ខេត្តកំពង់ចាម ៖ គ្រោះអគ្គីភ័យបានឆាបឆេះសន្ធោសន្ធៅដោយមានផ្សែងហ៊ុយខ្មួលខ្មាញ់ទៅលើអាកាស ដែលហេតុការណ៍នោះបានកើតឡើងនៅវេលាម៉ោង១២ និង៣០នាទីថ្ងៃត្រង់ ថ្ងៃទី១៩ ធ្នូ ២០២១ ហើយករណីឆេះនេះម្ចាស់ផ្ទះឈ្មោះ ស៊ឺន សម្បត្តិ ភេទស្រី អាយុ៣៧ឆ្នាំ នៅភូមិគោកស្រឡៅ ឃុំបារាយណ៍ ស្រុកព្រៃឈរ ។ ផ្ទះមួយខ្នងមានទំហំបណ្ដោយ៦×8 ម៉ែត្រសង់អំពីរឈើប្រកក្បឿងជញ្ជាំងក្ដា ថ្មក្រោម ។
ភ្លាមៗនោះក៏ឲ្យមានការភ្ញាក់ផ្អើលដល់អ្នកជិតខាង ហើយត្រូវបានរថយន្តពន្លត់អគ្គីភ័យនៃអធិការរដ្ឋាននគរបាលស្រុក២គ្រឿងចេញមកអន្តរាគមន៍បាញ់ទឹកពន្លត់ផងដែរ ។ តែដោយសារខែនេះ ជារដូវខ្យល់ផងនោះ ហើយផ្លូវរាងឆ្ងាយទម្រាំតែទៅដល់ផ្ទះឈើត្រូវបានឆេះអស់សល់តែគ្រោងសសរ ។
លោកវរសេនីយ៍ឯក កែវ ស៊ាងហ៊ាន់ អធិការនគរបាលស្រុកព្រៃឈរបានឲ្យដឹងថា បន្ទាប់ពីកម្លាំងសមត្ថកិច្ចនៅមូលដ្ឋានរាយការណ៍មករូបលោកភ្លាមនោះក៏បានដឹកនាំកម្លាំងជំនាញ និងរថយន្តពន្លត់អគ្គីភ័យស្រុកកម្លាំងប៉ុស្តិ៍នគរបាលរដ្ឋបាលបារាយណ៍ និងប្រជាការពារភូមិគោកស្រឡៅ ចុះជួយធ្វើការពន្លត់ករណីឆាបឆេះ នេះកម្លាំងសមត្ថកិច្ចយើងបានពន្លត់មិនអោយឆេះរាលដាលបន្តទៀតឡើយ ។
អធិការនគរបាលស្រុកព្រៃឈរប្រាប់បន្តឲ្យដឹងទៀតថា ដោយមានការណែនាំពីលោកឧត្តមសេនីយ៍ស្នងការទាំងរដូវប្រាំង និងរដូវវស្សាកម្លាំងសមត្ថកិច្ចបានប្រចាំការ២៤ម៉ោងលើ២៤ម៉ោង និងត្រៀមអន្តរាគមន៍ពេលមានហេតុការណ៍កើតឡើងដូចជាខាងលើនេះ ។ ពេលដែលអគ្គីភ័យកំពុងឆាបឆេះត្រូវបានរថយន្តអធិការដ្ឋាននគរបាលស្រុកព្រៃឈរចំនួន២គ្រឿង បានចេញទៅអន្តរាគមន៍បាញ់ទឹកពន្លត់ដោយមិនឱ្យឆាតឆេះទៅដល់លំនៅឋានអ្នកក្បែរខាងនោះទេ ។ ចំពោះការបាត់បង់ក្នុងនោះរួមមាន
ខូចខាតផ្ទះពីរខ្នងអស់ទាំងស្រុង និងសម្ភារៈមានដូចជា ស្រូវចំនួន០៦តោន ម៉ូតូសង់កូរេ (ឆ្អឹង)០១គ្រឿង ខ្សែក-ខ្សែដៃ១.៥ដំឡឹង(ផ្លាកទីន) ខ្សែក.ខ្សែដៃ១ដំឡឹង(មាស) លុយ៥.០០០(ដុល្លារ) លុយខ្មែរ៣៥០០០០០(បីលានហាសិបម៉ឺនរៀល) និងសម្ភារៈផ្សេងៗមួយចំនួនទៀត ករណីនេះប្រើប្រាស់ថយន្តពន្លត់អគ្គីភ័យចំនួន០២ គ្រឿង ទឹក០២ស៊ឺទែន ។ ចំពោះករណីនេះមិនបណ្ដាលឲ្យឆេះរាលដាល និងបង្កគ្រោះថ្នាក់ដល់មនុស្សឡើយ ។
អធិការនគរបាលស្រុកព្រៃឈរបញ្ជាក់បន្ថែមថា នេះជារដូវប្រាំង ហើយជំនោរខ្យល់បក់បោកពីទិសខាងជើង ដូច្នេះបងប្អូនប្រជាពលរដ្ឋដែលជាម្ចាស់ផ្ទះ ត្រូវយកចិត្តទុកដាក់ប្រុងប្រយ័ត្នពីគ្រោះអគ្គីភ័យ ដែលបានកើតឡើងមុននឹងចាកចេញពីផ្ទះត្រូវពន្លត់ភ្លើងចង្ក្រាន ឬបិទបារ៉ែតភ្លើងជាដើម ៕
ចែករំលែកព័តមាននេះ