ADផ្ទាំងផ្សព្វផ្សាយពាណិជ្ជកម្ម

Picture

អតីត​យោធា​អង្គុយ​លើ​រទេះ ប្រពន្ធ​បង្ហូរទឹកភ្នែក ព្រោះ​ជីវិត​កំសត់​ពេក​ពិបាក​រស់​(​វី​ដេ​អូ​)

5 ខែ មុន
  • បន្ទាយមានជ័យ

បុរស​វ័យ​ចំណាស់​ម្នាក់​ដែល​អង្គុយ​លើ​រទេះ​ដោយ​ពិការ​ជើង​ទាំង​២ ព្រមទាំង​ប្រពន្ធ​បង្ហូរទឹកភ្នែក​មើលទៅ​គួរ​ឲ្យ​សង្វេគ​ណាស់ ហើយ​គ្រួសារ​យោធិន​សោធន​និវត្តន៍​ដ៏​កំសត់​មួយ​នេះ បាន​ត្អូញត្អែរ​ថា

ខេត្តបន្ទាយមានជ័យ ៖ បុរស​វ័យ​ចំណាស់​ម្នាក់​ដែល​អង្គុយ​លើ​រទេះ​ដោយ​ពិការ​ជើង​ទាំង​២ ព្រមទាំង​ប្រពន្ធ​បង្ហូរទឹកភ្នែក​មើលទៅ​គួរ​ឲ្យ​សង្វេគ​ណាស់ ហើយ​គ្រួសារ​យោធិន​សោធន​និវត្តន៍​ដ៏​កំសត់​មួយ​នេះ បាន​ត្អូញត្អែរ​ថា ពិបាក​រស់ ព្រោះ​កាត​បើក​ប្រាក់ខែ​ដាក់បញ្ចាំ​គេ ឯ​ប្លង់​ដី​ក៏​បញ្ចាំ​ធនាគារ ដើម្បី​មើលជំងឺ​បុរស​ជា​មេ​គ្រួសារ និង​ត្រូវ​ចិញ្ចឹម​ចៅ ព្រមទាំង​កូនកំព្រា​រហូត​៥​នាក់ ក្នុង​បន្ទុក​ទៀត​។

គ្រួសារ​ខាងលើ ដែល​មាន​បុរស​ជា​ប្តី​ឈ្មោះ ហេង វុ​ធ អាយុ​៦៣​ឆ្នាំ និង​មាន​ប្រពន្ធ​ឈ្មោះ ឆាយ គី​ម អាយុ​៦៤​ឆ្នាំ មាន​ទីលំនៅ​ក្នុង​មណ្ឌល​អភិវឌ្ឍន៍​យោធិន​ពិការ​៣១៧ តេ​ជោ​ភ្នំ​ឆ័​ត្រ ស្ថិត​ក្នុងភូមិ​តេ​ជោ​ភ្នំ​ឆ័​ត្រ ឃុំ​និង​ស្រុក​ស្វាយចេក​។

Picture

បើ​តាម​បុរស​ជា​ជន​ពិការ​រូប​នេះ បាន​ប្រាប់​ថា គាត់​ជា​អតីត​យោធា​ទ័ពព្រៃ (​ប៉ា​រ៉ា​) តាំងពី​ឆ្នាំ​១៩៧៩ ប៉ុន្តែ​ក្នុង​ឆ្នាំ​១៩៨៤ គាត់​បាន​ចូល​សារភាព​នៅ​ឃុំ​ម្កាក់ អតីត​ស្រុក​សិរី​សោភ័ណ ខេត្តបាត់ដំបង ដែល​បច្ចុប្បន្ន​ជា​ខេត្តបន្ទាយមានជ័យ និង​ក្រោយមក​បាន​បំរើ​ការងារ​ជា​យោធា​ដដែល​នៅ​ផ្នែក​កង​អន្តរាគមន៍​យោធា​វរ​៥១៣ នៃ​កងពលតូច​ថ្មើ​ជើង​លេខ​៥១ ដែល​មាន​ឋានន្តរសក្តិ​អនុសេនីយ៍ត្រី​។

គាត់​បន្ត​ទៀត​ថា លុះ​ពេល​សម័យ​សង្គ្រាម​រវាង​កម្ពុជា​និង​ថៃ ក្នុង​ជម្លោះ​ប្រាសាទព្រះវិហារ​នា​ឆ្នាំ​២០០៨​នោះ គាត់​បាន​ជួប​គ្រោះ​អកុសល​ដោយ​ដើរ​ប៉ះ​ខ្សែ​មីន​៦៩ បណ្តាល​ឲ្យ​ផ្ទុះ ប៉ុន្តែ​មិន​ដាច់​ជើងទេ ត្រឹម​របួស​ភ្លៅ​ខាងឆ្វេង​ប៉ុណ្ណោះ ខណៈ​ពេល​ដែល​ចុះ​បេសក​កម្ម​នៅ​បន្ទាត់​ព្រំ​ដែ​ក្នុងភូមិ​សាស្ត្រ​ឃុំ​អូរ​បី​ជាន់ ស្រុក​អូរ​ជ្រៅ​។

