ADផ្ទាំងផ្សព្វផ្សាយពាណិជ្ជកម្ម

Picture

ប្តី​ប្រពន្ធ​វ័យ​ចំណាស់​ស្រែក​រក​យុត្តិធម៌​រឿង​ដី ខណៈ​មេឃុំ​ថា​ឯកសារ​អ្នកទិញ​មិន​ប្រក្រតី(​វី​ដេ​អូ​)

4 ខែ មុន
  • បន្ទាយមានជ័យ

គ្រួសារ​ប្តី​ប្រពន្ធ​វ័យ​ចំណាស់​មួយ បាន​អំពាវនាវ​រក​យុត្តិធម៌ រឿងរ៉ាវ​ស្នាម​មេដៃ​មិន​ប្រក្រតី​ដោយ​អះអាង​ថា មាន​គេ​លួច​ក្លែងបន្លំ​ឯកសារ​ធ្វើ​ពាក្យកាន់​កា​.​ប់​

ខេត្តបន្ទាយមានជ័យ ៖ គ្រួសារ​ប្តី​ប្រពន្ធ​វ័យ​ចំណាស់​មួយ បាន​អំពាវនាវ​រក​យុត្តិធម៌ រឿងរ៉ាវ​ស្នាម​មេដៃ​មិន​ប្រក្រតី​ដោយ​អះអាង​ថា មាន​គេ​លួច​ក្លែងបន្លំ​ឯកសារ​ធ្វើ​ពាក្យកាន់​កា​.​ប់​ដីធ្លី យក​ដី​ពួក​គាត់​អស់​ទំហំ ៤០​ម៉ែត្រ​គុណ​៨០​ម៉ែត្រ ខណៈ​ពេល​កន្លង​មក ពួក​គាត់​លក់​ត្រឹមតែ​៤០​ម៉ែត្រ​គុណ​៤០​ម៉ែត្រ​តែ​ប៉ុណ្ណោះ​។

Picture

គ្រួសារ​ដង្ហោយ​រក​យុត្តិធម៌​ខាងលើ​នេះ មានឈ្មោះ កែ វណ្ណៈ អាយុ​៦៧​ឆ្នាំ និង​មាន​ប្រពន្ធ​ឈ្មោះ សែន សឿ​ប អាយុ​៥៩​ឆ្នាំ មាន​ទីលំនៅ​ក្នុងភូមិ​ដងរ៉ែក ឃុំ​បន្ទាយឆ្មា ស្រុក​ថ្មពួក​។ បើ​តាម​គ្រួសារ​ខាងលើ​នេះ​បាន​រៀបរាប់​ឱ្យ​ដឹង​ថា ក្នុង​ឆ្នាំ​២០១០ ពួក​គាត់​បាន​លក់​ដី​ចំនួន​៤០​ម៉ែត្រ​គុណ​៤០​ម៉ែត្រ ក្នុងភូមិ​-​ឃុំ​ខាងលើ​ទៅ​ឲ្យ​គ្រួសា​មួយ​ដែល​មាន​ប្តី​ឈ្មោះ លេង ម៉ា​រ៉ា និង​មាន​ប្រពន្ធ​ឈ្មោះ គង់ សា​ម៉​ន ក្នុង​តម្លៃ​៥​ម៉ឺន​បាតប្រាក់​ថៃ​។

ពួក​គាត់​ថា ក្នុង​គ្រា​លក់ដូរ​កាលនោះ មិន​បាន​ធ្វើ​លិខិត​ផ្ទេរសិទ្ធិ ឬ​កាត់​លក់​ដី​នោះ​ដែរ ព្រោះ​ជា​អ្នក​ជិតខាង ប៉ុន្តែ​ពួក​គាត់​ទទួលស្គាល់​ថា បាន​ទទួល​លុយ​ពី​ការ​លក់​ដី​ទំហំ​ដែល​បាន​លក់​៤០​ម៉ែត្រ​គុណ​៤០​ម៉ែត្រ​មែន​។ ពួក​គាត់​បន្ត​ថា លុះ​គ្រួសា​អ្នកទិញ​ដី​គាត់ មានរឿង​ជាមួយ​គ្រួសារ​ផ្សេង​ទៀត ក៏​ស្រាប់តែ​អាជ្ញាធរ​ចុះ​ដោះស្រាយ ហើយ​ពេល​ឃើញ​គ្រួសារ​នោះ​មាន​ពាក្យកាន់​កា​.​ប់​ដីធ្លី និង​ទំហំ​ដី រហូត​ដល់​ទៅ​៤០​ម៉ែត្រ​គុណ​៨០​ម៉ែត្រ ទើប​ពួក​គាត់​ភ្ញាក់​ព្រើត និង​តវ៉ា​ថា ហេតុ​អ្វី​គ្រួសារ​ខាងលើ ធ្វើ​ពាក្យសុំ​កាន់កា​.​ប់​ដីធ្លី ដោយ​យក​ដី​របស់​ពួក​គាត់​បែប​ហ្នឹង? ម្យ៉ាង​ពួក​គាត់​តាំងពី​ទិញ ឬ​លក់​មិន​ដែល​ផ្តិត​មេដៃ​នៅឡើយ​ទេ?

