- ភ្នំពេញ
ភ្នំពេញ៖ កាលពីថ្ងៃអាទិត្យ ទី២៦ ខែធ្នូ គឺមួយថ្ងៃមុនថ្ងៃប្រឡងសញ្ញាប័ត្រមធ្យមសិក្សាទុតិយភូមិ ឬការប្រឡងបាក់ឌុប គេឃើញនៅតែមានយុវជនយុវនារី ដែលជាបេក្ខជនប្រឡងបាក់ឌុបយ៉ាងច្រើន នាំគ្នាទៅបន់ស្រន់ នៅព្រះអង្គដង្កើ…
ភ្នំពេញ៖ កាលពីថ្ងៃអាទិត្យ ទី២៦ ខែធ្នូ គឺមួយថ្ងៃមុនថ្ងៃប្រឡងសញ្ញាប័ត្រមធ្យមសិក្សាទុតិយភូមិ ឬការប្រឡងបាក់ឌុប គេឃើញនៅតែមានយុវជនយុវនារី ដែលជាបេក្ខជនប្រឡងបាក់ឌុបយ៉ាងច្រើន នាំគ្នាទៅបន់ស្រន់ នៅព្រះអង្គដង្កើ ក្នុងរាជធានីភ្នំពេញ នៅលោកតាខ្មៅ ក្នុងក្រុងតាខ្មៅ ខេត្តកណ្តាល និងនៅលោកតាដំបងគ្រញូង ក្នុងទីរួមខេត្តបាត់ដំបង ជាដើម។ សិស្សានុសិស្សទាំងនោះ បាននាំគ្នាបន់ សុំឱ្យជោគជ័យក្នុងការប្រឡងបាក់ឌុប នាថ្ងៃទី២៧-២៨ ខែធ្នូនេះ។
បេក្ខជនប្រឡងបាក់ឌុប ដែលទៅអុជធូបបន់ស្រន់ លើកឡើងថា ការបន់ស្រន់ នៅព្រះអង្គដង្កើ មុខព្រះបរមរាជវាំង នៅមុនថ្ងៃប្រឡងនេះ ជាការសុំឱ្យការប្រឡងរបស់ពួកគេ ដំណើរការទៅល្អ និងជាការពង្រឹងផ្លូវចិត្តរបស់ពួកគេមួយបន្ថែមទៀត។
យ៉ាងណាក៏ដោយ ក្នុងពេលបេក្ខជនជាច្រើន ទៅបន់ស្រន់នៅព្រះអង្គដង្កើ នៅលោកតាខ្មៅ និងនៅលោកតាដំបងគ្រញូង ជាដើម ទោះបីជាម្នាក់ៗ បានពាក់ម៉ាសក៏ដោយ តែការរក្សាគម្លាតសុវត្ថិភាព គឺអនុវត្តមិនបានត្រឹមត្រូវឡើយ។ ពោលគឺមានពេលខ្លះ ដល់ថ្នាក់ប្រជ្រៀតគ្នា ទាំងអ្នកទៅបន់ ទាំងអ្នកលក់ធូបផ្កា និងទាំងអាចារ្យ អ្នកបម្រើការងារនៅកន្លែងបន់ស្រន់ទាំងនោះ។
ម្យ៉ាងការបន់ស្រន់ ទោះជាមានអ្នកយល់ថា ជាជំនឿ ដែលគោរពបែបន់ទៅ ក៏មិនខាតអ្វីទេ ហើយក៏ជារឿងអាគមផ្សំអាយុ ឬក៏ជាការពង្រឹងផ្នែកផ្លូវចិត្តក៏ដោយ ក៏ការជឿនេះ ជាជំនឿដោយមិនប្រើបញ្ញា។ បើសិនគ្រាន់តែបន់ស្រន់ពង្រឹងផ្លូវចិត្ត ហើយប្រឡងជាប់ ឬក៏គ្រាន់តែបន់ស្រន់ បានសុខសប្បាយ រកស៊ីមានបានមែននោះ សមម្លេះ ម្នាក់ៗ មិនចាំបាច់ខំប្រឹងរៀនសូត្រ ស្ទើរតែគ្មានពេលសម្រាករាល់ថ្ងៃនោះទេ ហើយក៏បានប្រឡងជាប់គ្រប់ៗគ្នា ជាមិនខាន។ ម្នាក់ៗ ក៏នឹងជួបតែសេចក្តីសុខទាំងអស់គ្នា ព្រោះគ្មាននរណា មិនចង់សុខនោះឡើយ និងច្បាស់ជាមានបានគ្រប់គ្នា ដោយមិនមានអ្នកកើតទុក្ខព្រួយ និងខ្វះខាតអ្វីឡើយ នៅស្រុកយើង។
