ម​លើក​ទី​៣២ តម្រូវ​ឱ្យ​ជួល​គ្រូ​បរទេស​មក​បង្ហាត់​នៅ​ក្នុងស្រុក ហើយ​សហព័ន្ធ​មាន​សិទ្ធ​គ្រប់គ្រាន់​ក្នុង​ការ​ជ្រើសរើស​គ្រូ​ល្អ​ៗ ទោះបី​​តម្លៃ​​ជួល​ខ្ពស់​បែប​ណា​ក៏​ដោយ សំខាន់​ឱ្យ​តែ​មានគុណ​ភាព មាន​សមត្ថភាព​និង​បទ​ពិសោធន៍​ខ្ពស់​។​ប៉ុន្តែ​ក្នុង​ចំណោម​គ្រូ​បរទេស​ជា​ច្រើន​ លោក​មានការ​ចាប់អារម្មណ៍​ជាងគេ​គឺ​គ្រូ​ប្រទេស​ហុង​គ្រី ដែល​ជា​ប្រទេស​មួយ​ត្រូវ​បាន​សហព័ន្ធ​កីឡាប្រដាល់​អន្តរជាតិ​(AIBA)​ទទួលស្គាល់​ជា​ផ្លូវការ ថា​ វិស័យ​កីឡាប្រដាល់​សាកល​របស់​ប្រទេស​មួយ​នេះ​មាន​ស្តង់ដារ​ខ្ពស់​ ។

​លោកបានបន្ត​ថា បច្ចុប្បន្ន​ ក្រុម​កីឡាករ​ប្រដាល់​សាកល​កម្ពុជា កំពុង​តែ​ធ្វើការ​ហ្វឹកហាត់​ជាមួយ​គ្រូ​ក្នុងស្រុក​ជា​បណ្ដោះអាសន្ន​សិន​ ។ ​គម្រោង​មួយ​នេះ​លោក​កំពុង​តែ​ពិចារណា​ដើម្បី​ស្នើ​ទៅ​ក្រសួង​អប់រំ​យុវជន​និង​កីឡា​ក៏​ដូច​ជា​(CAMSOC)​ផង​ដែរ ដើម្បី​ទទួល​បាន​គ្រូ​ក្រៅប្រទេស​មក​បង្ហាត់​ដល់​ក្រុម​កីឡាករ​ជម្រើសជាតិ​ឱ្យ​បាន​ឆាប់​បំផុត​។ ​ម្យ៉ាងវិញទៀត​បច្ចុប្បន្ន​សហព័ន្ធ​កីឡាប្រដាល់​សាកល​កម្ពុជា មានការ​ខិតខំ​ប្រឹងប្រែង​យ៉ាង​ខ្លាំង ក្រៅពី​ការ​ប្រកួត​ជើងឯក​ថ្នាក់​ជាតិ​ក៏​បាន​រៀបចំ​ឱ្យ​មានការ​ប្រកួត​ផ្សេង​ៗ​ជា​ច្រើន​ទៀត ដូច​ជា​ការ​ប្រកួត​ដណ្ដើម​ប្រាក់​លាន ដែល​ទើបតែ​បញ្ចប់​ទៅ​កាលពី​ពេល​ថ្មី​ៗ​មកនេះ ក្នុង​គោលបំណង​ចង់​អភិវឌ្ឍ​កីឡាប្រដាល់​កម្ពុជា​កាន់តែ​ទទួល​បាន​នូវ​បទ​ពិសោធន៍​បន្ថែម​កាន់តែ​ច្រើន​ថែម​ទៀត​។

ដោយឡែក​ចំពោះ​ដំណើរការ​នៃ​ការ​ប្រកួត​ជ្រើសរើស​ជើងឯក​ថ្នាក់​ជាតិ​ឆ្នាំ​នេះ លោក​ប៊ុ​យ សោ​ភ័​ណ្ឌ​ បាន​ប្រាប់​ថា ប្រព្រឹត្ត​ទៅ​យ៉ាង​រលូន​តាំងពី​ថ្ងៃ​បើក​ការ​ប្រកួត​រហូត​ដល់​ថ្ងៃ​បញ្ចប់​ ។ ​រីឯ​លទ្ធផល​ចំណាត់ថ្នាក់​វិញ​ក្រសួង​សេដ្ឋកិច្ច​និ​ហិរញ្ញវត្ថុ​ដណ្ដើម​បាន​មេដាយមាស​ច្រើន​ជាងគេ​រហូត​ដល់​ទៅ​៤​គ្រឿង មេដាយ​ប្រាក់​១​គ្រឿង បន្ទាប់​មក​ក្លិប​កីឡាប្រដាល់​តា​ឡី​ដំរី​មាន​រឹទ្ធ​ដណ្ដើម​បាន​មេដាយមាស​២​គ្រឿង មេដាយ​ប្រាក់​១​គ្រឿង​និង​មេដាយ​សំ​រិ​ទ្ធ​១​គ្រឿង ក្លិប​គុ​ជ​សាសរ​មាន​រិ​ទ្ធ​ដណ្ដើម​បាន​មេដាយមាស​១​គ្រឿង​មេដាយ​ប្រាក់​១​គ្រឿង ក្រសួងការពារជាតិ​ដណ្ដើម​បាន​មេដាយមាស​១​គ្រឿង មេដាយ​ប្រាក់​១​គ្រឿង មេដាយ​សំរឹទ្ធ​១​គ្រឿង​ខេត្តកណ្ដាល​ដណ្ដើម​បាន​មេដាយមាស​១​គ្រឿង មេដាយ​សំរឹទ្ធ​១​គ្រឿង ខេត្ត​រតនៈគីរី​ដណ្ដើម​បាន​មេដាយមាស​១​គ្រឿង ក្លិប​បញ្ជាការដ្ឋាន​កងទ័ពជើងទឹក​ដណ្ដើម​បាន​មេដាយមាស​១​គ្រឿង​ ៕

Picture
Picture
Picture