ខេត្តពោធិ៍សាត់ ៖ ដើម្បីជាការដឹងគុណចំពោះបងប្អូនប្រជាពលរដ្ឋដែលបានបោះឆ្នោតជូនគណបក្សប្រជាជនកម្ពុជាជារៀងរហូតមកនោះ លោករដ្ឋមន្ត្រី ស៊ុយ សែម ប្រធានក្រុមការងារថ្នាក់កណ្ដាល ចុះជួយខេត្តពោធិ៍សាត់
ខេត្តពោធិ៍សាត់ ៖ ដើម្បីជាការដឹងគុណចំពោះបងប្អូនប្រជាពលរដ្ឋដែលបានបោះឆ្នោតជូនគណបក្សប្រជាជនកម្ពុជាជារៀងរហូតមកនោះ លោករដ្ឋមន្ត្រី ស៊ុយ សែម ប្រធានក្រុមការងារថ្នាក់កណ្ដាល ចុះជួយខេត្តពោធិ៍សាត់ រួមជាមួយថ្នាក់ដឹកនាំក្នុងជួរគណបក្សតែងតែបានចុះសួរសុខទុក្ខនាំយកអំណោយ និងកសាងនូវសមិទ្ធផលផ្សេងៗដែលជាតម្រូវការចាំបាច់ក្នុងមូលដ្ឋាន ដើម្បីប្រគល់ជូនបងប្អូនប្រជាពលរដ្ឋប្រើប្រាស់រួមគ្នា។ ជាក់ស្ដែងថ្ងៃទី០៤ មិថុនា ២០១៦ លោករដ្ឋមន្ត្រី ស៊ុយ សែម រួមជាមួយក្រុមការងារបានចុះសំណេះសំណាលសួរសុខទុក្ខបងប្អូនជនជាតិខ្មែរអិស្លាម នៅភូមិថ្មី ឃុំរំលេច ចំនួន២៥៣នាក់, នៅភូមិព្រៃដំរី និងភូមិព្រៃផ្ដៅ ឃុំបឹងខ្នារ ស្រុកបាកាន ចំនួន៤៨៩នាក់ ដើម្បីដឹងសុខដឹងទុក្ខគ្នាទៅវិញទៅមក។
នៅភូមិថ្មី ឃុំរំលេច លោករដ្ឋមន្ត្រី ស៊ុយ សែម បានជួយកសាងវិហារអិស្លាមមួយអស់ថវិកាជាង២០.០០០ដុល្លារសហរដ្ឋអាមេរិក ដោយសារវិហារមុនធ្វើអំពីឈើចាស់ទ្រុឌទ្រោមណាស់ទៅហើយ។ ចំពោះរបងព័ទ្ធជុំវិញវិហារនៅសល់៨៦ម៉ែត្រទៀត លោករដ្ឋមន្ត្រីបានជួយកសាងបង្ហើយព្រមទាំងបានផ្ដល់ថវិកាចំនួន៣.២០០ដុល្លារទៀតសម្រាប់ស្ដារស្រះទឹកដ៏ធំមួយប្រើរួមគ្នា។ ដោយឡែកបងប្អូនប្រជាពលរដ្ឋទាំង០៣ភូមិ ដែលទៅចូលរួមសរុប៧៤២នាក់ លោករដ្ឋមន្ត្រីបានជូនក្រមាម្នាក់មួយ និងថវិកា១០.០០០រៀល ជារបស់កំដរដៃផងដែរ។
លោករដ្ឋមន្ត្រី ស៊ុយ សែម បានលើកឡើងពីការខិតខំប្រឹងប្រែងរបស់រាជរដ្ឋាភិបាលក្នុងការធ្វើឲ្យប្រសើរឡើងនូវកំណើនសេដ្ឋកិច្ចជាតិ ការអភិវឌ្ឍន៍ប្រទេស ទឹក ភ្លើង ផ្លូវ ធនធានមនុស្ស និងវិស័យផ្សេងៗទៀត មានការរីកចំរើនជាបន្តបន្ទាប់ដែលធ្វើឲ្យបណ្ដាប្រទេសលើសកលលោកមានការចាប់អារម្មណ៍យ៉ាងខ្លាំង។ ជាមួយគ្នានេះ រាជរដ្ឋាភិបាលបានទប់ស្កាត់នូវរាល់ការប៉ុនប៉ងរបស់គណបក្សប្រឆាំង និងជនមួយក្ដាប់តូចដែលមានគោលបំណងធ្វើឲ្យព្រះមហាក្សត្សរង្គោះរង្គើ សង្គមក្រឡាប់ចាក់ និងព្យាយាមបំបែកបំបាក់រដ្ឋាភិបាលដែលដឹកនាំដោយសម្ដេចតេជោ ហ៊ុន សែន កើតចេញពីការបោះឆ្នោត។ នៅថ្ងៃទី០៤ មិថុនា ២០១៧ ខាងមុខនេះ នឹងមានការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣ ដូច្នេះសូមបងប្អូនដែលមិនទាន់ធ្វើអត្តសញ្ញាណប័ណ្ណនាំគ្នាទៅធ្វើឲ្យបានគ្រប់ៗគ្នា ដើម្បីមានសិទ្ធិបោះឆ្នោតជ្រើសរើសអ្នកដែលខ្លួនស្រឡាញ់ពេញចិត្តមកអភិវឌ្ឍន៍ភូមិ-ឃុំឲ្យកាន់តែរីកចំរើនថែមទៀត។
កន្លងមករូបលោករួមជាមួយក្រុមការងារបានជីកស្រះជូនបងប្អូនស្ទើរតែគ្រប់ផ្ទះ ដើម្បីចិញ្ចឹមត្រី។ គ្រួសារមួយចំនួនធំដែលឧស្សាហ៍ព្យាយាមបានអនុវត្តន៍ធ្វើឲ្យជីវភាពប្រសើរជាងមុនច្រើន។ អ្នកខ្លះរក្សាទឹកទុកប្រើប្រាស់ ឯខ្លះទៀតបែរជាទុកស្រះចោលឲ្យក្របីដេកទៅវិញ។ លោករដ្ឋមន្ត្រី ស៊ុយ សែម សូមឲ្យបងប្អូនខិតខំជម្រុញលើការងារបង្កបង្កើនផលស្រូវរដូវប្រាំង និងស្រូវវស្សា ដាំដំណាំ ចិញ្ចឹមសត្វឲ្យបានច្រើន ដើម្បីដោះស្រាយជីវភាពគ្រួសារ ចៀសវាងយកពេលវេលាទៅលេងល្បែងស៊ីសង ផឹកស៊ីឈ្លោះប្រកែកគ្នា ឫប្រើអំពើហិង្សាវាយតប់គ្នានាំឲ្យមានទោស៕
ចែករំលែកព័តមាននេះ