Picture

គ្រួសារ​ចំណាស់​ដដែល​បន្ត​ថា កន្លង​មក គាត់​បាន​ប្តឹង​ទៅ​អាជ្ញាធរ​ភូមិ​-​ឃុំ​រហូត​ដល់​ស្រុក​ឲ្យ​ជួយ​ដោះស្រាយ ប៉ុន្តែ​លទ្ធផល​មិន​បាន​ផ្លែផ្កា​ឡើយ​។ មិនតែប៉ុណ្ណោះ ពួក​គាត់​ថែម​ទាំង​បាន​ដាក់​ពាក្យបណ្តឹង​ប្តឹង​ខាង​គ្រួសារ​ដែល​ជា​អ្នកទិញ និង​មេ​ភូមិ​ចាស់​ឈ្មោះ ម៉ែ​ន សា​មឿ​ន ភេទ​ប្រុស ពី​បទ​ក្លែងបន្លំ​ឯកសារ​ទៅ​តុលាការ​ផង​ដែរ​។ គ្រួសារ​តា​យាយ​ចំណាស់​នេះ ក៏​បាន​អំពាវនាវ​សុំ​ឲ្យ​មន្ត្រី​ជំនាញ​មន្ទីរ​ក្រសួង​ពាក់ព័ន្ធ ជា​ពិសេស​ប្រមុខ​រាជរដ្ឋាភិបាល មេត្តា​ជួយ​ផង ដោយ​សុំ​ឲ្យ​យក​ឯកសារ​ពី​ភាគី​អ្នកទិញ​ដី​យក​ទៅ​ពិនិត្យ​មើល​ថា តើ​ក្លែងក្លាយ​ឬ​ការ​ពិត? ព្រោះ​ពួក​គាត់​មិន​ដែល​បាន​ធ្វើ​លិខិត​ផ្ទេរសិទ្ធិ ឬ​លក់​ផ្តាច់​ដី​ខាងលើ​ម្តងណា​ឡើយ​។

ម្យ៉ាង​ពួក​គាត់​ថា អំឡុង​ផ្ទុះ​រឿង​ដំបូង​ភាគី​អ្នកទិញ គេ​យក​កិច្ចសន្យាលក់​ផ្តាច់​ដី​១​ច្បាប់​ទៅ​ជួប​អាជ្ញាធរ លុះ​ពេល​នេះ​គាត់​ដាក់​ពាក្យបណ្តឹង​ទៅ​ដល់​តុលាការ បែរជា​អ្នកទិញ​ដី​ពួក​គាត់ គេ​មាន​លិខិត​ទិញ​លក់​ផ្តាច់​ដី​១​ច្បាប់​ទៀត ទំហំ​ប៉ុនគ្នា តែ​ស្នាម​មេដៃ​ក្នុង​ឯកសា​ទាំង​២​ហាក់​ខុស​គ្នា រឿង​ផ្តិត​មេដៃ បើ​ទោះជា​កាលបរិច្ឆេទ​ថ្ងៃខែ និង​ឆ្នាំ​ដូច​គ្នា​ក៏​ដោយ​។

Picture

យ៉ាងណា​ក៏​ដោយ បញ្ហា​ខាងលើ​នេះ លោកតា​លោកយាយ​ក៏​បាន​ដក​ពាក្យបណ្តឹង​ពី​តុលា​រការ​វិញ ដើម្បី​ឲ្យ​អាជ្ញាធរ​មូលដ្ឋាន​ធ្វើការ​ដោះស្រាយ ។

