ឈុតឆាកសម្ដែងបទ «អ្នកចម្បាំង» បង្ហាញពីភាពរឹងមាំរបស់កីឡាខ្មែរតាំងពីអតីតកាល
- ភ្នំពេញ
រាជធានីភ្នំពេញ ៖ មកទល់ពេលនេះ ឈុតឆាកសម្ដែងក្នុងបទ «អ្នកចម្បាំង» ដែលមានការចូលរួមពីសំណាក់កីឡាករកីឡាការិនី
រាជធានីភ្នំពេញ ៖ មកទល់ពេលនេះ ឈុតឆាកសម្ដែងក្នុងបទ «អ្នកចម្បាំង» ដែលមានការចូលរួមពីសំណាក់កីឡាករកីឡាការិនីយ៉ាងច្រើនកុះកររបស់សហព័ន្ធគុនល្បុក្កតោកម្ពុជា នៅក្នុងព្រឹត្តិការណ៍ដ៏ធំជាប្រវត្តិសាស្ត្រ កាលពីថ្ងៃទី១៨ ខែធ្នូ ឆ្នាំ២០២១ នៃពិធីសម្ពោធដាក់ឲ្យប្រើប្រាស់ជាផ្លូវការ ការរាប់ថយក្រោយ ៥០២ថ្ងៃ និងប្រកាសបើកយុទ្ធនាការផ្សព្វផ្សាយឆ្ពោះទៅកាន់ការប្រកួតស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ក្រោមវត្តមានដ៏ខ្ពង់ខ្ពស់សម្តេចតេជោនាយករដ្ឋមន្ត្រី ហ៊ុន សែន ត្រូវបានគេចាត់ទុកថា គឺជាឈុតឆាកបង្ហាញពីភាពខ្លាំងក្លានៃវិស័យកីឡាខ្មែរ គួរអោយចាប់អារម្មណ៍។
មន្ត្រីអ្នករៀបចំបានអះអាងថា ការសម្ដែងនៅក្នុងបទនេះ បង្ហាញកូនខ្មែរ និងជនបរទេសឱ្យឃើញកាន់តែច្បាស់នៃប្រវត្តិក្បាច់គុនខ្មែរ ដ៏យូរលង់ដែលកំពុងតែរីកចម្រើននាពេលនេះ ដោយគ្រាន់តែនៅក្នុងពេលនោះមិនទាន់មានការបែកចែកថា ក្បាច់គុនណា កីឡាអ្វីដូចបច្ចុប្បន្ន។
ការសម្ដែងនៅក្នុងបទចម្រៀងនេះ ក៏នឹងផ្តល់ជូនដល់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ ឆ្នាំ២០២៣ (CAMSOC) យកទៅប្រើនៅក្នុងពេលនោះ អមជាមួយនឹងការរៀបចំឈុតឆាកអោយកាន់តែទាក់ទាញផងដែរ។ ការសម្ដែងនេះ គឺមានកីឡាកររហូតដល់រាប់រយនាក់ចូលរួម ដោយតាមការប៉ាន់ស្មានសម្រាប់ការសម្ដែងលើកក្រោយ គឺអាចរៀបចំកីឡាករសម្ដែងបទនេះ កាន់តែច្រើនរយនាក់នៅលើទីលាន។
លោក អ៊ូ តារា អគ្គលេខាធិការរងសហព័ន្ធកីឡាគុនល្បុក្កតោកម្ពុជាបញ្ជាក់ថា គោលបំណងនៃការផលិតឈុតឆាកនេះ គឺស្របទៅគោលបំណងនៃគោលនយោបាយរបស់រាជរដ្ឋាភិបាលដែលមានសម្តេចអគ្គមហាសេនាបតីតេជោហ៊ុន សែន ជាប្រមុខ ក្នុងការជំរុញការផ្សព្វផ្សាយវិស័យកីឡាគ្រប់មធ្យោបាយ ដើម្បីឆ្ពោះទៅព្រឹត្តិការណ៍SEA Games 2023 ។
បទ«អ្នកចម្បាំង»បានបញ្ចូលគ្នារវាងសិល្បៈសម័យ និងបុរាណ ហើយបានរំលេចចេញនូវទស្សនីយភាពថ្មីមួយដែលមិនធ្លាប់មានពីមុនមក ដោយមានជាទម្រង់ស្នៀតគុនល្បុក្កតោ និងទម្រង់យុទ្ធវិធីទ័ពសម័យអង្គរ និងខ្លឹមសារចម្រៀងឧទ្ទិសស្នាដៃដល់បុព្វបុរស ទំនៀមទម្លាប់ប្រពៃណីអ្នកហាត់គុន ជំនឿសាសនា និងការជំរុញដល់យុវជនឱ្យមានស្មារតីជាអ្នកប្រយុទ្ធ ក្នុងការថែរក្សាមរតកដ៏វិសេសវិសាលមួយនេះ។
លោក អ៊ូ តារា បន្ថែមទៀតថា «តាមរយៈបទអ្នកចម្បាំងនេះ យើងរំពឹងថានឹងអាចជំរុញទឹកចិត្ត ឬកៀរគរមហាជន និងយុវជនឲ្យចូលរួមក្នុងចលនាគាំទ្រគុនល្បុក្កតោ ដើម្បីឲ្យមរតកដូនតាមួយនេះពេញនិយមនៅក្នុងស្រុក និងសាយភាយទៅក្រៅប្រទេស ឲ្យស័ក្តិសមជាមរតករបស់មហានគរ ជាពិសេសគឺដំណើរឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម ឆ្នាំ២០២៣ តែម្តង»។
សូមបញ្ជាក់ថា នេះជាសមិទ្ធផលថ្មីមួយរបស់វិស័យកីឡាគុនល្បុក្កតោកម្ពុជា ដែលបានបង្ហាញពីការសម្តែងដ៏អស្ចារ្យក្នុងព្រឹត្តិការណ៍សម្ពោធវិមានកីឡដ្ឋាននៃពហុកីឡដ្ឋានជាតិមរតកតេជោ ក្រោមកិច្ចសហការផលិតជាមួយផលិតកម្មរាម។
ក្រោយពីសម្រិតសម្រាំងនូវស្នាដៃវីដេអូនេះរួចរាល់ គ្រោងនឹងធ្វើពិធីដ៏ធំមួយដើម្បីប្រគល់ជូនបទចម្រៀងនេះជូនទៅ CAMSOC ៕
ចែករំលែកព័តមាននេះ