ការបន់ស្រន់ទាំងអស់នេះ គួរតែយុវជនយើង ឈប់ជឿផ្តេសផ្តាសដូច្នេះតទៅទៀត។ យុវជនយើង ចូរខិតខំរៀនសូត្រ ខិតខំសាងអំពើល្អ កុំប្រព្រឹត្តិអំពើអាក្រក់ ឬអំពើល្មើសច្បាប់ ហើយខិតខំរកស៊ី ធ្វើការងារតាមមុខរបរ និងជំនាញរៀងៗខ្លួន នោះលទ្ធផលច្បាស់ណាស់ គឺប្រឡងជាប់ ទទួលបានសេចក្តីសុខ និងមានបាននូវទ្រព្យសម្បត្តិ ជាមិនខាន។
ស្រុកគេជឿនលឿន គេមិនជឿលើអ្វីផ្តេសផ្តាស និងមិនសមហេតុផលនោះទេ។ អ្នកជំនាន់ក្រោយយើង ក៏ត្រូវតែធ្វើខ្លួនឲ្យចេញឆ្ងាយពីអប្រិយជំនឿ ដែលមិនសមហេតុផល ហើយមកជឿជាក់លើសមត្ថភាពខ្លួនឯង តាមរយៈការខិតខំរៀនសូត្រ ដោយមានគ្រូជំនាញបង្រៀន និងស្តាប់ការណែនាំពីរៀមច្បង ដែលឆ្លងកាត់ការប្រឡងមុនៗ ប្រសើរជាងទៅផ្តុំក្បាលគ្នា អុជធូប បន់ស្រន់អារុកអារក្សអ្នកតាដូច្នេះ។
ករណីប្រមូលផ្តុំគ្នា ទៅអុជធូបបន់ស្រន់ឲ្យប្រឡងជាប់នេះ ក្នុងសម័យកាលកូវីដ មិនទាន់បាត់រលត់ ពេលនេះ គឺអាចប្រឈមនឹងការឆ្លងកូវីដ ហើយការស្រូបផ្សេងធូបទៀតសោត ក៏ធ្វើឲ្យប៉ះពាល់ដល់សុខភាពថែមទៀត។
ផ្ទុយទៅវិញ បេក្ខជនប្រឡងបាក់ឌុបយើង ត្រូវខិតខំរម្លឹកមេរៀន យកពេលសម្រាក គេងឲ្យគ្រប់គ្រាន់ និងថែរក្សាសុខភាពឲ្យបានល្អ ពិសេសការពារខ្លួន កុំឲ្យឆ្លងកូវីដ។ បេក្ខជន ក៏ត្រូវត្រៀមខ្លួន រៀបចំសម្ភារៈសម្រាប់យកទៅប្រឡង នៅថ្ងៃទី២៧-២៨ធ្នូ នូវសៀវភៅព្រាង ប៊ិចច្រើនដើម កាតសម្គាល់ខ្លួន ប័ណ្ណចាក់វ៉ាក់សាំង ជាដើម។ សម្រាកលំហែកាយ គេងឲ្យគ្រប់គ្រាន់ និងទទួលទានអាហារឆ្ងាញ់ ជាដើម។
បេក្ខជនយើង ក៏កុំភ្លេចថា ជួនកាលការធ្វើដំណើរទៅបន់ស្រន់អ្នកតា ឬព្រះអង្គនោះ អាចក្លាយជាគ្រោះវិញ ក៏ថាបាន ដូចជា ភ្លេចខ្លួន ជិះម៉ូតូទៅ ទុកចោល រវល់តែអុជធូបបន់ ក៏ត្រូវចោរលួចម៉ូតូ លួចមួក ឬក៏បាត់ស្បែកជើង ជាដើម។ ក៏អាចដែរ ពេលធ្វើដំណើរទៅបន់ស្រន់ ជួបគ្រោះថ្នាក់ចរាចរណ៍ ដោយយថាហេតុណាមួយ។
មុនថ្ងៃប្រឡង រដ្ឋមន្ត្រីក្រសួងអប់រំ លោក ហង់ជួន ណារ៉ុន បានណែនាំដល់បុគ្គលិកអប់រំ លោកគ្រូ-អ្នកគ្រូ និងសិស្សានុសិស្ស ត្រូវគោរពយ៉ាងម៉ឺងម៉ាត់តាមបញ្ញាត្តិរបស់ក្រសួងអប់រំ ក្នុងឱកាសនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ថ្ងៃ២៧-២៨ ធ្នូ ឆ្នាំ២០២១។ ការប្រឡងបាក់ឌុប ឆ្នាំនេះ នៅតែបន្តរឹតបន្តឹងដូចឆ្នាំមុនៗ ដោយមិនអនុញ្ញាតឲ្យបេក្ខជនយកប្រ៊ីយ៉ុង មិនមានការលួចចម្លង ហើយគ្រឿងអេឡិចត្រូនិច ដូចជា កាស្យូ ឬទូរស័ព្ទ មិនត្រូវបានអនុញ្ញាតឲ្យយកចូលបន្ទប់ប្រឡងឡើយ។ ក្នុងពេលប្រឡង ក៏មានការចូលរួមត្រួតពិនិត្យពីអង្គភាពប្រឆាំងអំពើពុករលួយ និងក្រុមយុវជនស្ម័គ្រចិត្តផងដែរ។