ពាក់ព័ន្ធ​នឹង​ករណី​ខាងលើ​នេះ ភាគី​អ្នកទិញ​ដី​ដែល​មានឈ្មោះ លេង ម៉ា​រ៉ា មិន​អាច​ទាក់ទង​សុំ​បំភ្លឺ​បាន​ទេ ដោយសារ​តែ​រក​ទំនាក់ទំនង​មិន​ទាន់​បាន​។

ក៏​ប៉ុន្តែ​បើ​យោង​សំដី​អាជ្ញាធរ​ថា ភាគី​អ្នកទិញ​ដី​នេះ ក្នុង​កិច្ចប្រជុំ​សម្របសម្រួល​នៅ​តែ​ទទួលស្គាល់​ថា កិច្ចសន្យាលក់​ទិញ​ផ្តាច់​ដី គឺ​លោកតា​លោកយាយ​ដែល​ជា​ម្ចាស់​ដី បាន​ផ្តិត​មេដៃ​ឲ្យ​ខ្លួន​មែន និង​អះអាង​ថា បើជា​រឿងប្រឌិត ខ្លួន​សុខចិត្ត​ទទួលទោស​ចំពោះ​មុខ​ច្បាប់​ជា​ធរមាន​ទៀត​ផង​។

Picture

ក្រោយ​ការ​សាកសួរ​រឿងរ៉ាវ​ខាងលើ​នេះ មេ​ភូមិ​ដងរ៉ែក លោក ទេ​ន សា​រិ​ទ្ធ ក៏​បាន​ប្រាប់​តាម​ទូរស័ព្ទ​ផង​ដែរ​ថា លោក​មិន​អាច​បញ្ជាក់​​ការ​ពិត​ថា តើ​ភាគី​មួយ​ណា​ខុស មួយ​ណា​ត្រូវ​ឡើយ? ប៉ុន្តែ​លោក​ថា បើ​មើល​ឯកសារ​ជាក់ស្តែង​ពេល​សម្របសម្រួល​នោះ គ្រួសា​រ​ទាំង​២ លើក​ទី​១​ជាមួយ​អាជ្ញាធរ​ភូមិ និង​ឃុំ ភាគី​ទិញ​ដី​មាន​ឯកសា​ផ្សេង លុះ​ចាប់ផ្តើម​ប្តឹង​គ្នា​ភាគី​ម្ចាស់​ដី​សុំ​យក​ឯកសារ​ទៅ​ស្គេ​ន​មើល ស្រាប់តែ​ភាគី​អ្នកទិញ មាន​ឯកសារ​ផ្សេង​មួយទៀត និង​ជា​កិច្ចសន្យាលក់​ផ្ដាច់​ដដែល​។

មេឃុំ​បន្ទាយឆ្មា លោក ហេង សុ​ភ័​ក្រ ក៏​បាន​ប្រាប់​តាម​ទូរស័ព្ទ​ស្រ​ដៀង​នឹង​លោក​មេ​ភូមិ​ដងរ៉ែក​ដែរ ដោយ​បាន​ប្រាប់​ថា មិន​ទាន់​ហ៊ាន​អះអាង​ថា តើ​ភាគី​មួយ​ណា​ខុស មួយ​ណា​ត្រូវ​ទេ? ព្រោះ​រឿងរ៉ាវ​ខាងលើ បាន​រុញ​ដល់​ថ្នាក់​ស្រុក ហើយ​លោក​ទើប​ឡើងជា​មេឃុំ​។ លោក​បន្ត​ថា ឯកសារ​លក់​ផ្តាច់​មិនដឹង​ថា លក់​ទិញ​យ៉ាងម៉េច​ទេ? ប៉ុន្តែ​គណៈកម្មការ​ឃុំ​-​ស្រុក​បាន​ចុះ​អង្កេត​ឃើញ​ថា ឯកសារ​ខុស​គ្នា ហើយ​ភាគី​ទាំង​២ ជា​ពិសេស​ភាគី​អ្នកទិញ​ដូច​ជា​មិន​ទាន់​មាន​ឆន្ទៈ​ទទួលយក​ដំណោះស្រាយ​ឡើយ​។ លោក​ថា ឯកសារ​របស់​ភាគី​អ្នកទិញ មានការ​កោស​លុប និង​សង្ស័យ​ថា ជា​ករណី​មិន​ប្រក្រតី​៕

Picture
Picture
Picture
Picture
Picture
Picture