Picture

គាត់​បន្ត​ថា ដោយសារ​មាន​ជំងឺ​ទឹកនោមផ្អែម​ធ្ងន់ធ្ងរ គាត់​ក៏​ត្រូវ​កាត់​ជើង​ចំនួន​៥​ដង ដោយ​លើក​ទី​១ កាត់​ជើង​ខាងឆ្វេង​ត្រឹម​ប្រអប់ជើង​, លើក​ទី​២ កាត់​ស្មងជើង​, លើក​ទី​៣ កាត់​ភ្លៅ​។ លុះ​ជំងឺ​របស់​គាត់​នៅ​តែ​មិនជា​សះស្បើយ​ទៀត គាត់​ក៏​ត្រូវ​គេ​កាត់​ជើង​ខាងស្តាំ​២​លើក​ទៀត ដោយ​លើក​ទី​១ កាត់​ស្មងជើង និង​លើក​ទី​២ កាត់​ភ្លៅ ទើប​បានជា​ដល់​បច្ចុប្បន្ន​នេះ​។ ដ្បិតតែ គាត់​ត្រូវ​បាន​កាត់​រំសាយ​ជា​យោធិន​សោធន​និវត្តន៍ ប៉ុន្តែ​គាត់​ទទួល​បាន​របប​ដី​ពី​រាជរដ្ឋាភិបាល​១​ឡូ​តិ៍ ទំហំ​១០០​ម៉ែត្រ​គុណ​១៥០​ម៉ែត្រ និង​ប្រាក់​របប​សោ​ធិ​ន​និវត្តន៍ ១​ខែ​២​លាន​និង​២០​ម៉ឺន​រៀល​។

Picture

ចំណែក​ស្ត្រី​ជា​ប្រពន្ធ ក៏​បាន​រៀបរាប់​ទាំង​សម្រក់​ទឹកភ្នែក​ដែរ​ថា ដោយសារ​ប្តី​របស់​គាត់​ជួប​គ្រោះ​អកុសល​ជា​បន្តបន្ទាប់ ដូច​បាន​រៀបរាប់​ខាងលើ​នេះ ទើប​កន្លង​មក គាត់​ត្រូវ​បង្ខំចិត្ត​យក​របប​យោធិន​សោធន​និវត្តន៍ ដែល​ជា​អាយុជីវិត​របស់​គ្រួសារ​ទៅ​ដាក់បញ្ចាំ​គេ​ចំនួន​២​ម៉ឺន​ដុល្លារ​រយៈពេល​៥​ឆ្នាំ ទើបបាន​របប​ប្រាក់ខែ​នោះ​មក​វិញ​។

Picture

មិនតែប៉ុណ្ណោះ គ្រួសារ​កំសត់​ខាងលើ​នេះ ក៏​បាន​បន្ត​ទៀត​ថា សូ​ម្បី​តែ​ប្លង់​ដី​កន្លែង​រស់នៅ​បច្ចុប្បន្ន​នេះ ក៏​យក​ទៅ​ដាក់បញ្ចាំ​ធនា​គារ​បាន​លុយ​ចំនួន​១​ម៉ឺន​ដុល្លារ​បន្ថែម​ទៀត​ដើម្បី​យក​ប្រាក់​មើលថែ​ប្តី​ដែល​ត្រូវ​វះកាត់​ជើង​ម្តង​ហើយ​ម្តងទៀត និង​ត្រូវ​ចិញ្ចឹម​កូនកំព្រា​ប្រុស​អាយុ​១៤​ឆ្នាំ​ម្នាក់ ព្រមទាំង​ចៅប្រុស​ស្រី​ចំនួន​៤​នាក់​ផ្សេង​ទៀត សរុប​៥​នាក់​ក្នុង​បន្ទុក​ផង​ដែរ​។

គ្រួសារ​ពិការ​ខាងលើ​នេះ បាន​លើកដៃ​សំពះ​អំពាវនាវ​ដល់​សប្បុរសជន​ទាំង​ក្នុង និង​ក្រៅប្រទេស ជា​ពិសេស​ថ្នាក់ដឹកនាំ មេត្តា​ជួយ​គ្រួសារ​ពួក​គាត់​ផង ដើម្បី​ជីវិត​ចុង​ក្រោយ​នេះ​៕