រាជធានីភ្នំពេញ ៖ ធន់ ស៊ីហុង មកពីសមាគមកីឡាប្រដាល់កងយោធពលខេមរភូមិន្ទ និងរិន ដេវីត មកពីក្លិបនាគរាជចតុមុខ បានណាត់ជួបគ្នាដើម្បីជម្រះបញ្ជីចាស់ម្ដងទៀត នៅលើសង្វៀនស៊ីអិនស៊ី នៅថ្ងៃសៅរ៍ ទី២៥ ធ្នូ ក្នុងកម្មវិធីដណ្ដើមប្រាក់លានពីខារ៉ាបាវ។
គេនៅចាំបានថា ធន់ ស៊ីហុងនិងរិន ដេវីត ធ្លាប់ប៉ះគ្នាម្ដងកាលពីឆ្នាំ២០២០ រហូតមកទល់ពេលនេះមានរយៈមួយឆ្នាំគត់ ។ កាលណោះ អ្វីដែលធ្វើឱ្យធន់ ស៊ីហុង មិនទាន់អស់ចិត្តនោះ គឺគេបានភ្លាត់ស្នៀតបណ្ដោយឱ្យរិន ដេវីត វាយចូលសៀតផ្កាជាច្រើនកែងរហូតដល់ថ្នាក់ដួលសន្លប់ធំតែម្ដង ។ ទោះជាបែបនេះក្ដី ក៏ធន់ ស៊ីហុង មិនខ្លាចដែរ គេនៅតែមានបំណងចង់ជួបប្រកួតសងសឹកម្ដងទៀតដើម្បីស្ដារមុខមាត់ឡើងវិញ។ម្យ៉ាងវិញទៀតធន់ ស៊ីហុង មួយរយៈមកនេះមិនដូចកាលពីមួយឆ្នាំមុននោះទេ គេកំពុងតែឡើងកូដខ្លាំងមែនទែន ។ ជាក់ស្ដែងកាលពីថ្ងៃសៅរ៍សប្ដាហ៍មុន គេទើបតែយកឈ្នះលើអ្នកប្រដាល់វ័យក្មេងល្បីឈ្មោះ កាន់ ម៉េងហុង មកពីក្លិបនាគរាជចតុមុខដោយពិន្ទុទៀតផង ។ ដូច្នេះសម្រាប់ការប៉ះជាមួយរិន ដេវីត លើកនេះគេមានជំនឿចិត្តច្រើនក្នុងការយកឈ្នះដើម្បីសងសឹកផងនិងក្លាយជាម្ចាស់ប្រាក់លានផង។
នៅលើសង្វៀនដដែល គង់ សំបូរ មកពីក្លិបគោព្រៃគុនខ្មែរ និងសោម វិឆ័យ មកពីក្លិបវិបុលដារិទ្ធខណ្ឌពោធិសែនជ័យ ត្រូវបានគេរៀបចំឱ្យជួបប្រកួតដណ្ដើមប្រាក់លានដែរ ប៉ុន្តែគូនេះអត់ដែលប៉ះគ្នាពីមុនមកទេ ។ គង់ សំបូរ យូរៗទើបគេឃើញមានមុខឡើងសង្វៀនម្ដង តែកុំមើលស្រាលអ្នកប្រដាល់ចាស់វស្សាម្នាក់នេះឱ្យសោះ ថ្វីដៃប្រកួតរបស់គេល្អណាស់ ។ បើធ្វើការប្រៀបធៀបជាមួយសោម វិឆ័យ គឺមិនដូចគ្នានោះទេ ។ សោម វិឆ័យ ក៏ជាអ្នកប្រដាល់ចាស់វស្សាមួយរូបដែរ ប៉ុន្តែមួយរយៈមកនេះធ្លាក់កូដជាងមុន ពោលគឺចាញ់ច្រើនជាងឈ្នះ ។ ទោះជាបែបនេះក្ដី កុំអាលទាយទុកមុន អី ស្រួលមិនស្រួលត្រូវមួយកែងរបស់សោម វិឆ័យ
ច្បាស់ជាសន្លប់ធំមិនខាន។
ចំណែកគូប្រកួតដណ្ដើមប្រាក់ពីរលានរៀលពីកម្មវិធីអ្នកតស៊ូគុនខ្មែរគោជល់នៅថ្ងៃសៅរ៍នេះដែរ គឺជាការប៉ះគ្នារវាងកីឡាករជ័រ ពៅ មកពីក្លិបនិរោធគុនខ្មែរ ជាមួយកីឡាករវ៉ាន់ វឿន មកពីក្លិបឃ្លាំងមឿងកីឡា ។ គូនេះក៏អត់ដែលប៉ះគ្នាពីមុនមកដែរ ខណៈកីឡាករជ័រ ពៅ ក៏អត់ដែលបង្ហាញមុខនៅលើសង្វៀនស៊ីអិនស៊ី ។ ដូច្នេះសម្រាប់គូនេះបើចង់ដឹងថា អ្នកណាក្លាយជាម្ចាស់ប្រាក់ពីរលានរៀលនោះទាល់តែរង់ចាំតាមដានតាមកញ្ចក់ទូរទស្សន៍ទាំងអស់គ្នាវេលាម៉ោង៦ល្ងាចតទៅ ៕
ចែករំលែកព័តមាននេះ