ក្រសួងអប់រំ បានប្រកាសថា ការប្រឡងបាក់ឌុប នៅឆ្នាំនេះ មានមណ្ឌលប្រឡងសរុប ២០៤មណ្ឌល ត្រូវជា៤៦១៦បន្ទប់ មានបេក្ខជនចុះឈ្មោះប្រឡងសរុប ១១៤ ១៨៣នាក់ ក្នុងនោះ មានស្ត្រី ៦០ ៣៩៧នាក់។ រីឯគណៈមេប្រយោគ និងគណៈកម្មការនានា ចូលរួមក្នុងដំណើរការប្រឡង មានចំនួន ៣១ ៤៣២នាក់។
តាមសាលារៀន ដែលជាមណ្ឌលប្រឡង ត្រូវបានរៀបចំអនាម័យ ដោយបាញ់ថ្នាំសម្លាប់មេរោគ មានឧបករណ៍វាស់កម្តៅនៅច្រកចូល និងមានគំនូសរក្សាគម្លាតសុវត្ថិភាពពីម្នាក់ទៅម្នាក់យ៉ាងត្រឹមត្រូវ។ ក្នុងនោះ បេក្ខជនប្រឡង ក៏ដូចជា គ្រូមេប្រយោគ អនុរក្ស មន្ត្រីរៀបចំការប្រឡង និងភ្នាក់ងារពាក់ព័ន្ធទាំងអស់ ក៏ត្រូវធ្វើតេស្តរកកូវីដ-១៩ នៅតាមមណ្ឌលរៀងៗខ្លួន នៅមុនថ្ងៃប្រឡងផងដែរ។ វិធានការទាំងនេះ ដើម្បីធានាឲ្យបានថា ការប្រឡង នាថ្ងៃទី២៧-២៨ ខែធ្នូ ប្រព្រឹត្តទៅប្រកបដោយសុវត្ថិភាព ចូលរួមទប់ស្កាត់ការរីករាលដាលជំងឺកូវីដ-១៩។
យ៉ាងណាក៏ដោយ ក្រសួងអប់រំ ក៏គួរយោគយល់ដល់បេក្ខជនប្រឡងបាក់ឌុប នៅឆ្នាំនេះផង ព្រោះដោយសារតែកូវីដ ឆ្លងរាលដាល តាមរយៈព្រឹត្តិការណ៍២០កុម្ភៈ គឺសាលារៀន ត្រូវបិទទ្វារចាប់តាំងពីខែមីនា ឆ្នាំ២០២១ រហូតដល់ខែកញ្ញា ទើបចូលរៀននៅសាលាដោយផ្ទាល់ឡើងវិញ។ ក្នុងអំឡុងពេល ៦ខែនេះ សិស្សត្រូវរៀនតាមអនឡាញ ដែលមានការលំបាក និងរអាក់រអួល ហើយសិស្សនៅសាលារៀនរដ្ឋ ពិសេសតាមខេត្ត និងនៅជនបទ មានបញ្ហា ដែលភាគច្រើន មិនអាចរៀនបានជាប់លាប់នោះទេ។
ឆ្នាំមុន ដោយសារតែកូវីដឆ្លងរាតត្បាតធូរស្រាលជាងឆ្នាំនេះ តែរាជរដ្ឋាភិបាល បានសម្រេចឲ្យបេក្ខជនប្រឡងបាក់ឌុប និងឌីប្លូម ជាប់ទាំងអស់គ្នា ដោយស្វ័យប្រវត្តិ ក្រោយពេលបេក្ខជនប្រឡងរួចប៉ុន្មានថ្ងៃ។ ដូច្នេះនៅឆ្នាំនេះ ដោយសារតែកូវីដ ឆ្លងរាតត្បាតខ្លាំងក្លា រហូតដល់បិទខ្ទប់រាជធានីខេត្ត និងតំបន់ ហើយសិស្សរៀនមិនបានពេញលេញផងនោះ គួរតែក្រសួងអប់រំ ចេញវិញ្ញាសាប្រឡង កុំឲ្យពិបាកៗ ពេក។ តែវិន័យក្នុងការប្រឡង ត្រូវតែបន្តរឹតបន្តឹង ដើម្បីឲ្យសិស្សខំរៀន ហើយការលួចចម្លង មើលប្រ៊ីយ៉ុង និងការសូកលុយគ្រូអនុរក្ស ក្នុងពេលប្រឡង ត្រូវតែបន្តលុបបំបាត់៕
ចែករំលែកព័តមាននេះ